أوبرا.. الحنان كيف

نضم لقيتو في موقع (المصري اليوم) وعجبني والله.. وحيرني.. فيهن نسوان ما ساهلات.. أبن يعرسن براااااهن.. ويكونو العرسان جارين وراهن.. وهن مكجنات العرس وربما مكجنات الرجال.. غايتو مرا تكجن الرجال قطع شك فيها شي ما راكب عدلو.. الموقع (المصري اليوم) جاب اشهر خمسة نسوان مشهورات ما ضاقن العرس.. وكل واحدة عندها سبب ما بيدخل الراس.. بداها من الممثلة المصرية أمينة رزق.. قالت ربنا ما قسم.. وقالت وهبت نفسي للفن.. وتزوجت الفن.. “أصلن كدي، الواحدة ما تعرس، يسعلوها ليه؟ تقول أنا عرست الفن”.. باقي لي أمينة دي أصلو مافي زول قرب منها واللا قال لها الفلعتك واللا التركتك.. بالرغم من انو في نضم تحت تحت انو ختبوها وفسخت الختوبة!!.. والشاعرة مي زيادة.. أها دي قالو كان عندها صالون ادبي كل تلاتاء يجو الشعراء والأدباء عندها.. ومافيهم واحد ما حبها.. علا هي كانت بتحب جبران خليل جبران.. جبران كان قاعد في امريكا وهي في مصر.. ما اتقابلو كلو كلو.. كانت بتكتب ليهو خطابات غرامية.. وتبثه حبها له.. لما مات جبران هي مرضت ودخلت مستشفى الأمراض العقلية..!!

الملكة اليزابيث الأولى ملكة بريطانيا العظمى.. أيام بريطانيا كانت عظمى.. ملكة طويلة عريضة ما عرست كلوكلو.. مع أنها لو أشارت لأي واحد في العالم مش في إنجلترا بس.. كان جا جارس حفيان وعرسها.. علا هي قالت كجنت العرس بي الله واحد.. وقالت أخير لها تشيل قرعتها وتشحد ما تكون متزوجة من ان تكون ملكة متزوجة.. (افضل أن أتسول بلا زواج على أن أكون ملكة متزوجة).. شفتو الانتاية دي مكجنة العرس كيفن؟.. يعني يا تكون ملكة كدي.. بلا راجل.. يا تخلي المُلك!! لكن باقي لي ما اتلقى زول يهديها وينضم معاها.. غايتو ان اتلقى زول هداها وقبلت، تاني يوم جاها يصبّح عليها “جلالتك كيف اصبحتي؟” ح تقول لو”انت تصبح نبي يا يابا.. عينتك رئيس وزراء.. ورئيس الوزراء الفي دا.. الحاسد ابقديديم دا يمشي اهلو”!!!

كوندا ليزا رايس.. وزيرة خارجية الولايات المتحدة الأمريكية السابقة.. أبت تعرس كلو كلو.. نان هي فايقة لي عرس عمرها كلو قضتو حايمة فوق كرعيها.. قدر مافي رئيس واللا ملك قعدت وخلفت كراعا وقعدت تتفاصح!! وقت سعالوها قالت ما لاقيت الراجل اليستحق أعرسو لي حسي.. شفتو تغا المرا دي؟ نان إن عرستي لوميني.. ونان شن لقيتي تراكي حسي لافة ساكت تشربي ما تروي.. ولا امحمد ولا فاطنة.. شافع ساكت يترسل لك واللا يقودك بعد تكبري ما تلقيهو!!

أوبرا وينفري.. الواحدة دي.. مواليد 1954.. عمرها ستين سنة لي حسي.. لكن أنا براااااحة بديها أربعين سنة.. مختوبة من سنة 1992.. ختيبها اسمو (ستيدامان جراهم) حبتو سنة 86.. وختبها سنة 92.. ولي حسي ما عرسو.. قالت خايفة من الطلاق.. إن عرست يقومو يطلقوها.. عشان كدي تقعد مختوبة كدي بس!!!.. و لو في زول داير يرتبط بيها وسالها قال لها “اوبرا.. الحنان كيف؟”.. ترد عليهو وتقول ليهو” سوري.. مرتبطة”!! وفي فهمي أخير يقعدو مستورين كدي.. حسي إن عرسوا وأعلنوا عرسهم نسمع بهم عندهم سبعطاشر شافع!!