قال لي البهلول

* أغرب حاجة في البلد دي، يجففوا المستشفى المركزي، ويتركوا البرك والمستنقعات.!!

* ألذ حاجة في البلد دي، تمشي لصاحب مزرعة أبقار.. ويجيب ليك شاي بلبن بدرة.!!

* السودان منتظر دعم لإغلاقه المركز الثقافي الإيراني، وقد فصل ثلث الأرض والسكان.. وما نال دي.. (أشَّر نحو سِنِّه).!!

* 500 ألف رأس من الأضاحي لعمال ولاية الخرطوم.. قولوا 500 ألف رأس من الأضاحي للضحايا بتكون أبلغ.. تصدق يا إنت يكلمني – العمال بعد الضحية ضحايا.. وفلسهم الضحَّى.!!

* قالوا في تمساح خطف ليهو زول عند شاطيء النيل الأزرق في الخرطوم.. أنا مصدق الموضوع ده.. لكني كضبت زول قال لي شفت ورل في مشروع سوبا.. بلداً كلها تماسيح.. الورل بقدل فيها كيف.؟

* في واحد صاحبي، كل مرة يغترب يجي راجع فاضي، وتاني يغترب.. لا خلا الاغتراب ولا خلاهو الفضا.. قلت ليه متين حا تخلي حاجاتك دي؟.. قال لي: لمّا الاتحاد العام يخلي مازدا من تدريب المنتخب.!

* أمس شايل الجريدة وبحضر في حفلة.. الجريدة قالت إنه الحكومة أبعدت 50 متسولا من السودان لبلدانهم.. والفنان يغني.. أديني رضاك.. وحني عليّا.. لو كان أجنبي كان أبعدوه.. هو التسول ده إلا قروش.!!

* أمس جلدت ليك ولدي جلدة كاربة.. تصدق ما عارف سبعة زايد سبعة كم؟.. قال لي واحد.!!

* تلفزيون السودان عمل قناة للدراما تصدق.. كلها خمستاشر مسلسل.. أمس حضرت مسرحية للفاضل سعيد قال فيها.. (أمي بتبيع البيض وتشتري ويكة) الله يرحمو.. حضر زمن استوردوا خرفان من أستراليا والحمري يقول يا ليل.!!

* أمس جارنا سمعتو يقول لولدو.. ما تتحرك شوية.. إنت ماكل لحم حمير.. أنا شفت جارنا واقف في الجزارة البتبيع لحم الحمير.. يا ربي عارف.!؟

* إنت عارف الصادق المهدي متحرك الأيامات دي ليه؟.. فاكرها سنة 1984 والانتفاضة السنة الجاية.. الناس دي مجلية 30 سنة.!!

* أمس قريت خبر عن استعداد السيسي للحوار.. والله ما عرفت سيسينا وللا سيسي مصر.. ما تفرق بينهم إلا بالدوحة.. ده ما دايرها وداك دايرها.!!

*الله يلعن الكدايس.. بيتنا مليان منها.. وغرفتي عنبر ولادة.. الله يسلط عليهن مأمون حميدة.. ويقول لحمهم كويس.!!

* طقسنا بلا ربيع.. ربيعنا مسخن.. شوف ربيع عبد العاطي.!!

* أمس أولادي قالوا ماشين مول الواحة.. قلت ليهم (مولوا بغيظكم).!!