“””””””””””””””””””””””””””””””””
عاطف خيري عندو في حكاية المطرة دي (شفع) جابهم من وين ما عارف؟
“”””””””””””””””””””””””””””””””””
هدف بكري المدينة هدف زول ضرب الشيات ..شوف عيني (صحن الشية) كان حايم في رأس خط 18
“”””””””””””””””””””””””””
الغريبة والشيء المدهش حتى المدارس فتحت بعد هدف العقرب الذي سجله في الشباك النيجيرية
“””””””””””””””””””””””””””””
بعد (اجازة) العيد التى امتدت لاكثر من (تمانية) ايام ..سيول وامطار وتقفيل مدارس قرر بكري المدينة ان يعيد الناس الى مزاولة اعمالهم بحيلة ذكية…وفكرة جديدة.
هدف بكري المدينة دا مفروض يجيبوه في (جغرافيا) سنة خامسة …(او المستوى الخامس).
هسع الجماعة ديل بقولوا شنو على (الصف الخامس).
زمنا نحن كانوا بقولوا عليه الصف الخامس.
هسع ما عارف (الصف الخامس) بقى كافتريا ام مول؟.
ما عارف (الدراسة) بقت تجارة.
ما عاوز ادخل بيكم في حتات (كئيبة) شوية.
الناس راجعة من العيد.
هدف بكري المدينة رجعها.
كلام الحكومة خلوه.
بكري المدينة قال شنو؟.
بكري المدينة قال الناس يرجعوا شغلهم ..خلاص كفاية عطالة.
الناس ديل وقت يمشوا الاقاليم تاني ما برجعوا بالساهل.
إلا تجيبوهم كدا بي هدف بكري المدينة.
الايامات دي الجو خريفي ..والطرق مقفلة.
وصراحة كدا الجو دا ما جو خرطوم.
دا جو اقاليم ساكت.
في الاقاليم طبعا شاي المغرب بجيبوه ليك من (العصر).
شاي الصباح في الخرطوم بعادل (الفطور) في الاقاليم.
في الاقاليم الاوضاع لسع على ما كانت عليه.
ناس الاقاليم ما بجروا (الساعة).
يجروا الساعة كيف؟..وهم شغالين بالضل.
كمان عاوزين تجروا ليهم (الضل).
الاقاليم بي خيرها.
ما زي الخرطوم الواحد عشان يقطع ليه (كبري) ساكت عاوز ليه ربع يوم.
انتوا (الكباري) دي عملتوها عشان تأخرونا؟.
كباريكم دي عاوزة ليها عمر براها.
الواحد عندو كم عمر عشان يضيع سنوات عمرو في كباريكم دي.
قالوا ليك طالب جاء من الاقاليم عشان يقرأ في الجامعة.
الطالب (13) سنة ما اتخرج من الجامعة.
اهلو سألوه قالوا ليه انت تعال هنا بتقرأ ليه (13) سنة في الجامعة الناس كلها بتقرأ (4) سنوات او (5) سنوات مع الامتياز او (6) سنوات طب.
الطالب قال ليهم : اعمل ليكم شنو الخرطوم دي عاوزة ليها (4) سنوات للجامعة و (9) سنوات بتروح ساكت في (قطع) الكباري.
واحد فصيح ولديح وما بفوت حاجة ..قال ليه والله يا ولدي الصينيين العملوا الكباري دي ..ما اخدوا فيهن الوقت دا.
معقولة قطعكم للكباري وتعديتكم لها عاوز ليه وقت اكتر من سواة الكباري نفسها.
حيرتونا وقطعتوا كهربة حواسنا.
اضرب لي اي زول الساعة اربعة ح يقول ليك كلمة واحدة.
ح يقول ليك : (الكبري مقفول).
يقفل نفسك.
في ناس بتظارفوا طبعا مع (الكبري المقفول) بقولوا ليك : (الليلة شكلها ح تكون في مطرة).
السما شايل.
ما عارف علاقة المطرة بالكبري المقفول شنو؟.
يمكن عشان الناس من تشوف السماء شايل بحاولوا يطلعوا ويتخارجوا تقوم تحصل (زحمة) في الكباري.
عشان كدا علاقة المطر بالكباري المقفولة ما تهملوها.
بعدين نحن ما عندنا حاجة ساكت.
نحن اي حاجة عندنا بي نظام.
عاطف خيري عندو في حكاية المطرة دي (شفع) جابهم من وين ما عارف؟.
عاطف خيري قدر يطلع (شفع العيد) من الغرف ويدخل (المطرة).
المطر في السودان عندها قوة عين غريبة بتدخل كل الغرف زي ما قال عاطف خيري.
عاطف خيري مهم في الحتة دي في حاجات بتكون رايحة مننا.
في حاجات بنعرفها بالوصف.
او بنعرفها بـ (عاطف خيري).
نقعد نوصف في (دواخلنا) لمن نصل.
او نطلع في اول شارع.
فكان ان سجل بكري المدينة هدف (شقلوباني) كدا زي الزول البسأل ليه من بيت في الحلة.
زول غريب ..بسأل اسئلة غريبة.
ناس كامل عندهم بنت خطبوها.
وحسن ود التريعي ولدو رجع من ليبيا.
والفاتح عمل ليه (طبق)..وبقى يحضر (زي افلام).
يحضر ليك في الافلام الهندية لمن الفاتح ذاتو بقى (نهي كابور).
زول صعب.
وافكارو غريبة.
الافكار الغريبة ليس بالضرورة ان تكون غريبة فعلا الموضوع بقى ما محتاج.
عشان الناس في حد ذاتهم بقوا (غريبين).
الطحنية دي فيها حاجة.
الطحنية دي غريبة.
مرات وقت تكون عاوز طحنية بتمشي تسأل منها في الدكان ما تلقاها.
وقت تكون ما عاوزها بتلقاها.
دي ما غرابة.
تشرطوا في (عيونكم) متل صفائح الطماطم.
هدف بكري المدينة في مرمي المنتخب النيجيري كان (غريب).
الغرابة فيه واضحة.
او بالواضح كدا وبي التفسيرات حقتنا دي هدف بكري المدينة هدف زول ضرب اللحمة صاح.
ضرب الشيات ونفض ليك كوارع الخروف في الليلة الختامية للخروف.
باقى وقت اللحمة تنتهي ..اللحمة في حد ذاتها بتبقى طاعمة وحلوة.
والناس بقوموا يراجعوا الحاجات الكانوا بترافعوا عنها في الايام الاولى للضحية.
في اول يوم في العيد ما في زول بمشي ليه على (كرشة) او مصارين او كوارع.
حتى (رأس الخروف) بترافعوا عليه.
العفة كاتلاهم.
بعد اللحمة ما تنتهي الناس بترجع تكابس في الحاجات التى كانت مرفوضة في الايام الاولى للعيد.
حكمة الله الحاجات دي بتبقى اطعم من اللحمة ذاتها والناس بتأكلها بي نفس وشراهة اكتر من شراهتهم على اللحمة في اول يوم.
هدف بكري المدينة هدف زول ضرب الشيات ..شوف عيني (صحن الشية) كان حايم في رأس خط 18.
والكدايس تطلع وتدخل الكدائس دي من تشم ليها حاجة تقعد تتحاوم فينا زي (اللجان).
الطبع الكعب ظاهر في الكدائس.
ناس خليل عندهم كديسة بتولع البوتجاز تسخن اللحمة وتضربها ليك.
يا ربي (الكدائس) عندهم (لجان) زينا.
ولجان منبثقة.
وقناة النيلين.
وتحويل الطبق.
وناس بحللوا كدا في القنوات الرياضية.
غايتو لو بقى عندهم (تحويل طبق) زينا تكون الكدائس دي لا كدائس ولا حاجة.
عليك الله اطلع لينا من موضوع (الكدائس) دا.
جبت للفئران (نفسيات).
المهم خلاصة الموضوع هدف بكري المدينة دا هدف زول شبعان.
ضارب لحمة.
بتاعين الدوريات الاوروبية كلهم قاعدين يتفرجوا في الهدف ..وبكري المدينة يلف بطريقة دائرية وهو في وضع (الطيران) ويسجل هدف.
هدف لفتة.
وجماعتنا ديل واحد منهم جاء من الدوري الانجليزي ..وواحد من الدوري الاسباني وواحد من الايطالي وواحد من الفرنسي.
وبتفرجوا.
بتتفرجوا على شنو؟.
قوموا يلا امشو اهلكم.
ارجعوا اوربتكم.
ان شاءالله اوروبا تنفعكم.
بكري المدينة لمن يضرب (اللحوم) دي ما في زول بثبتو.
ولا بتقدروا عليه.
هو بكري المدينة دي بدون لحوم بجهجه ليكم في الباكات تتخيلوه وقت يضرب اللحوم يعمل شنو؟.
الناس كانوا (مرخمين) بعد اجازة العيد.
كلهم كسلانين ..وما قادرين يرجعوا يمارسوا اعمالهم تاني.
الى ان جاء بكري المدينة ورجع ليك الناس الى ممارسة نشاطهم العملي.
الغريبة والشيء المدهش حتى المدارس فتحت بعد هدف العقرب الذي سجله في الشباك النيجيرية.
الطلبة قالوا ما برجعوا.
قالوا في مطر.
ولاية الخرطوم عودت الطلبة على ان تأجز ليهم وقت تكون في مطرة.
علاقة المطرة بالعطلة شنو؟.
الكلام دا ما بحصل إلا في السودان.
تمطر يقفلوا المدارس.
تكركب يقفلوا المدارس.
ترعد يقفلوا المدارس.
مدارسكم دي بقت زي (الطبالي).
مطرة خفيفة تقفلها.
بكري المدينة الحاجات دي ما بتنفع معاه.
ولا بتخارج.
ما تقولوا لي بالنص.
ترجعوا مدرستكم طوالي.
وتباشروا اعمالكم من صباح اليوم.
خلاص كفاية.
قوموا شوفوا شغلتكم.
ما شفتوا بكري المدينة سجل ليه هدف كيف؟.
هدف زول حايم ببارك على الناس في العيد.
……….
ملحوظة : انتوا الخريف السنة دي حدو وين؟.
هوامش
بكري المدينة طاقة جبارة.
اي مدرب ذكي يلقاه ممكن يطلع منه اخطر مهاجم.
الدفاع النيجيري بقى يشتت في الكورة ويطلع فيها في الكورنر والجدعات.
اتبهدلوا في الدنيا دي جنس بهدلة.
حالتهم بقت صعبة.
مهند الطاهر لعب مباراة كبيرة رغم الغياب والابتعاد إلا انه كان في الموعد.
مازدا اعاد الثقة الى مهند الطاهر الذي عاد بكل ذلك التألق.
عماري كان من نجوم المباراة.
وكذلك كان علي جعفر نجما والشغيل وامير كمال.
اما المعز محجوب فقد اثبت انه (اسد) في كل لاحوال.
الاسد عمرو ما يبقى ارنب.
عادل امام طبعا بقول الارنب عمرو ما ببقى اسد في (الود سيد الشغال).
الريح رغم الاصابات التى تعرض لها إلا انه تحامل على نفسه واكمل المباراة بفدائية.
المنتخب يحتاج لدعم الدولة.
…………….
عاجل : في ريحة (شية) جمر.
[/JUSTIFY]
وإن طال السفر – محمد عبد الماجد
صحيفة قوون
مقالات ذات صلة
-
-
-
-
-
-
-
-
