نسوان في ورطة

*حنضل القيزان.. الجادعنو في الخيران:

خبر في إحدى الصحف: ( اختطاف عروس وتخديرها من قبل طليقة زوجها).. من الخبر نفهم إنو الراجل طلق المرا الخانقة دي.. وهذه المرا المطلقة.. ما اتحملت الضُرة.. حتى بعد الطلاق.. وتفاصيل الخبر أنها اتصلت بطليقها.. وقالت ليو (أنا وجماعتي جاهزين لاختطاف عروسك يا عريس).. وبالفعل جو.. وخطفوها وخدروها.. صحت لقت نفسها مجدوعة في (خور).. ومزعمطة وشعرها مزعوط ومخنوقة.. ومجدوعة في خور.. الشي البعروفو عن الاختطاف التساومي.. إنها تقول ليهو ما برجعها ليك إلا تدفع كذا مبلغ.. (وتسمعو صوت الرهينة في التلفون وهي تبكي وتكورك.. ألحقني يا بلة.. طلقني يا بلة.. عرساً منك ما دايراهو ما دايراهو ما دايراهو).. أو تضع شرط مغاير أن أبدلها ليك بقسيمة الطلاق منها.. ترسل صورة من قسيمة طلاقها أفكها ليك.. لكن تخطفها عشان تمشي تزعمطها وتخنقها في الخور.. دا كلام ما بيدخل الراس.. أصلها لو عاوزة تزعمط وتخنق.. تخلي الراجل يمرق لي شغلو وتجيها في البيت.. وتخنقها وتزعمطها وتخليها في بيتها.. وهي تمشي بيتها وقد فشت غبينتها.. وبعدين مرا تخطف وتخنق وتزعط.. يجعلني أتشكك في أنها قبال كدي بتكون لحقّت الراجل ايدا.. إني أرى أن الطليقة في ورطة وكذلك العروس الجديدة في ورطة.!!

*استثمار ياااااااا:

موظفة مشغولة.. طفلتها عمرها سنتين.. جابت شغالة تحرسها ليها.. سنة كاملة ما شاء الله الشغالة باقية في البنية عشرة.. في إحدى المناسبات وهي شايلة بنيتها.. قالت ليها إحداهن ( ووووووب علي يا ليمياء.. شايلة بنت المرا المسيكينة دي مالك؟) اندهشت واعتبرتها بتهظر.. ( إنتي أصلو هظارك دا مبتخليهو؟.. بري يا بت دي بنتي حنتوشتي) ثم امجغ باستها.. أصرّت السائلة بعد أن فتشت الشافعة.. (وحاااااات الله ياها ذااااااتا).. قالت لها (يا بت جنيتي وحات الله دي بنيتي).. ثم قالت السائلة (وحات الله يا بت هوووي.. كل يوم في واحدة شايلة البنية دي وحايمة في حلتنا وتدق باب باب وتشحد بها).. بعد التدقيق والتحري اتضح أن هذه الشغالة (المستثمرة الأجنبية ) تخلي الأم تمشي الشغل وتدي الشافعة منوّم وتحوم تشحد بها..!!

استثمار في السلك يا.. حبّة

إني أرى أن الموظفة في ورطة.. والشغالة في ورطة.. وكذلك الشافعة التي دُربّت أن تكون أداة شحدة برضو في ورطة..!!

*زوجات في ورطة من أمها:

عزيزتي الزوجة إنتي في ورطة حقيقية:

(إذا دخل الفقر من الباب خرج الحب من الشباك)..

اعذري زوجك.. وادعي له بالغنى

لو استجاب الله لدعائك..

و..

(إذا دخلت القروش من الباب دخلت الضرة من الشباك)..

راقبي زوجك.. وادعي له بالساحق والماحق..