القـــــــرنتيـة

كل من زاد وزنه.. وأصبح سمينا.. أصبح قرنتية.. اقحمت القرنتية نفسها في ثقافتنا.. وفرضت وجودها فيها لمشاركتها لنا الأرض والماء والكلا.. قال الشاعر:-

بريدك يا القرنتية..

بريدك سااااهي زندية

.. هذا الشاعر المكلوم.. يرى في محبوبته شبهاً من الأستاذة القرنتية.. عشان كدا هو بريدا.. ريدة بالقوة.. خوف منها.. واتخيلت أنها خانقاهو في ركين وعاصراهو على الحيطة.. وتسال فيهو( بي تريدني واللا ما بتريدني؟).. فيرد هو (كدي فكي رقبتي شوية..) وبعد ما فكت رقبتو قال ليها (بريدك.. ) ولما اختلى بنفسه وأحس بحجم الكارثة.. نظم هذه الأبيات التي قعدت ليهو.. هو..وقرينتيتو.. لي جنا الجنا.. شاهدة على علاقة غير متكافئة جسديا بين قرنتية وابو الرقيع.. القرنتية هي فرس النهر.. وأهلنا في الشمال بي يقولو ليها (العيسيت).. القرنتية ضخمة الجثة يصل وزنها الي تلاتة طن ونص.. لما اشوف الوزن دا احس بتعاطف شديد مع شاعر معلقة القرنتية.. ولو أي زول زنقتو الأخت شبيهة القرنتية وسالتو نفس السؤال المصيري والمفصلي (بي تريدني واللا وما بتريدني) عشان يخارج نفسو يكابس يقول لها (بريدك) قبل ما تمد ايدها وتخنقو..يقول الناس ان القرنتية لما تمرق من الموية.. جسمها بي يتشقق ويكب دم.. النضم دا ما صاح.. القرنيتة بتفرز سائل لونو أحمر وآخر لونو برتقالي.. وبعد فترة يتحول السائلان إلى اللون البني.. وشكلو يبقى زي الدم.. السائل دا بيعمل عمل المرهم.. ضد اشعة الشمش.. وخصوصا الأشعة فوق البنفسجية.. يعني دا مرهم جاهز لبنياتنا عشان يحميهن من الشمش.. باكر دي القى الخرتوم جت مجلبطة بيهو.. وكلهن يبقن قرنتي.. من السائل القرينتاوي دا بالتعاون مع حبوب الشحن.. فتراهن يدردقن في شوارع العاصمة وضواحيها وعلى نسوان الأقاليم مراعاة فروق الوزن ويمسكن رجالن عليهن.. ونقيم معرضا لهن مفاخرين بهذا الفتح المتين.. بارض القرنتي ببري.. القرنتية تلد غالبا مولودا واحد فقط.. وهي من الحيوانات التي تؤمن بمقولة (النوع قبل العدد) في الولادة.. وزنو يكون من خمسة واربعين كيلوغرام إلى ستين كيلوغرام.. النوع قبل العدد نوع يكون قوي ومتين.. مش زي الكلاب الما عندها طبع.. الكلبة تلد تملا السهلة جريوات نصهن معولقات وملولوات.. وعميانات يتبنن.. القرنتية بتلد وهي جوا الموية.. يعني أول ما بطنا توجعا,.. تقع البحر.. وتقعد فيهو لحدي ما تلد.. يمرق الجنا القدر الهجيمة دا.. ويعوم يرضع.. يمرق نخيراتو واضيناتو وعويناتو برا الموية ويغتس تاني يرضع.. ويمرق تاني.. وتاني يغتس يرضع.. القرنتية لو فتحت خشما كبير زي البي تشهق.. ما بتكون بتشهق.. أخاف انتو قايلنها بتشهق؟.. ما بتشهق.. دي اشارة لوجود خطر وتنبيه باقي أخوانا وأخواتا من قرانتي.. القرنتية مكجنة الزحمة.. لما يكتر القطيع ويكون أكبر من الواطا الإقليمية بتاعتهم.. القرنتيات الكبار يقتلّن الصغار.. عشان يعيش باقي القرانتي في بحبوحة.. وأخير يموت التلتين والتلت الباقي يرطب.. النضم دا يا ربي سمعتو وين؟!!