> لفت نظرنا للجقور البقت قدر المواطنين عشر مرات.
> في أسواق الخضار تلقاها حايمة أسمن من أولاد الدرداقات.
> وفي الجزارات لافة أكتر من البهايم المعلقات.
> وفي بيوتنا بقت أساسية.
> استأنستنا.
> بقينا في نظرها حيوانات أليفة.
> يمكن تتضايق مننا أحياناً.
> وأحياناً كثيرة ترأف علينا.
> تقوم تخلي لينا باقي الرغيف.
> حياة ناشونال جوقرافيك.
> باعوضة وجقور وأُمات سيسي وحشرات أشكال وألوان.
> وقبلهن كانت القعونجة أم بروتين.
> ومعاهن كلهن.
> إنسان.
> كلهن عايشات مع بعض.
> تعايش حميم بينهن جميعاً.
> وهذا إن دل.
> إنما يدل على التعايش السلمي الذي ترتع فيه هذه البلاد.
> ناس تعيش في سِلم مع الجقور والضبوب والحشرات.
> نفتقد الباعوض اذا تأخر من موعده.
> المغرب يؤذن بي جاي.
> الباعوض يجينا بي جاي.
> تقول بصلي بينا.
> المهم.
> قال ليك اتنين من جقور المنشية السمان.
> الجقور أبان فقر كبيرة.
> فقر كريهة زي سنكيت التور.
> سنكيت التور ده طبعاً لما كنا صغار بنسميهوا الجاعورة.
> ولما نشوف تور بنكورك ليهو.
> التور اب جاعورة شم الدم وقال حرم.
> في ناس كانوا قايلين جاعورة دي جاية من جوعار التور.
> لكن الصحيح إنها جاية من سنكيتو الكرية القبيح الملبدبو في ضهرو ده.
> وطبعاً الجقور أشكال وألوان.
> أعتاها الجقر أب شنب.
> النسوان يقولن ليك والله جانا جقر في مطبخنا ليهو شنب.
> زحه أنبوبة الغاز بي جمبه ومشى.
> وفي نوع عندو أزيد من الشنب.
> وده النوع الصعب.
> ده النوع المجننا زااااااااتو.
> المهم.
> اتنين من جقور المنشية من النوع الصعب داك بتونسو.
> الأول قال للتاني.
> شفت اليومين دي سيرتنا عند الناس كيف.
> التاني: يا زول الأطرش سمع بينا.
> الأول : ياخ جقور أم درمان قطعوا فينا نشيد وقالوا.
> الجقر قرض البلاد الجقر قرض البلااااااااد من سواكن للمجلد أو …ووو …وووو.
> وقطعوا فينا شعر قالوا.
> جقر المنشية أب عيناً قوية
> عمل فيلا وعمارة وعربية
هيييييييييييييييييييييييييع
> التاني : قال وفي ناس في الواتس بتاعين إشاعات قالوا
> خط هيثرو باعو الجقر ومشروع الجزيرة قرضو الجقر وسودانير أكيد ده الجقر.
> أي شيء عملوها في الجقر.
> هيييييييييييييييييييييع.
> الأول قال ليهو سمعت الكبري قال فينا شعر كيف؟؟
> التاني قال ليهو الكبري قال شنو؟؟
> الاول : الكبري قال
> أسوق خرصانتي من جقراً لقى العلبة
> أهيم ليل وأساهر ليل أتوه من جمبة لي جمبة.
> كباري تميل بعد ميلك عشان طعم الجسور حلبة
> الجقر التاني ضحك.
> وقال.
> طعم الجسور حلبة دي عجبتني.
> تتذكر أول أمس لما كنا بناكل في كبري المنشية موش كانت بتجيك حصحاصات حلبة حلبة؟؟
> المهم.
> قالوا في جقرة من جقرات المنشية ليها فقرة.
> جقرات ام درمان قابلنها في بيت ظار.
> باقي جقرات المنشية بحبن الظار.
> دايرات يعرفن خيط جقورهن شنو.
> وخايفات جقورهن يلعبوا بي ديولهم.
> باقي الجقر كان شبع بنسى العشرة.
> وعارفات جقورن شبعوا شديد.
> المهم جقرات ام درمان المحكحكات ومتجوهلات.
> قالن ليها ويييييييييييييين يا بتاعت الكباري يا البتاكلي علناً وما بتتضاري.
> اتذكري ناس الضهاري وجدعي لينا إن شاء الله علبة كبري من الكباري.
> جقرة المنشية اتنفضت فيهن.
> وسمعتهن صفقة.
> منو دي؟ أنا دي ؟ بري بري بري.
> شوفوا الجقر الإكل كبريكم وما تسلبطنها فيني.
> المهم الجقر الإول قال للتاني.
> تخيل في ناس غريبين خلاص.
> قالوا طالما الجقر أكل كبري.
> يبقى مؤهل للترشح ودخول البرلمان.
> التاني قال ليهو والله فكرة.
> لكن باقي ليك ناس البرلمان بخلونا ناكل برانا ؟؟؟
> وضحك الجقران حتي بانت..
> ومنها تواصلت الضحكات للثورة بالنص.
> الشارع كلو يضحكو.
> لما الشارع زاتو ضحك معاهم.
> الشارع يضحك والجقور تضحك.
> الشارع يضحك لما الضحك شرطو.
> قابلهم جقر بدوبي.
> الليل الليل الليل
> الجقر شال نصيبوا من الكباري الاتعملت فينا.
> بحت وحفر لاقابلتوا خرسانة باينة لا دفيييييييييييييينة.
> اهممممممممم.
> الليل الليل الليل جقراً كرشو لازة …. سمنتو من جسمو نازة.
> ما بسلوب المسكين وما بياكل الا السمييييييييييييييييييييييينه.
> هييييييييييييييييييييييييع
> قام الجقر التاني قال للأول
> والله ألقى لي شاي لبن كاااارب اقرمش ليك كبري توتي ده معاهو زي البسكويت.
> الأول قال ليهو صاح والله كبري توتي زاتو شكلو كده زي بسكويت ويفر بكون هش.
> التاني قال ليهو لكن كبري المك نمر ما بتتاكل ساي.
> داير ليهو محدقات.
> التاني قال ليهو تعرف كبري ام درمان الجديد ده الا نفتوا.
> خرسانتو ما بتتحشي
> الاول قال ليهو انت وييييييييين كبري الدباسين؟.
> التاني قال ليهو اوعك تاكلو بهاراتو كتيرة وانت عندك المصران
> خليك مع كبري توتي والشاي بي لبن ده.
> المهم.
> الجقر الكبير قام.
> ولبس ملفحتوا.
> ركب اللاندكروزر المظلل وقال للسواق.
> الليلة بطني دي ماياها.
> مابقدر اتعشى.
> وديني أحشى كبري جامعة السودان الطائر في فطائر وأنوم خفيف.
> جقور آخر زمن!
> المهم.
> اليوم نقابل أهلي الخرطوم
> كلنا همه وما بوصونا
> النقاط أولاً
> الثبات ثانياً
> المدينة يبصر لينا.
> أيها الناس.
> «إن تنصروا الله ينصركم»
> ويبيد جقركم
> ويحفظ كبريكم
> آها
> نجي لي شمارات والي الخرتوم
> كان شفت يا والينا.
> المغني غنى لينا.
> الجقور صاحية وانت نايم.
> وشفعنا كانوا بلعبوا يا والينا.
> جقري وجقرك اكلوا الخرسانة
> يقدر جقرك يجقر جقري زي ما جقري جقر جقرك,
سلك كهربا
ننساك كيف والجقر بياكل كبري كاااامل ..جقر كتر بيلر يا والينا!
والي لقاء..
سلك[/JUSTIFY]
