جِــن مجــيّه

في خبر بصحيفة (صوت العرب) اللندنية قرأت عنوان: ( أطباء نفسيون في سيارات الأجرة السويدية لعلاج اكتئاب الشتاء).. تفاصيله:

ستكهولم ابتكرت إحدى شركات سيارات الأجرة في السويد فكرة جديدة تعتمد على وجود معالج نفسي في المقعد الخلفي يقدم خدماته للزبائن ويساعدهم على تجاوز شعور الوحدة والاكتئاب في فصل الشتاء.).!! تركب التكسي.. بس إن قلت “اووووف” ساكت.. الدكتور النفساوي يشب لك في حلقك.. ويسويك في سين وجيم.. واضرب واطرح.. والتخارجك منو ما تعرفها.. يعني الشتاء هناك قاعد يسوي اكتئاب.. ونحن برضو هنا بيسوي اكتئاب.. والجماعة زماااااااان يقولو ليك الشتاء دواهو العرقي (الله ينعلهم وينعل العرقي معاهم).. هو اتاريهو اكتئاب ونحن ما جايبين خبر.. السويديين ديل مدلعين.. نحن في الشتاء اكتئاب وغبشة وشقيق كرعين وشقيق شلاليف وفينا ناس لي عند الجضوم دي قاعدة تتشقق.. ما فينا زول شكا من شي.. الواحد يتمسح بالجلسرين.. (شيييط.. شيييط….شيييط).. لو ما عاينت ليهو ما تعرفو قاعد يمسِّح في كرعيهو واللا قاعد يسن في سكين؟.. يتكبت بالبطانية ويشخر للصباح.. الحرامي يجي ويفل البيت كلو ودا نايم.. لكن صراحة نحن برضو من الجري والشلهتة ورا المعايش ما لاقين فرصة عشان نميّز الاكتئاب من عدم الاكتئاب..!! الغريبة كل زول أربعة وعشرين ساعة تلاقيهو فاتح خشمو يضحك مبسوط.. والبي يكضم مننا بيكضم بي زمانو.. قبال ما يقفل خشمو عديل الجماعة (كركرب) يقفلوهو ليهو ويتلافوهو ويتشالبوهو ويمشو يدفنوهو ويقعدو يتلفتو كايسين للبعدو.. ما عندنا دلع الناس الغنيانين ديل.. اكتئاب ومش عارف شنو؟.. لكن إن قعدنا مع نفوسنا برااااااحة وبي (شفافية) نلقى نفسنا مليانين اكتئاب لمن مدفق.. واكتئاب في كل فصول السنة.. اكتئاب حر واكتئاب سقط.. واكتئاب خريف.. وإن بقينا على نضم السويديين ديل كل واحد ماشي كداري مننا داير ليهو دكتور نفسي يباريهو عشان يعالجو من الاكتئاب والهلوسة والنضم البراهو!!.. بس النافعنا ما بي نعاني من الوحدة.. تلقى البيت تلتمية متر فيهو خمسة أسر.. غير الجيران الداخلين ومارقين بي غرض وبلا غرض.. لازم تلقى زول ينضم معاك.. إن ما لقيت زول ينضم معاك.. يجن كديستين ساكات بعض.. ويتحشرن تحت عنقريبك ويقعدن يتشاخرّن ويونسنك.. لكن صراحة السويديين فوق عديلهم يسوو كدي.. حيث أنه يعتبر متوسط دخل الفرد السويدي من أعلى المداخيل في العالم.. يعني عندهم قروش كوم رز.. وبيهتمو بالفرد.. من كل النواحي.. لكن كدي خلي سويدي يجي هنا.. والله يقدر لو يركب باظ الوالي.. عشان بدل معالج نفسي في الكنبة الخلفية.. يتلفت يلقى تلاتة مجانين وراهو.. وكل واحد هايم في دنيا براهو.. ولما يرجع السويد يكون داير دستة معالجين نفسيين في التكسي.. عشان يقعدو يسوطو فيهو باقي عمرو كلو.. وقطع شك البتدخل فيهو ما بتمرق بالساهل!!.. علي بجملة الليمان نحن رجال.. ضكور على أناتي!!.. نحن كان ما رجال البلد كلها ترقص وتغني وتكورك (إن شاء الله أجن.. وأزيد في الجن).. والسويديين اكتئاب الشتاء ما قادرين يتحملوهو..!!