في اللخبار شفتا: ترحيل سبعة وأربعين شحادة.. إلى بلادهم..”بالطيارة” .. شفتهم في قناة (الخرطوم) الفضائية.. ركبن الطيارة، باللوال كنت قايلهم أول فوج من حجاج بيت الله الحرام.. بعدين من البرنامج عرفت إنهم شحادات تم ترحيلهم إلى بلادهم بواسطة الشؤون الاجتماعية.. واحدة تهرج وتنضم بإيديها رافضة قرار الترحيل الجائر.. واتخيلتها بتقول ليهم: “كاشننا ومسفرننا؟؟ ما تسفرونا كان مسفرننا؟. إنتو قايلين نفسكم شنو؟.. إنتو قالين نفسكم السعودية؟.. وتسفرونا عشان قاعدين نشحد عندكم.. أحمدو ربكم إنتو لاقين..؟ أن تنالو هذا الشرف؟ّ.. أثار انتباهي.. وجود شفع معاهم وأطفال صغار.. وما شفتا أي راجل معاهم.. ما جعلني أتساءل.. الشفع ديل تبعهم واللا تبعنا؟.. طيب رحلتو سبعة وأربعين شحادة.. وتمانين في المية من سكان السودان تحت خط الفقر.. يعني هناك حوالي عشرين مليون شحاد تحت الإنشاء.. غايتو جهزو طياراتكم.. وشيلو وارمو البحر.!!
قريت في اللخبار: (وزارة التربية والتعليم في الخرطوم تقر بضعف اللغة الانكليزية).. الاعتراف بالخطأ أول الطريق إلى التصليح والإصلاح.. ما دام الحكاية اعترافات كمان دايرنكم تعترفو إنو “تربية ” مافي.. لأنو “الواتساب” ما مديكم فرقة تربو.. لا إنتو ولا أولياء أمور الطلبة.. المصيبة إنو حتى الكبار ديل قاعد يعيد في صياغة تربيتهم.. وح نبقى (الكبر بي جهلو واااااا شقاوة أهلو) شقاوة أهلو إن بقو على قيد الحياة.. أما التعليم برضو محتاجين اعتراف بأنو “تأليم”.. مصاريف.. ومصاريف ومصاريف.. الشافع من يدخل المدرسة ويتخرج من الجامعة ويقعد عند أهلو بلا شغل.. ولو اشتغل خمسين سنة بايدهو وكرعيهو ما بيغطي الاتصرف عليهو.. أما ضعف اللغة الانكليزية يا ناس الوزارة ماهي براها.. حتى اللغة العربية ضعيفة مع تفوق وااااااضح في لغة الراندوك.. وإتقان للغة الجسد.. أكنكم شوفو حفلة تخريج، حت من أمو.!!
سمعت في اللخبار: فنانة مشهورة.. قالو راجلها مات.. بعد شهرين تاني راجلها مات.. بعد ستة شهور قالو مات.. بعد أربعة شهور مرقت من الحبس عشان راجلها مات.. “ما بعرفو المشبكها في الراجل الجنو موت دا شنو؟”.. تاني قالو ختبوها.. سكتنا.. تاني برضو ختبوها.. سكتنا.. نضمت هي.. ” قالت ما في زول عندو دخل بيختبوني وللا يعرسوني”.. قلنا سمح.. جات تغني في حفلة وتكاوي في الناس في غنية وتحك في أصبعها.. “واتخطبنا.. واتخطبنا.. واتخطبنا”.. عشان زول ينضم وهي تقعد تهرج.. لكن أصلو مافي زول يهببو ليها، نشوفها دايرة تسوي كيفن..!؟
في اللخبار: شايل هم شديد في شان لي أكتر من خمسطاشر يوم ما سمعت بي فنان جديد ظهر.. نعل البلد ما فيها عوجة..؟
في اللخبار: ما بعرفو، طشاش عيون، وللاّ عمى بصيرة؟.. بقيت أشوف (سبعة زايد سبعة) اللت الحوار الوطني.. بقيت أشوفها ( سبعة ناقص سبعة).. اللهم اجعلو خير.!!
[/JUSTIFY]الباب البجيب الريح- صحيفة اليوم التالي
