الغرز.. نشابو

سهم كيوبيد: تلقو في كروت الزواج.. وكروت المعايدة.. وكروت الحب.. شافع عندو جناحين وشايل سهم (نشاب).. أها الشافع دا كيوبيد ذاتو.. كيوبيد في الميثولوجيا الرومانية هو ابن الإلهة فينوس (إلهة الجمال).. يعتبر كيوبيد إله الحب.. والسهم الشايلو دا سهم الحب.. أي زول ينيشو بيهو يروح فيها حبا وهياما.. عشان كدي الناس يقولو ليك صابو سهم الحب.. وأصدقائي من عشاق الزمن الجميل كانو بيكتبو الخطابات الغرامية وينتهي الخطاب بقلب داخل فيهو سهم والقلب مقدود وينقط دم.. دليل على الإصابة بسهم الحب أو سهم كيوبيد.. كان العاشق منهم يكتب أول حرف من اسمو يمين القلب.. وأول حرف من اسم المحبوبة في يسار القلب.. والقلب ينقط دم.. وهو يشحد في الله.. إن شاء الله دمو يصفا يعدم اسم النقيطة.. وبرضو نحن مع خلق الله غنينا لسهم كيوبيد:

الغرز نشابو..

شايلة قليبي وين ماشة بو

يا السمحة..

الغرز نشابو..

يكون الشاعر هنا قاصد بالغرز نشابو.. (غرز سهمو) قاصد كيوبيد.. وإن كان ما بيعرفو باللسم.. بعيدا عن سهم كيوبيد وعن الرومان.. وعن غرز النشاب.. علماء الكيمياء والبايلوجيا قالو في مادة كيميائية مسؤولة عن عاطفة الحب.. وهي البتخلي المحبين يطرطشو ويتبهلدو.. المادة دي اسمها (فينيل ايثيل امين).. مادة موجودة في جسم الإنسان.. وبرضو في الطبيعة موجودة في (الشكولاتة).. تكون المادة مرتفعة في العشاق في أيام التعارف والخطوبة.. وقالو إنها بتقل تدريجيا بعد الزواج.. لحدي ما تصل مرحلة إنها تجيك رسالة تقول ليك.. (إن رصيدك غير كافي لاستمرار الحب).. لذلك أعزائي الأزواج.. عزيزاتي الزوجات.. حاولو تعيدو تشحنو رصيدكم من الحب كل مرة بالشكولاتة.. لرفع نسبة مادة (الفينيل إثيل امين).. وتعيشو لحظات الحب القديمة.. جربو ولو ما استفدتو ما ح تخسرو حاجة (دي ما دعاية للشكولاتة).. ولكنها دعوة كيميائية لتجديد الحب الذي خفت.. أنا عارف الشكولاتة غالية لكن من أجل الحب يرخص كل غالي.. لكن عليكم الله اكلوها باعتدال.. ما تكترو منها يقوم الحب يتّلّحكم وتقعدو تصاقرو بعضكم وتخلو شغلتكم وأكل عيشكم..!! أها الشكولاتة دايرة دفرة شوية لاستمرارية الحب.. بعض الرجال صعبة عليهم قولة (أحبك) لمرتو.. عشان كدا ممكن يعبر عنها بطرق مختلفة وبسيطة وما تكلفو حاجة.. غير شيل الشفع.. و(وريق الخدرة في الميثولوجيا السودانية).. ممكن مثلا لا حصرا:

يصلح ليها لياقة البلوزة وهم مارقين.. (لو البلوزة عندها لياقة)..

يرجع ليها خصلات شعرها لو شعر إنها طالعة شوية برا..

(يعني ما يخبت الكتف وهو بيشيل في الشعر) يلقط باقي الشعر لو في.. من كتفها بصورة رقيقة ولطيفة..!!

لو لابسة خمار.. وجاي ورا كتفها غير منسق يساعدها في أن يعدلو ليها من غير تقول ليهو..

يقيف ويقول ليها.. (يا الله.. التوب دا مطرز عشانك إنتي وبس.. ولبس التوب يخلوهو ليكي).. حتى لو كان التوب مشدّر وبي 120 جنيه من سوق ليبيا..!!