> ولكن الوجود داخل الاستاد ليس للفرجة
> وانما للمساندة وحماية الفريق
> لاعلان ان هذا الاسد من خلفه أسد قادرة على الفتك باي خيانات.
> لتقول بالصوت العالي للحكم عندما يميل
> عملتك ما جميلة وحرتك جبانة
> الجمهور الشرس الواعي
> هو الذي يدير المباراة من المدرجات
> هو الذي يحتسب الحالة قبل الحكم
> ليجبر الحكم على احتسابها
> هو الذي يزأر مستنكراً المنكرات التي اصابتنا بتخمة
> وهو الذي يهتف في وجه الظلم والفساد
> وهو الذي يجبر الحكام على عدم الظلم
> وعدم الخطأ «الشماعة» التي يوارون خلفها الظلم.
> الظلم ظلمات.
> وزمان لما كنا صغار
> كنا بنقول عن الحكم السيئ
> حكم خاين
> ولما كبرنا لقينا الفيلم كلو خيانة
> حكم بطل ما قابلنا لي الليلة
> وتستمر الخيانة لأننا نستنكر سراً ما يقع من الحكام
> كان بالغنا نردد
> هيااااااااا
> ده شنو يا حكم
> والله بالغت
> دي عبارات لا تؤدب ولا تهذب ولا ترتفع لمستوى ندين ونشجب
> القصة يا شفوت اكبر من كده
> لا مجلس يستطيع أن يحمي الفريق
> ولا لاعب يستطيع ان يجبر الحكم
> انتم فقط من يستطيع ان يقوم العود المايل
> نقومه ولو ينكسر
> انكسارنا مؤلم
> ويؤلم اكثر من انكسار العود
> نقوم العود ولو يتكسر حته حته
> ايها الناس
> حكم في استادنا يسكت عن ضربة جزاء وحالة طرد في الشوط الاول.
> وعن ضربة جزاء في الشوط التاني
> وعن ضربتي جزاء يوم مباراتنا ضد اهلي الخرطوم نفسه ايام البدري في ختام الدوره الاولى
> وعن خنق وعفيص تسخاني «ايفياني» يوم مباراة الدورة التنشيطية ضد الهلال
> وعن اشياء كثيرة
> ويتجرأ ليحكم لنا مبارياتنا في الدوري؟؟
> دي حقارة اسمحوا لي
> اذا كانت لجنة التحكيم ما فاهمه الحته دي
> واذا كان المجلس يزوغ من الحته بالبيانات وندين ونشجب
> يبقي مافي حل غير يحل الموضوع الجمهور
> لأن الفريق حق الجمهور
> لا حق المجلس ولا بتاع لجنة التحكيم
> وحلول الجماهير واضحة وصريحة وناجعة
> بل وناجحة جدا
> ايها الناس
> خلونا من قصة هيااااااا وبالغت يا حكم دي
> وشوفوا ليكم حل تاني
> ايها الناس
> انا شخصياً لو كنت بلعب في المريخ
> عندما يتقاضي الحكم عن ضربة جزاء
> بندموا علي اليوم الجابو يحكم مباراة طرفها المريخ
> وما بقدر يتصرف معاي
> لأني بكون قبضتو بالثابتة امام الناس كلها
> ببقي ليهو في روحو
> طبعاً ما برجع ويحتسب الضربة الصهين عنها
> لكن علي الاقل باقي المباراة بكون مجبور يدينا حقنا فيها
> اين كان الكابتن بلة من صهينة الحكم عن البلنتيين؟؟؟
> اين كان باقي اللاعبين ؟؟؟
> اين علاء الشفت ؟؟؟
> المهم
> تعادلنا امام الاهلي في مباراة نستحق ان نفوز فيها بالتمانية
> لكن اهدار الفرص السهلة كان مشكلة ملازمة
> السبب الاستهتار
> ويمكن الثقة الزائدة برضو اثرت
> والعترة بتصلح المشي
> ايها الناس
> حاول اعلام الهلال ان ينقص من قدر بكري المدينة
> بكري ادي مباراة كبيرة
> وصنع الهدف الأول
> بل وصنع اهدافاً غيره ضاعت
> ورحم الله امرئً عرف قدر نفسه
> بكري عارف قدر نفسه كويس
> ايها الناس
> غارزيتو بسأل عن قروش الثريا
> لسه ما وصلت ؟؟؟
> داير حقو عمك
> ولوزان ليها ودان
> بمناسبة لوزان
> الحصل شنو ؟؟؟
> قالوا بكري يقيف ولا يجري في ريسينكم دي
> المهم
> جارنا هلالابي قدييييييييييييييييم
> صديق خلاص
> اي شيء بصدقو
> جاب ليهو مهندس ديقيتلات
> المهندس اسبوع قاعد عندو
> بفتش ليهو عن قناة الهلال
> المهندس اتصل بي صاحبو
> صاحبو في مدينة الفجيرة الاعلامية
> قال ليهو قلنا ندي الناس ديل حاجه كده زي صفحة الفيس
> عمقوها قناة
> الشيخ مدير مدينة الفجيرة قال لينا
> الجماعة ديل فوفاجين ومن الصفحة عملوا قناة
> ما تدوهم
> قام مهندس هنا قال ليهو اجدع لينا الترددات بتاعتها
> مهندس الفجيرة قال ليهو
> ترددات شنو ؟؟؟
> دي يوزر نيم وباس ويرد ما عندها
> ايها الشفوت
> كلامي واضح افتكر
> الجمهور هو من يراقب الفساد ويقتلعه من جذوره
> رسالة
> بالغت يا الجقر
> ايها الناس
> ان تنصروا الله ينصركم
> أها
> نجي لي شمارات والي الخرتوم
> كان شفت يا والينا
> الليلة شماراتنا نكات ساااااااي يمكن تخفف علينا
> قال ليك يا والينا
> بتاع بحر ماشي في قلب المدينة
> قابلوهو ناس اذاعة من المنتشرات فينا
> قالوا ليهو رأيك شنو في الكباري يا أخينا؟؟؟
> قال ليهم الكباري الاتعملت لينا
> ولا الكباري المعمولة فينا
> قالوا ليهو الاتنين افتينا
> قال ليهم من ناحية المعمولة فينا
> كباري قوية ومتينة
> والله يهديهم ويهدينا
> اما الاتعملت لينا
> حقو الحكومة لما تجي تعمل كوبري لينا
> تخلط الخرسانة بي سم الفار حماية لينا
> وكان شفت يا والينا
> بتاع بحر قالوا ليهو
> والي كضب علينا
> فكوهو بالشبشب امام ناظرينا
> قال ليهم منو الفكاهو بالشبشب لينا
> قالوا ليهو معلمه يا اخينا
> قال ليهم معلمه لكن
سلك كهربا
ننساك كيف ولو كلو زول بكضب ياخد شبشب كان كملت الشباشب علينا
وإلى لقاء
سلك[/JUSTIFY]
