> فرح المدينة
> حدث في المدينة
> وكدأب اهل الرياضة
> كلهم حضروا بمختلف الوانهم وانتماءاتهم
> مريخاب حمر شديد جينا
> ومريخاب صفر يسر صفارهم الناظرين
> واهلة برضو جوا
> اداريين ومدربين ولاعبين ومشجعين واهل العريس واهل العروسة
> كيف لا وهذا فرح المدينة
> وقبل يومين كان عرس بشه
> برضو اهل الرياضة جوا بمختلف ميولهم يشاركون بشه
> والناس الحضروا عرس بشه وحضروا عرس بكري
> سمعناهم بقولوا تحت تحت
> عرس بكري احلى من عرس بشه
> وعندها عرفت ليه بكري زاغ وبشه اتمقلب ووقع
> كردنة بخت العقد ويتفق معاك
> ويكورك
> جيب تمنمية وعشرين مليون يا آدم
> ويقول ليك وقع
> لما آدم يجي تكون وقعت
> لكن انت وحظك
> آدم يجي بالمية وعشرين
> يجي بالعشرين ينسى التمنمية
> يجيب تمنية وعشرين يقول سمع غلط
> يجي ساي
> يقول ما لقيتهم
> المفتاح راح
> البقت بقت
> عشان كده عرس بكري طلع أحلى
> آدم مين يا عم
> بمناسبة كردنة
> استمتعت مع كردنة من خلال شاشة النيل الازرق
> والحلقة اعيد بثها بالامس
> ونطالب قناة النيل الازرق ان تعيد بثها يومياً تلاتة مرات
> حلقة حدث
> حلقه ما بتتكرر
> ضحكت مع كردنة من الاعماق
> الراجل ده لذيذ
> الراجل ده مبدع
> زعيم امة الهلال ونص وخمسة
> اهلنا المصريين لما يغلبهم الوصف
> بقولوا حبيبي يا فلان
> وانا اقولها
> حبيبي يا كردنة
> الراجل جاي يغير واقع الهلال
> وحايأدب جمهور الهلال حسب قوله
> ليكم اللحم يا كردنة وللهلال العضم
> ادبهم واحد واحد
> ابدأ بروشا وخالد عزالدين
> انت زعيم امة الهلال
> يبقى تأدب زي ما عايز اذا كنت ترى انهم يحتاجون للتأديب
> واحنا حا نعرف اكتر من الحكومة !!!
> انت زعيم امة الهلال واكيد بتعرف امة الهلال دايرة ادب ولا ما دايرة
> لكن تبقى الحقيقة
> حبيبي يا كردنة
> جيبهم البيت يا كردنة
> ودخلهم واحد واحد
> وكورك لي آدم
> جيب السوط يا آدم
> انت الزعيم برضو
> ابدأ بآدم
> اذا كان آدم واحد من الجمهور ويحتاج لتأديب
> لكن ما قلت لي يا كردنة
> الصحفيين البتدخلوا في التشكيلة
> دحين ما دايرين ادب مع الجماهير ؟؟؟
> اذا كانت اجابتك بنعم
> رفقاً بالقوارير يا كردنة
> فطومة دي اختنا وما بنرضى فيها
> بعدين حنينة وما بتتحمل
> انهرها ساي
> لكن حبيبي يا كردنة
> قال ما داير بكري المدينة ودفعت ليهو مليار وتمنمية مليون
> امال لو دايرو كان دفعت كم يا كردنة ؟؟؟؟؟
> ايها الناس
> رؤساء الهلال فعلاً فلتات
> كلو يوم بدهشونا اكتر
> نحنا لسه ما فهمنا سداد البرير لتلاتة اتلات والباقي بسيط
> يجينا كردنة !!!
> طلع لنا من فين ده !!!
> حبيبي يا كردنة انت والله
> المهم
> تتضارب الاقوال حول محترفي المريخ الاجانب
> لا نلوم المجلس لان الامر قد يكون شائعات
> ولكن الخوف ان يكون الناس لسه في محطة البحث
> تبقى شينة في حق المجلس وفي حق المريخ
> كردنة ياخ جاب
> معقولة ؟؟؟
> الافارقة الجابهم كردنة اكتر من الافارقة الفي جامعة افريقيا العالمية
> شيخ موروكو مالو عيبوهوا لي ؟؟؟؟
> مغمور ده ما سبب
> النفطي كان ما مغمور
> كان مشهور
> ماذا قدم لنا ؟؟؟
> هوووووووي يا
> يا العارفني بتكلم عنك
> السنة دي اختانا عليك الله ينوبك ثواب
> أيها الناس
> إن تنصروا الله ينصركم
> أها
> نجي لي شمارات والي الخرتوم
> كان شفت يا والينا
> كان في بتاع بحر ماشي البحر وبجينا
> قابل حافلة مكتوب فيها يا والينا
> بكرة الركوب مجاني
> واقفة عطلانة مسكينة
> قطع الزلط يا والينا
> اشترى جريدة قال يقراها ويلمها لينا
> قرأ المانشيت يا والينا
> وزارة الصحة قالت عمليات زراعة الكلى والغسيل قريباً مجاني لينا
> خلى البحر ورجع لينا يا والينا
> عاين للحافلة وقرا الخبر تاني وقال لينا
> انتوا وزير الصحة اشترى حافلة جديدة لينا ؟؟؟؟
سلك كهربا
> ننساك كيف وكلمة مجاني بتتعارض مع رسوم الدفن..
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
