آخر حاجة ..في مشجع قام من نص الناس ..وقال هسع عليكم اللـه العكسات الفي الكشافات دي عاوزة ليها مدرب أجنبي
في روسيا ..طبيب العيون بتخرج من كلية (الآداب)…ح تقعدوا تشرعوا لي…وتقولوا لي ليه؟…واشمعنا
المقبرة جاهزة…وسعوا المراقد بس…وافتحوا البوابات من بدري
زمان عندنا ولد في المدرسة ..كان بيجينا في (الحصة الرابعة) وبقول لينا عليكم اللـه (اهجموني).
ونحن نشيل ونهجم.
يعني (اخلعوني).
نقول ليه يا فالح ..(الخُلعة) لو اتكشفت ما بتبقى خُلعة ..بتبقى حاجة تانية.
سنة 1913 كان الواحد لمن يمشي ويقول لبتاع المطعم عليك اللـه اعمل لي كيلو سمك وشكلو.
كان بتاع المطعم مع (السمك) برمي ليك شوية لحمة ضان …(على حس شكلو دي).
سنة 1909 القحة كان بكون معاه نزلة (شعبية) حادة.
في المسلسلات والافلام العربية …البطل بقول للبطلة الليلة انا ح اجيب ليك (هدية) مفاجأة.
البطلة بتقول ليه : ح تجيب لي شنو؟.
الكلام دا كلو في التلفون.
البطل بقول ليها لو كلمتك ح اجيب ليك شنو؟..دي ما بتبقى (مفاجأة).
تقوم البطلة تقول ليه …كلامك صاح واللـه.
زي كأنها قدرت احساس البطل العالي والمفاجأة العاملها.
الكلام دا في اي مسلسل واي فيلم بيحصل.
ونحن في اي مسلسل واي فيلم بنقعد ننتظر (المفاجأة)..تقول عاوزين يقسموها معانا.
مرة في مسلسل عربي …محمود المليجي اللـه يرحمو قال لي سميحة ايوب الهسه قاعدة دي..الليلة انا ح اجيب ليك هدية (مفاجأة).
نحن حرسنا (المفاجأة) دي المسلسل كلو.
في كل حلقة بنقول الليلة ح نعرف المفاجأة شنو؟.
عارفين (المفاجأة) في الحلقة الاخيرة من المسلسل طلعت شنو؟.
طلعت (كديسة).
واللـه لو عارفنها (كديسة) ما كنا تابعنا المسلسل ذاتو.
كان شفنا لينا شغلة تنفعنا.
يعني محمود المليجي عاوز يجيب شنو اكتر من (الكديسة) دي؟.
تلقاكم انتوا متلنا افتكرتوه ح يجيب ليها (عقد) او يجيب ليها (موبايل).
استغفر اللـه ..الزمن داك ما كان في (موبايلات).
الموبايلات دي ظهرت هسع في زمن منى زكي وحنان ترك.
سنة 1916 كان وقت تمشي ليك محل حلويات وتقول لصاحب المحل عليك اللـه اعمل لي كيلو باسطة وشكلو.
كان صاحب المحل مع كيلو الباسطة بشيل ليه صندوق بيبسي على حس (شكلو) دي ويديك ليه.
الزمن كان بي خيرو.
اوعك!!.
المهم…
الطالب كان بقول لينا : انتوا مالكم ..انتوا بس اخلعوني ..لو نزلتوا ليكم اعلانات بالخُلعة دي في ام بي سي انا بتخلع.
وكان نحن بنخعلو.
الحصة الرابعة زمان ..الكلام دا بدري كان عندها قيمة.
وكان عندها وزن زي اغنية (الطير المهاجر).
هسع الحصة الرابعة الفصل كلو بكون نايم.
عيال آخر زمن.
الدنيا دي حصل فيها شنو؟.
في روسيا ..طبيب العيون بتخرج من كلية (الآداب).
ح تقعدوا تشرعوا لي.
وتقولوا لي ليه؟.
واشمعنا.
والكلام دا ما صاح.
جنكم غلاط.
ح اقول ليكم ..وارد عليكم رد منطقى.
الشعر والغنا ..والكلام السمح كلو بتكتب في (العيون).
هسع نحن غنانا دا كلو (عيون).
الروس قالوا على كدا ..طبيب العيون مفروض يتخرج من كلية الآداب ..ما يتخرج من كلية الطب.
قلنا برضو فهم.
الروس شفوت.
عرفوها.
عشان كدا ..هسع نحن في السودان عندنا شاعر العيون (عبداللـه النجيب).
اثبت ليكم تاني.
ابرهن ليكم النظرية.
لو سألت اي واحد وقلت ليه بتعرف ليك طبيب عيون ..بقول ليك ما بعرفو.
والبيبالغ كدا بقول ليك عمر محمود خالد.
تقوم انت تقول ليه عمر محمود خالد ما طبيب عيون.
لكن لو جبت ليك اي واحد من الشارع وقلت ليه شاعر العيون منو؟.
بقول ليك (عبداللـه النجيب).
يبقى يا جماعة طبيب العيون مفروض يقرأ طب وإلّا يقرأ آداب؟.
وهو المطلوب اثباته.
قلت ليكم قبل كدا (الروس) ديل ما بعملوا ليهم حاجة ساكت.
قعدتوا تغالطوا.
اوعك!!.
نحن في السودان مفروض يكون عندنا (اختراع) برانا.
نحن لي متين ح ننتظر الناس يخترعوا لينا.
مالنا.
ناقصنا شنو؟.
ما نقترع برانا.
واللـه (الصلع) الفي البلد دي في (الدولار) ما في.
يبقى يفترض ما ننتظر القطر يقوم.
مفروض نحن كشعب متحضر وشعب متعلم وفاهم اي حاجة ..نعمل لينا (اختراع) برانا.
لمتين ح نفضل كدا؟.
لمتين ح ننتظر الروس يخترعوا لينا؟.
مفروض المهندسين في السودان يتخرجوا من كلية البطري.
ح تقعدوا تستغربوا لي من الصباح.
وتفتحوا لي اعتراضات.
وتقولوا لي اشمعنا.
وليه؟.
ولماذا؟.
والكلام دا ما منطقي.
والكلام دا ما معقول.
ح ارد عليكم رد منطقي.
رد في منتهى التهذب.
ح اقول ليكم (كوبري المنشية) دا العملوا منو؟.
ح تقولوا لي (المهندسين).
ح اقول ليكم والصدعو شنو؟.
ح تقول لي (الفئران).
طيب يا جماعة مفروض المهندس يتخرج من كلية الهندسة ام يتخرج من كلية البيطرى.
لو درسوا (بيطرى) كان عرفوا يتعاملوا مع (الجقور) دي.
ما كان (الفئران) صدعت الكوبري.
اها يا جماعة كلامي دا منطقي ولّا لا؟.
اصلو نحن ما عندنا حاجة ساكت.
اوعك.
اقول ليكم حاجة تانية.
حاجة بتحيركم.
المحاسبون.
المحاسبون مالهم؟.
اللـه يشوفهم ..مالك عاوز تقبل عليهم من الصباح كدا.
(المحاسبين) ديل مفروض ما يقرأوا (اقتصاد).
ولا يحضروا ليهم محاضرة محاسبة واحدة.
ولا معهد.
ح تقعدوا تكبوا لي (الاستغراب).
وتقعدوا تعترضوا لي.
وتقولوا لي ليه ..واشمعنا ..ولماذا؟.
والكلام دا غلط.
وح ارد عليكم برضو رد منطقي.
وفي منتهى التهذب.
عليكم اللـه هسع انتوا وقت تمشوا تصرفوا (المرتبات)…موش المحاسب بقول ليكم الماهية مافي.
او القروش ما نزلت.
في واحد فيكم مرة مشى ليه لمرتب صرفو.
اي محاسب بقول ليك : (مافي).
اها يا جماعة (مافي) دي عاوزه ليها دراسة.
عاوزه ليها كلية اقتصاد.
عاوزه ليها محاضرة محاسبة واحدة.
ما في ..والقروش ما نزلت ..والكشف ما صدقو ..ما عاوزه ليها (محاسب).
اي واحد ممكن يقوم بالدور ..بدل ما تجيبوا ليكم جامعي بدرس في الكلية (4) سنوات او (5) سنوات.
الموضوع دا لو خليتوا لي ناس الخدمة الوطنية بقوموا بيه.
اوعك!!.
مرة دخلنا لينا مباراة.
ما في داعي للتسمية.
لكن الطرف الشمال في المباراة كان موسى الزومة.
والطرف اليمين بلة جابر.
نحن قاعدين المباراة كلها ..نعاين في موسى الزومة بيكمل اللاين وبيعكس في الكشافات.
نفتر من المعاينة في الكشافات الشمالية.
نقبل يمين نلقى ليك بلة جابر بكمل اللاين وبعكس في السما.
بعكس في الشكافات.
فترنا من الكشافات الجنوبية.
آخر حاجة ..في مشجع قام من نص الناس ..وقال هسع عليكم اللـه العكسات الفي الكشافات دي عاوزه ليها مدرب اجنبي.
العكسات دي لو جبتوا ليها محسن سيد بيدرب ليها احسن تدريب.
مدرب اجنبي في شنو؟.
لو جبتوا ليكم (كهربجي) بقوم بالواجب.
كورتكم كلها في الكشافات تقول (حدي).
…….
ملحوظة : طبعا ح تقولوا لي (الحدي) الدخلو شنو في الموضوع دا.
هوامش
اجلنا الكلام عن المباراة بعد صفارة الحكم.
الهلال اليوم سوف يعود الى هلاله.
المقبرة جاهزة.
وسعوا المراقد بس.
وافتحوا البوابات من بدري.
شكلوا لينا في الهجمة.
ونوعوا لينا في الاقوان.
عاوزين اقوان من برة.
واقوان من جوة.
عاوزين اقوان بالرأس.
واقوان بالقدم.
اعملوا لينا اي شيء في المباراة.
احسموا لينا الصعود من الخرطوم.
عاوزين مباراة الاياب..تكون لي (فسحة).
……….
عاجل : انتظرونا بكرة ان شاءاللـه في مساحات للفرح ..عاوزين نفرح شوية ..فترنا من (الصرة) دي.
-
-
-
-
-
-
-
-
