> بطولة الممتاز تسعى الينا
> لاننا نشرفها جداً
> على الاقل كاس الممتاز بقعد جمب مانديلا
> وحولو تلاتة سيكافات حلوات
> وبي جاي دبي وبي هناك الشارقة
> بطولات بالهبل يقعد وسطها
> هوشة حريم ونعمة كريم
> عندنا الممتاز ما بشوف وحشة
> اخير ليهو هنا ولا هناك ؟؟؟
> هناك يقعد مع منو ؟
> مع المستكاوي ولا كوم الشكاوي ؟؟؟
> بقعد براهو في الخلا داك ؟
> المرفعين بياكلو
> لذا يسعى الينا كاس الممتاز
> ونحن نسعى اليه بي عرقنا
> بدون تدخلات ولا مساعدات ولا ظلم ولا ظلمات
> ولان التحكيم اعتاد ان يخطئ ولا يظلم
> وحتى نؤكد حكاية لا يظلم دي
> حقو نحمي فريقنا شديد
> إدارياً نحميهو
> وجماهيرياً نحميهو
> نلتف حولو في الميدان
> في امدرمان وفي شندي وفي الفاشر وفي اي مكان
> مستوانا يؤهلنا للاحتفاظ بالممتاز
> برانا بنعرف مستوانا يا ناس
> ولكن ان تتدخل اقدار يقدرها بشر او اياد اخرى تتدخل لتغير في المسار المنطقي
> فاننا لن نقبل ذلك
> ومن مصلحة تطور الكرة عندنا النزاهة في ادارتها في المكاتب وفي الملعب
> ومن مصلحة تشريف الكرة السودانية ان يمثلها من يستحق التمثيل
> موش بالمجاملة نؤهل زول ويمشي يمثل بينا بدل يمثلنا
> ومن مصلحة استقرار واستمرار الموسم الرياضي ان تتحقق العدالة الكروية
> أيها الناس
> قون الخرطوم التاني في شباك الهلال نقضوهوا ليه ؟؟؟
> الكورة ذاتها ما عارفة ليه
> حتى الصافرة التي انطلقت لتنقض الهدف الخرطومي التاني الصحيح
> ما عارفة هي انطلقت ليه
> انطلقت وبس
> أيها الناس
> اعطاء كل ذي حق حقه يحقق التطور والاستقرار والاستمرار والظهور على منصات التتويج الدولية
> المهم
> الجماعة كايسين ليهم فرحة
> الحزينة دايرة تفرح
> جات الحزينة تفرح
> في المطار ما لقتلهاش مطرح
> وفي الجويات ما لقتلهاش مطرح
> وفي الانجازات الدولية ما لقتلهاش مطرح
> قامت قالت لاي سبب بفرح
> ففرحوا لسبب ما بفرح
> وعملوا منو هيلمانة
> سجلوا خمسة لاعبين في فريق السلة
> تلاتة منهم أساساً لاعبينهم
> واتنين آخرين
> واحد مشطوب من المريخ قبل اربعة سنين
> قالوا انتزعوهوا من المريخ
> وواحد موقوف لسوء السلوك من المريخ ومن الاتحاد سنتين
> قالوا ضربة موجعة للمريخ
> يعني اسي لو سجلنا كندورة بكون ضربة موجعة للهلال ؟
> كم اعمار الخمسة يا رمضان ؟؟
> اقسم بان احدهم تلاتة واربعين
> ووالله فيهم واحد سجلتو انا في المريخ سنة سبعة وتسعين
> يعني قبل سبعطاشر سنة
> لما سجلتو قول عمرو عشرين بس
> يعني الليلة عمرو سبعة وتلتين
> قال ضربة موجعة قال
> ضربة انت ياخ
> ضربة بالضا ؟؟؟
> انه البحث عن فرحة
> والعدمان الفرح
> لو كلكلتو ما بضحك
> بعمل ليك فيها بضحك
> والضحك لما يكون تمثيلية بطلع بايخ
> أيها الناس
> الناس ديل شدة ما اتعقدوا من سيكافا
> مسكتهم الشعرانة
> لو قلت سيكافا
> الواحد فيهم ينط تقول عفص جمرة
> مرة واحدة منهم ست فول
> شايلة طبقها في راسها
> واحد قال جمبها سيكافا
> ختت الطبق في الواطة
> نطت
> ودنقرت شالت الطبق ومشت
> أيها الناس
> سيكافا مخوفاهم وملخبطاهم
> اذا دخلوا فيها وفشلوا زي التمنية مرات القبلها وووب
> واذا خلوها ومشى المريخ جابها رابع مرة
> يبقى وووووبين
> عشان كده لا قادرين يمشوا عليها
> ولا دايرين غيرهم يمشي ليها
> يقيفوا مع امجاد جمب جاد
> المطار تم نهي كرتا بالكل كهيه
> أيها الناس
> دائماً ابو الهل لا يعمل باستراتيجية
> وتسجيل لاعبين لفريق السلة اصغرهم سبعة وتلتين سنة
> تسجيل بدون استراتيجية بناء فريق شبابي دولي
> ولما سلة المريخ تجيب كاس من بره
> ما تستغربوا
> اعرفوا انو التخطيط السليم هو ما قاد الى ذلك
> وكاس السلة برضو بودينا المطار
> اقعدوا مع امجاد جمب جاد
> أيها الناس
> إن تنصروا الله ينصركم
> أها
> نجي لي شمارات والي الخرتوم
> يا والينا
> رسولنا الكريم عليه افضل الصلاة والتسليم درسنا كتير وقال لينا
> وفي حديث «هلا جلست في بيت أبيك وأمك …» درساً لينا
> درس كبير يا والينا
> حقو نسميهو حديث استغلال النفوذ والسلطة يا والينا
> وما يستفاد من الحديث نحفظوا صم وكلو يوم يسمعوهوا لينا
> بالذات للنافذين والسلطويين يا والينا
> ينوموا يسمعوهوا لينا
> يقوموا يسمعوهوا لينا
> ولو الواحد فيهم ادوهوا هدية او تصديق في الحلم يا والينا
> قومتوا يسلمها لينا
سلك كهربا
ننساك كيف والنافذ ممكن يشتري قطعة ارض في الخلا بعد شهر الزلط يجي ماشي بيها والكهربا تدخل ليها ,,,, هلا جلس في بيت ابيه وامه وعرف انو التخطيط والخدمات جايه بي جاي ؟؟؟ ولا حاوي ده
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
