> قالوا ايه
> دايرين كشف منشطات
> منشطات بالنا ؟؟؟
> منشطات منو ؟؟؟
> منشطات ليه ؟؟؟
> منشطات انتو
> المريخ لا يعرف المنشطات
> طول عمر المريخ لم يقبض بالمنشطات بالثابتة
> شوفوا الانقبض بيها ودولياً كمان منو
> الانقبض بيها في تونس منو ؟؟؟
> ويا ريتها لو جابت «شربوت» تامزينو
> بالمنشطات وبالثابتة
> والعودة كالعادة صفراً دولياً حير مجلس الامن ذاتو
> منشطات نحنا ؟؟؟
> منشطات اتو
> الشفتوهوا يوم نهائي السودان ده ما منشطات
> ده تقل حركة من دباباتكم الفي النص ديل
> نزار ونيلسون ونصر الدين
> تقااااااااااااااااال
> والغريبة التلاتة بالنا
> يظهر التدخل الصحفي في التشكيل بتاعكم اليوم داك
> كان تدخلاً صحفياً يهتم بموسيقى النطق
> قام خته تشكيلة النص فيها ببدأ بالنا
> دبابات بس
> تقاااااااااال
> ياخ ديل عاملين حيطة لي ضربة غير مباشرة
> وشدة ما تقال
> الكورة ماشه تحت رجلينهم
> لما جات لي راجي
> راجي دردقها تحت رجلينهم تاني
> لي اسي ما شافوها
> تقال تقلة شديدة خلاس
> التقلة دي سبب هزيمتكم
> لا منشطات ولا شرائح موبايلات
> عيبكم يا ناس
> المنشطات والمسكنات
> طوالي تبدوا تبلعوا جماهيركم في المسكنات
> اشتكينا فيتا
> وديناها الفيفا
> الفيفا وعدتنا
> مصدر ضليع قال بنكسبها
> وجماهيركم تتخدر
> بلاتيني يرشح الهلال للقب الابطال
> وتسكنوا
> وجماهيركم تتسكن
> اسي اديناكم تلاتة قلتوا كيف البلنت يشوتها سيسيه
> والبلنت التانية يسويها سيدي بيه
> اها سيسيه وسيدي بيه
> دي واحدة من تشكيل التدخلات الصحفية
> دي موسيقى صحفية ظااااااااااهرة
> يشوتها سيسيه
> يعملها سيدي بيه
> نحنا مالنا يا نااااااااااس !
> لكن خوفكم من الجايه واعترافكم بالهزيمة
> خلاكم تبلعوا في المسكنات قبل الألم
> وقمتوا كتبتوا لي روحكم روشتة المنشطات
> شوفوا بتوع المنشطات مين يا حلوين
> الكتل عنتر بكتل عبلة
> المرة دي اشتكونا للامم المتحدة
> أيها الناس
> إن تنصروا الله ينصركم
> أها
> نجي لي شمارات والي الخرتوم
> كان شفت يا والينا
> قبلانين باي شي بس قول للايبولا اختينا
> لا عندنا قدرة علاج ولا عندنا لياقة تحمينا
> وكان لا قدر الله جات علينا ما بنلقى البتاوينا
> لذا ولذلك وكذلك طالبين منك توعينا
> ندوات وملصقات ومحاضرات تورينا
> عشان نتعامل بوعي مع الحالة يا والينا
> ولو حولتوا ميزانية الانتخابات لحملة صحية تصححنا وتفهمنا وتوعينا
> يكون كتر خيركم يا والينا
> عافين ليكم اعفوا لينا
سلك كهربا
ننساك كيف والناس مشغولة بالانتخابات والايبولا ناس يقولوا جات وناس يقولوا ما جات… موت الجداد
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
