يا ناس الرسول.. الشب واللبان

البخور.. أي شيء يختوهو في النار ويطلع دخان.. ويكون المقصود والهدف هو الدخان.. ورائحة الدخان.. لحدي قريب كنت بعتقد إنو البخور لي ناس الظار.. وللجماعة بتاعين الكتابة والكواديك.. ومرات مرات بشمو في بيوت الأعراس.. أو يكون مطلوق في بيت واحدة نفساء.. كنت وما زلت أخاف من بخور القرض.. وقت حُمى وهضربة.. ولي حسي لما أطراهو أحس بالخنقة وإني داير أقح.. وأعطس ودموعي دايره تجري ووشي يتنفخ.. وحالتي تبقى حالة.. بخور التيمان للعين.. كانت لنا جارة ابنها في نفس سننا العمرية.. لما يكون في امتحانات.. كل يوم تبخرو ببخور تيمان للامتحان.. وبعد دا كلو قاعد يجي الطيش.. مما جعلني لا أثق في بخور التيمان.. واعتقد بأنو بجيب الزول الطيش.. وقد أبديت وجهة نظري هذه ورأيي في بخور التيمان لإحدى قريباتي من صويحبات البخور المؤمنات به.. فوصفتني ونعتتني بكل ألوان وأشكال النعوت البتودي النار نصة نهار.. فكنت كافرا وملحدا.. وشيوعيا.. وختمتها بأني ولد مطرطش ساكت.. وربنا ما ح يضربني ياها بيضاء.. وقد كانت من ذوات الأسياد.. تستضيفهم يومين في الأسبوع يوم الأحد ويوم الأربعاء.. فترتدي لهم الأحمر.. وتطلق البخور.. وتصنقر في نص العنقريب وتبرطم بي نضم غير مفهوم.. والسجارة في قعر السجارة.. وأحيانا بعض قارورات من البيرة المكحلة.. فتزداد برطمة ورطانة تتخللها كلمات مفهومة ويا ريت لو ما فهمتها.. لأنها كلمات تودي السجن عديل وتوقفك قدام بوليص النظام العام متهما بخدش الحياء العام.. الغريبة بقية النسوة يعذرنها متهمات الأسياد بقلة الأدب دي لكنهن برضو طامعات في عفوهم ورضاهم.. أرجع للبخورات القاعدين نستعملها أهم بخور وصاحب شعبية كبيرة هو بخور التيمان يستعمل للعين والحسد وعشان الزول يجي الطيش.. ثم بخور الشب واللبان.. ودا من العين والحسد ومن الملصط والعين الشافتو ما صلت.. وبعد مرات فنجرة ساكت.. ثم البخور العدني.. ثم العود.. ثم الجاولي والجاولي دا في ناس تحت تحت بيقولو بجيب الرزق.. وما بيكلمو بالخاصية دي إلا الزول القريب منهم.. وعلي شقاوتهم حدسوني وتراني أنا بحدس في خلق الله جت.. وقصة اكتشافي له عندما شكوت الفلس لإحدى العارفات بأمور البخور.. أوصتني بالجاولي ومن اليوم داك وأنا شغال فيهو بخورا وشرابا وغسولا.. غايتو ح يتعب تعب شديد وممكن سعرو يرتفع.. أما المسبع فهو بخور سباعي الدفع.. يتكون من سبعة تروس.. أهمها الشب واللبان والجاولي والعدني والعود.. وعين الكتكوت.. والمر الحجازي.. وبعضهم يضع بخور الفاكوك.. والفاكوك هو ترياق الكادوك.. يقول باعته بأنو شايل للكادوك مقلاع.. أي زول شاكي بأنو عندو كادوك يمشي يشتري فاكوك.. ويتبخر بيهو.. والله يكفينا شر ناس الدنيا ومغارز وخوازيق وكواديك ناس الدنيا..

قال لها بعد عودته من الاغتراب:

وتلاشت في زحام المدينة

وزوت بسمة الشفاه الحزينة

أنا في غربتي أحس ذراعيك

تشدانني لحضن السكينة..

قالت وهي تدق صدرها (سجمي!!.. سكينة منو؟؟ عارفاااااك إن سويت لك قرشين بتعرس فوقي)..!!