أم الملك عزبا

استرعى انتباهي الخبر التالي (تشريعي الخرطوم يطالب بتقليل الغناء والشِّعر بالتلفزيون).. غايتو أخدت محيّنة صغيرونة.. ودخلت الشبكة مرة تانية وقريت تفاصيل الخبر.. إن ناس المجلس ديل قالو الغنا كتر والشعر كتر.. والله صدقتو.. الشاعر يمرق من أهلو يلبس بنطلونو.. ويمشي القناة يقول لهم أنا شاعر.. “شاعر؟”.. ايوا.. أسمعكم حاجة؟ لا لا يا زول مصدقنك تب.. سمّع المشاهدين.. يا أستاذ فلان عندكم شنو بعد الإعلان؟ الإعلان دا ما تلعبو فيهو يا جماعة.. اكل عيشنا منو.. يرد الأستاذ” فاضيييييين ما عندنا اي شي من قبيل متمحنين نملا الوقت الفاضي دا بشنو؟ “خلاص جايكم الشاعر الفحل دا.. دخلوهو يشعر فوق الناس ديل.. اعصروهو ما يمرق منكم ساكت.”.. يدخل الشاعر.. يشلّق فوق ويعاين مسااااااافة وهو رافع رقبتو.. لمن أنا أشفق أقول الزول دا نعل رقبتو دي ما يبست علي كدي؟.. حتين بفضل الله يدنقر تحت.. يستعدل ثم:-

بتنفسِك.. بتنفسِك شيشة

بلوكك لبانة وبقرضِك عيشة

وريدتي ليكي اصلو ما بتتغير

كان بقيتي جنبي واللا مافيشة

وكلو من نوع دا.. ناس تجي كاتمة نفسها من أهلها تقابلنا في القناة وتقعد تتنفس.. ونحن مساكين نعاين.. مرة نتخيلو نايم ماسكو اب كباس لا قادر يكورك ولا قادر يتنفس ونقول نساعدو نتصل عليهو نقول ليهو ما ترقد وتنوم وراسك مقابل خشم الباب.. أما إذا سألتم عن الغنا السادة اعضاء المجلس التشريعي.. باقي لي البلد دي جت بقت فنانين.. أمرقونا أنا وانتو ديل بس.. وبصراحة وبكل شفافية “نعل الشفافية دي، ما قاعدة تقوّم عليكم الحساسية؟ باقي في ناس كتار بتسوي ليهم حساسية وفي ناس أزمة عديل” أنا ما ضامن نفسي الليمات دي نفسي بقت صغيرة علي الغنا.. غايتو كل مرة ابدا لي غنية وانهرها بمدحة ولاد حاج الماحي “يا نفسي توبي من المعاصي.. راجيك الحساب يوم القصاصِ”.. أيها السادة التشريعيون.. الحكاية ما حكاية شعر ولا حكاية غنا.. الحكاية انها طاااااااااالقة.. مافي الإعلام بس.. في كل شي.. حسي انتو ديل صلاتي علي النبي فيكم كم عضو؟.. أها كان كل واحد فيكم.. عندو ود أختو واللا ود اخوهو نفسو محدساهو وقال بيغني.. ومشى لي ناس القناة وقال لهم أنا خالي فلاني الفلاني.. طوالي يخلوهو يغني عشان خالو ما يزعل.. وإن شاء الله المشاهدين يعدمو نفاخ النار!! أها عاينو ليهم ديل كم فنان؟.. دا غير مقدمين البرامج يمرقوهو من المدرسة ويقولو ليهو القراية ملحوقة نحن حسي مغرودين فيك.. ويقابلنا وضحوية كاملة يقعد يتهجا في كلمة تكنلوجيا.. لمن نشفق عليهو، انو الكلمة دي ما تخنقو و يدخل في غيبوبة!!

(كل فضائياتنا لو لموهن علي بعض ما بيجيبو نص فضائية.. عشان كدي لموهن كلهن في فضائية واحدة.. وريحونا وارتاحو انتو.. والله بتوفرو قريشاتكم دي وبتنفع في شي تاني.. إن نفعت ناس غسيل الكلى.. مالو؟ كعب؟)!!!