زول حشري في (صورة العرس) بتلقاه واقف

الواحد من الغتة تلقى عندو سكري وضغط وتصلب في الشرايين واضانو تقيلة ..وما بشوف كويس…وعاوز يعرّس في مرتو

اول ما ينزلوا سبعة في الصينية …بثبتوهم ليك ..وبقولوا ليهم ما تاكلوا لو ما تميتوا النزول

تصوروا الزول الحشري دا وقت تضرب لي نمرة غلط بطلع هو…ما عارفو انا بطلع من وين؟

صورة العرس هل فقدت (مكانتها)؟.

هل فقدت (خصوصيتها)؟.

بقت عند اي زول بسبب (الموبايلات).

البتعرفو والما بتعرفو..واحد.

يصوروهم بي جاي ..وتلقى الصور حايمة في الواتساب.

اي زول يعلق ..ويقول رأيو.

البعرف والما بعرف بيعلق.

سألتكم قبل كدا ..لكن اتغاتتوا علي..ما جاوبتوا.

الغتاتة بتظهر مرات في عدم الاجابة.

ومرات بتظهر في الزول البقول ليك : (ما بشرب شاي).

الغتاتة ظاهرة ..وواضحة ما عاوزة ليها شطارة.

عندنا حلة ناسها كلهم (غتيتين).

الغتة لمن بقت قصار.

واحد عديل فيهم ما في.

الغتاتة دي ظاهرة في ملامحهم الواحد من الغتة تلقى عندو سكري وضغط وتصلب في الشرايين واضانو تقيلة ..وما بشوف كويس…وعاوز يعرس في مرتو.

هسع العرس في (المرا) الدخلو في الموضوع شنو؟.

دخلتو (الغتة).

لازم تكونوا عارفين الزول الغتيت من الزول الما غتيت.

الكلام دا بنفعكم في شغلكم.

بفيدكم.

في ناس عاوزين يدبلوا في العرس (غتة) بس.

يقولوا ليك انا (المرا) دي إلّا احرق دمها.

وما في حاجة بتحرق دم (المرا) غير العرس فيها.

عندنا حِلة ما فيها زول عديل.

الغتة فيها من طرف.

غتيتين بالتقادم.

لمن يحصل (بكا) في الحلة ..اهل المتوفى بقولوا اصبروا ما تطلقوا (البكا)..من نركب (الصيوان).

قابلتكم غتة زي دي؟.

الجيران من يسمعوا ليهم بي حركة غريبة في البيت ..بمشوا ليهم من غتتهم هم برضو بتغاتتو ليك وبقولوا ليهم : (عندكم زول مات؟).

مرجبين الحركات دي.

الجماعة ينكروا ليك الموت حطب ..موت شنو؟..نحن لو عندنا زول مات بندس الخبر مالنا..(وهم قاعدين في نفس اللحظة بركبوا في الصيوانات).

وبفتشوا في (الكشافات).

شفتوا من تلقوا ليكم زول بفتش ليه في (كشافات) ..اعرفوا في زول مات.

وقت الجيران يحاصروهم شديد بالاسئلة ويقول ليهم طيب (القبر) البتجهزو فيه دا (قبر) منو؟.

وقت ما يلقوا ليهم فرصة للمطانشة ..بقول ليهم واللـه عمنا عثمان تعابن شوية.

قلنا الحياة من الموت ما معروفة.

وقت بعدين يطقوا الكواريك الجماعة يكتشوفوا ان الزول المات ما عثمان المات ولدو.

غتة شديدة.

غتة ما بتوصوا عليها.

حِلة كلها غتاتة.

الحلة دي وقت يكون فيها عرس …اهل العرس بكونوا واقفين قدام الصواني.

اي تلاتة واقفين ليهم في صينية.

حارسنها حراسة.

تقول صينية حركة.

اول ما ينزلوا سبعة في الصينية …بثبتوهم ليك ..وبقولوا ليهم ما تاكلوا لو ما تميتوا (النزول).

المعنى الصينية لو ما بقى فيها عشرة انفار ..ما تاكلو.

النزول حكم في الصينية.

دي قابلتكم قبل كدا.

ترفع ليك (عضم) من الصحن بكتبوا عليك تلاتة ..بقولوا (جريت غلط).

ترمي العضم راجع بعد الكد ..برضو بكتبوا عليك تلاتة بقولوا عليك (رميت غطا).

حارسنك كدا ..اي حركة غلط ..تلاتة.

يعني العضم ح اوديه وين؟.

ابخروا انا.

ناس صعبين.

ومع الصعوبة عندهم (غتاتة) مبالغ فيها.

لو قلت عاوز (زيادة) ملوخية او فاصوليا ..بجيبوا ليك ناس (اللجنة الشعبية) عشان يحققوا معاك في الزيادة دي ..ويعرفوها ماشى وين؟.

اما اذا طلبت زيادة (ضلع) بقولوا عليك جنيت رسمي ..واحتمال يفتحوا فيك بلاغ (زيادة ضلع).

زيادة الضلع عندهم زي اشانة السمعة.

ما بتلفتوا.

لكن الموضوع دا ما بطلعنا من الموضوع الرئيسي بتاعنا.

موضوع صورة العرس.

صورة العرس …زمان كان تقديرها من تقدير العريس والعروسة.

ما زي هسع دي ..الصورة ممكن تكون عند زول ما عندو علاقة بالعريس ولا بالعروسة.

زول جابو الفنان بس ..صوّر العريس والعروسة وخلى الصورة تحوم في الواتس آب.

زمان صورة العرس دي عندها مكانة خاصة وهي زي الموضوع السري ..وما بعطوها اي زول.

ما بدوها لي زول مسكين.

محمد وردي بغني في (الريلة) كدا ..(ما بدوها لي زول مسكين إلا زول نخلو مقرون في البساتن).

زول عز يعني.

مرتاح وما عندو هم.

الموضوع بكل امانة ما عندو علاقة بمباراة المريخ وشالكا اليوم (عشان ما تقعدوا تشرعوا لي ساكت).

مباراة بدون جمهور نحن ذاتو ما بنعتبرها ليكم.

لكن يمكن في النهاية كدا نبعبص ونطلع ليكم علاقة.

اصلو اي حاجة في الدنيا دي عندها علاقة بشيء اخر.

كل الاشياء بتلتقي في هذه العلاقات.

الليلة موضوعنا الزول الحشري.

علاقتو الزول دا شنو بالموضوع دا؟.

الزول الحشري انا بعرفو بي حاجة واحدة.

ما بعرفوا بالتداخل في كل البرامج.

زي الخطوط المتشابكة.

اي موضوع تفتحو هو يتسيدو ليك.

زول حشري …بصورة ما تتخيلوها.

لو طلبت ليك سمك …وقعدت تضرب في السمك مع زول عزيز عليك …تلقاه تلاتكم.

قاعد ..يضرب في السمك ..ويشكي كمان من (الشوك).

وانت الزول الدافع الحساب ..تقول في سرك ان شاءاللـه السمك دا كلو يطلع (شوك).

تستمتع بي (شوك) السمك دا.

وتسأل اللـه (شوكة) تخنق الزول الحشري دا وتتعارض ليه في حلقو.

لكن الحشريين ديل كلهم مقدور عليهم.

في زول حشري ..اخطر من كل الحشريين البتعرفوهم ديل.

زول حشري بصورة فظيعة…زي ما بقولوا الهنود.

اول الهنود بقولوا كدا.

انا عارف ..مرة حضرت لي فيلم هندي ..لقيت فيه كلمة (فظيعة) دي.

من اليوم داك كلمة (فظيعة) ارتبطت عندي بالهنود.

المهم الزول الحشري شديد ..بتعرفو من صور العرس.

موش في صور العرس في صورة جماعية كدا للاهل والناس القراب شديد.

الزول الحشري دا في الصورة جماعية بتلقاه مصنقر.

مصنقر بي قميصو الاخضر القميص ما عاوز يغيرو.

انا اي صورة جماعية بتاعة عرس لاقتني في الحِلة ..والحلاّل التانية ..لقيت ليكم زولي الما بيغباني واقف ومتسنتر في نص الجماعة ..تقول ود خالة العريس.

الغريب ..والشيء الما عاوزة تقع لي إلى الان ..زولكم دا في الصورة الفردية للعريس والعروس بلقاه واقف.

كمان بقيف وبعمل حركات زمان ديك ..تلقاه شايل ليه زهرة او زهرية عديل كدا ..تقول العرس دا عرسو هو.

ناس الاستديوهات بقوا يشكوا منو.

صاحبكم اي عريس ..يجي معاه ..ويقول عاوز اتصور …لازم اللحظات التاريخية دي نوثقها بي صورة.

لازم نخلدها.

تاني اللحظات دي ما بتتكرر.

ولا بتتعاد.

اها يا جماعة عليكم اللـه من اللـه خلقكم ..وفي علوم البحار ذاتها ..لقيتوا ليكم زول (حشري) بالصورة دي.

تصوروا الزول الحشري دا وقت تضرب لي نمرة غلط بطلع هو.

ما عارفو انا بطلع من وين؟.

تمشي اي مكتب حكومي اي مصلحة بتلقاه قاعد.

بعمل في شنو ما عارف؟.

…..

ملحوظة : عزيزي العدس انت قاعد تتحشر لينا في اي صينية للغداء …اقطع وشك شوية مننا.

هوامش

يا احمد الحاج …الليلة ح اقعد بي مزاج كدا واتابع مباراة المريخ وشالكا.

جيبوها لينا عليكم اللـه في التلفزيون.

ح اكون حشري عديل كدا الليل في المباراة.

لو دخلت في التشكيلة بقعد في الكنبة.

عشان نشوف سيناريو المباراة دي.

ونقدم ليكم نقل مباشر لمباراة المريخ وشالكا من خلال هذه المساحة.

شيلوا شيلتكم.

لو اتغلبتوا اتنين..ما بنسألكم.

لو اتغلبتوا تلاتة ..ما بنقول ليكم حاجة.

لغاية اربعة نحن معاكم.

لكن بعد القون الرابع ..ما تسألونا تاني.

ما بنقدر نقيف معاكم اكتر من كدا.

من هسع قلنا ليكم ..لو اتغلبتوا اكتر من اربعة ..مباراة الاستقلال ..لو طلبت حق اللجوء السياسي ما تجوا راجعين ليها.

ونحن ذاتو قاعدين ما بنريح.

ان شاءاللـه الليلة بلة جابر يجيب ليه قون …عشان ناكد ليكم حسن النوايا عندنا.

بس يا بلة اوعك من العكسي.

كلمتكم انا.

افتقد بشدة واللـه كتابات اسماعيل حسن في الصحف الرياضية ومعاوية الجاك ..(الشوق غلب).

………..

عاجل : المباراة دي مالها عاوزة تذكرني مباراة الوحدات الاردني؟ ..نفس السقط ..والمدرب المتقدم في السن.
[/JUSTIFY]