> لأن الفاشر هي فاشر السلاطين.
> والزعيم سلطان كبير.
> الأرض أرضنا.
> وشفوت الفاشر لا يقلون عشقاً للزعيم عن شفوت العاصمة.
> بل قد يفوقونهم في بعض الأحايين حباً وعشقاً ومناصرة.
> فالذين يتواصلون معنا من فاشر السلطان. أكدوا لنا عمق الترابط الوجداني بالزعيم. لا نخاف على المريخ في بلد أرضه وجمهوره حقاتنا.
> سننتصر بإذن الله.
> سنعود بالنقاط التلاتة.
> لنشكِّل ضغطاً لوصيف الوصيف في مباراة كادقلي. فوصيف الوصيف يرجف براهووو. كمان نجيب تلاتة نقاط تاني.
> صدقوني. الجوهرة بترجع مقبرة.
> وبندفن فيها الوهم والفشل وكل المواسير من جديد. يا شفوت الفاشر.
> يا أبناء السلطان. هنيئاً لكم والزعيم بينكم. ما بوصوكم عليه.
> إنتوا أهلوا وتستاهلوا أن تستمتعوا.
> وإن تنتشوا وتنتصروا للزعيم.
> شفوت الفاشر. شكراً مقدماً.
> آها..
> أمس محمد عبدالماجد دق الدلجة.
> ردح ردحي من أمو.
> أصلو ده حال البموت ليهو زول عزيز.
> والهلال بالنسبة لمحمد عبدالماجد عزيز. > عشان كده ردح.
> اتكندك بالتراب.
> دق الدلجة واتدردق في الواطة دي.
> ووصف الحال بدون رتوش.
> لا خلى ليك المواسير البتنقط من جابوها. وقال دي اتقدت متين ؟؟؟
> متين دخلت اللعب عشان تنقط كمان.
> وقال وين الفجيرة وما أدراك ما الفجيرة.
> وفييييييييييييييييييط.
> قشاها في طرفو. وواصل ردحي.
> الليلة يا حليلك يا خليفة.
> يا الماطلعت فنيلتك نضيفة.
> يا الكان قلبك حار برغم رجلك ما حريفة.
> واهي اهي اهي.
> وفييييييييييييط.
> جابوا لينا بوتاكو.
> قالوا لينا ببقينا زي موناكو.
> والكاسات في دواليبنا يتاكو.
> بوتاكو وكيبي يتاكو.
> خلوا الجماهير يتباكو.
> واهي اهي اهي.
> أحي.
> وفيييييييييييييط.
> المرة دي قشاها في الحيطة.
> الليلة يا ود امي. الليلة يا ود بخيت.
> يا البتمرق الجمهور سعيد.
> جدعوك بعيد وجابو لينا اليوناميد.
> واهي اهي اهي. وووووواي.
> وفيييييييييييييييط.
> المر. دي أبت تطلع.
> وواصل ردحي.
> والليلة يا المدينة
> يا الكنت بتجري لينا.
> تفتر الخصم وتخفف الضغط العلينا.
> فقدناك وقاعدين سااااي بقينا.
> ووووب. وووب. ووب , ووب وو,ب.
> وفيييييييييييييط.
> المرة دي مرقت كبيرة.
> مرقت بكري منهم عاد ما كبيرة شديد.
> ويواصل الردحي.
> الليلة إلا نستعين بالرديف.
> بعد فشل كارديف.
> لكن كان استعنا بالرديف.
> إلا نردف.
> الجمهور قرر الجلد الفصل كلو.
> وأبو الفصل زاتو ينجلد.
> وووب .. كُر عليا وكُر عليا.
> وينوح أبو حميد.
> يا فطومة الغشيتينا.
> يا فطومة الجهجهتينا.
> فرطتوا في المدينة.
> وخربتوا الزينة. يا ناطقة أفتينا.
> بكري برجع لينا. ولا نشوف لينا مدينة.
> ولا قصة لوزان مكنة وربطتيها لينا.
> اهي اهي اهي.
> كُر علي وكُر علي وكُر علي يابكوري.
> وفيييييييييييييييييط.
> دي جات كبيرة قام دق الدلجة تاني.
> قام واتنفض.
> والله محمد حننا.
> اتجرس جرسة.
> الحكاية دي دخلت عليهو شديد.
> واحد قال أدوهو مويه يبل ريقو.
> جغمناهو.
> قلنا ليهو غسل وشك واستغفر.
> قال ما بغسلو. وما …بغسلو.
> خلوني أنفشَّ وكت ما فشوني ناس بشة.
> حليلك يا بشة يا الطلعت غشة.
> شال القريشات عرس بيهن وشبع واتدشَّ
> خلانا جيعانين للنصر وهو يداعب بين سنيناتو اللحمة بالقشة.
> ده فريق داير كشة. ووواي ,,,ووووب.
> واهي اهي اهي.
> وواصل الردحي.
> طبعاً في بيت الفراش ناس روشا كانوا قاعدين.
> لكن الموضوع ما فارق معاهم كتير.
> النوع البتلقاهوا قاعد لابس النضارة السوداء وخاتم كبير.
> ويشرب في القهوة والشاي.
> ويناقش في سعر الدولار.
> ويهز في راسو يعني عامل فاهم.
> ويسأل ليك من زول كده يكون ليهو أربعين سنة مافي زول شافو.
> موش في ناس كده فاكنها في روحهم.
> بتكلموا براحة عاملين فيها فاهمين ومرطبين؟؟
> النوع ياخ البتلقاهو راكب عربية بالقسط.
> ويقول ليك لما جبتها من بلجيكا ماكلفتني كتير.
> بلجيكا ؟؟
> بلجيكا بالصلعة!!!
> إنتوا لسه ما تبتوا من بلجيكا دي ؟؟
> المهم.
> الجماعة البكونوا قاعدين ديل.
> ولما يجي زول يشيل الفاتحة.
> يقيفوا نفرين.
> ناس روشا مابقيفوا.
> تلقاهم قاعدين كان بالغوا الواحد فيهم يفتح يدينو.
> والإيدين واحدة تكون فيها سجارة كمان.
> واحد من الناس الفي الصيوان يلاحظ ليهم.
> يقوم يقول الجماعة ديل المرحوم ما واجعهم.
> ينط ليك واحد تاني.
> ديل الكتلوهوا زاتهم.
> كتلوهوا كيف يا زول؟؟
> ديل ناس العربية الدقشت المرحوم.
> طيب مفروض يوجعهم ولو الدية الحايدفعوها دي.
> دية شنو يا زول؟
> البسوق بي تهور زي ديل بكون مؤمن يا اخوي.
> تأمين شامل كامل.
> لكن بالطريقة دي شركة التأمين ما بتفلس.
> شركة التأمين بتطفش قريب ده.
> قالوا اليومين دي مشت الإمارات.
> أي حادث تاني.
> من هناك بتلغي البوليصة وبتقول ليهم سوقوا هكرتكم دي براكم.
> وبتمشي تفتح في الجنوب.
> لكن محمد عبدالماجد اتجرس شديد.
> ردح , ردح , ردح.
> الناس دي كلها قطع مصارينها.
> كُر عليّ يا ود امي.
> الزول ده أدوهوا موية تاني.
> محمد عبدالماجد رفض.
> وقام على الردحي.
> تشطبوا لينا خليفة الزي فار المنشية.
> وتجيبوا لينا أطراف صناعية ؟؟؟؟
> أسي بوتاكو وسيسيه.
> ما أطراف صناعية ؟؟؟؟؟
> وووب , ووووب , وتاني وووووب.
> أطراف صناعية وأطراف صناعية.
> والجاية إلا نشتريه.
> ولا نرجي الغضبة القوية.
> يا شركة التأمين بتشتريه؟
> ولا بتفكنا عكس الهواء وياها المحرية؟
> وووووب علينا لو قال ما بشتريه.
> والفرق كلها بقت قوية.
> واحي احي احي.
> وفييييييييييييييييييييييييط
> المرة دي مرق بيها بره الصيوان وتاني ما رجع.
> أيها الناس
> «إن تنصروا الله ينصركم»
> آها
> نجي لي شمارات والي الخرتوم.
> كان شفت يا والينا.
> الليلة من سيرة الجقر خلينا.
> حكاية الباعوضة الحايمة فينا.
> موش ممكن تكون خطر على شوارعنا يا والينا.
> الليل كلو حايمة فينا.
> يمكن يوم نصحي من النوم وربنا يحيينا.
> نلقاها اكلت الزلط علينا.
> ما تستبعد يا والينا.
> وممكن الورل ياكل وزراة علينا.
> وممكن التمساح فنادقنا يقرضها لينا.
> وممكن الضبان لمباتنا يلحسها علينا.
> والقُرُنبُع أكيد أباريقنا بقرضها يا والينا.
> باقي متخصص في الحتة سنين وسنينا.
> وكان قرض الأباريق شنو تاني الفضل لينا.
> لكن الخوف يا والينا.
> أم بعلو يا كلنا وما يفضل ليك شيء فينا.
سلك كهربا
ننساك كيف والجقر الجمب القيف رجعنا لي قصة فاطمة السمحة والزرزور الأخضر ورويات الطيف يا لطييييييييييييف..
والي لقاء.
سلك[/JUSTIFY]
