أيــــها الشعـــب النقنــاق

“من أرشيف الربيع العربي”

السُلطة كعبة.. وإن شاء الله ربنا ما يقسما لي حبيب.. والسلطة البي يخليها حلوة.. قدر ما نفسك تدخل في شي تلقاها قدامك.. وإن قلت داير لك كوز موية.. تلقى البلد كلها جرت على المزيرة عشان تجيب لك الموية.. إن نفسك دخلت في أي شي ما بتتعب تمشي ليهو.. والناس غير نعم وحاضر ما بيقولو ليك شي.. كلمة (لا).. نادر تسمعها.. إن قلت نكتة باااايخة تلقى الشعب كلو يضحك.. وفيهم ناس يضحكو لحدي ما دموعهم تجري شووووو.. والغريبة لو النكتة متلفزة ومنقولة على الهواء.. وإن قلت لهم فلان دا كعب وشين وما عندو طعم.. تلقى البيعرفو والما بيعرفو.. قعدو يكوركو.. كعب كعب كعب.. الناس كلها دايرة رضاك.. والناس الحولك يصوروك كأنك ما بتخطأ وحاشاك الغلط.. وإنت في النهاية بشر ويعجبك الحال وتعيش الدور.. وتكنكش وتمسك في السلطة بايديك وكرعيك وسنونك.. وتجي تخطب في الناس زي ما شايف رؤسا الزمن دا وخصوصا القايمة عليهم شعوبهم.. الواحد يخطب ويقول (نحن لسنا طلاب سلطة.. نطلبها لشنو؟ وهي عندنا.. عوارة هي؟.. وبعدين لو ما الشعب دا حلف علينا طلاق نمسكها والله ما نشتغل بها شغلة.. أيها الشعب النقناق انتو قايلين السلطة دي سمحة؟.. لا والله لا سمحة ولا شتين.. بس نحن ربنا اختارنا ليكم نحكمكم.. وأمر ربنا تقدرو تقولو فيهو شي؟.. ربنا ابتلانا بالسلطة، وانتو ابتلاكم بينا، دحين كل زول يشيل بلوتو ويصبر.. نحن صبرنا على بلوتنا، ودايرنكم انتو كمان تصبرو على بلوتكم.. واسكتو سااااااكت.. ووحات الله زول غيرنا يقدر يحكمكم مافي.. حسي عاينو فيكم كم نفر؟.. كل خشم فيكم داير لو رغيف وداير لو شي يعمّط فيها الرغيف.. أها نجيب لكم من وين؟.. أحمدو ربكم أحمدو ربكم أكلو فولكم ورغيفكم دا واسكتو سااااكت.. حسي عاينو لي ناس الصومال ديل.. الجوع عدمهم نفاخ النار.. حِلة كاملة في رغيفة واحدة.. وانتو الواحد فيكم ياكل لو طبق كسرة بي حالو.. والله داك الليلة مشيت زيارة للصين.. ويا أيها الشعب وما طالبني حليفة.. الناس ديك من شدة ما تعبانين الرُز ياكلوهو بالعود.. الواحد يشيل الرُزاية في طرف العود وياكلها.. ياكل لو سبعه رُزايات ويدشا ويحمد الله ويمشي يشعلق في كُبريهو.. انتو تنقنقو.. تنقنقو.. لكن الحمد الله! ربنا ابتلانا بشعب نقناق..) .. سمعت خطاب علي عبد الله صالح.. في نهايتو بدا كأنو ما داير السلطة.. ورامي طوبتا.. وقال ما عندو مانع يتنازل لي نائبو.. ورجع تاني وقال لهم أنا كان خليت السلطة، انتو بتقعدو ساكت، وتخلو هباشتكم دي؟.. أما النضم القالو القذافي ( أنا ما رئيس أنا لو رئيس كنت رميت لكم الاستقالة في وشياتكم).. خلاني أضرب أخماس في أسداس.. ومرات نص الليل أقوم وأصنقر في العنقريب وأقول يا ربي الزول دا، لو ما رئيس! الأربعين سنة دي.. شغال شنو.!؟