إحساس إنساني مجيد

لا ليهو طقوس.. لا لون.. لا يوم..

دايماً إحساسك في تجديد

لا بينكم سد.. لا جور.. لا لوم..

مفروض يوماتي غرامنا يزيد

يملأ الأرواح أفراح ونجوم..

الريد الصادق بالتأكيد

بيضلل فينا كأنو غيوم..

رغم الأحزان تلقاكا سعيد

تتبدد أي جراح وهموم..

والشوق جواكا مداهو بعيد

ويساهر بيك ماتضوق النوم..

ولو زولك سابك مرة وحيد

تصبح ولهان.. شقيان.. مكلوم..

وكأنك إنت البي التحديد

في الدنيا برااااك ياخي المظلوم..

الحب إحساس إنساني مجيد

علمنا فنون.. وآداب.. وعلوم..

موجود جوانا في أي وريد

وإن شاء الله فضايلو علينا تدوم..

ونعيش أيامنا محبة وريد

وأجمل إحساس بيناتنا يحوم..

نحن الإخلاص رابطنا شديد

وبينا التقدير.. والهوى بالكوم..

ما محتاجين بدعة (تهويد)

تفسد أخلاقنا ونبقى خصوم..

ونعيش الحب في معني مريض

ونبيع في غفلة نفوس وجسوم..

والناتج يصبح طفل شريد

والغلطة تكون غلطتنا عموم..

فكينا حبالهم من الإيد

وإتربوا على الأفكار الشوم..

لو كلنا نطري (رقيب) و(عتيد)

ما أظن يغشانا جحيم وسموم..

والريد لو سامي.. نبيل.. وفريد

ما ببقي نتيجتو طفل محروم..

الحب يا ناااااس ما داير عيد

لا ليهو طقوس.. لا لون.. لا يوم!!