جمال الوالي لو شال ليه (شاحن موبايل) بعملوه (بطولة جوية)

ليه اي زول ما بضرب ليك بقول ليك تلفوني اتسرق؟

نحن قول اقتنعنا انتوا اقتنعتوا يا محمود محمود (اسكونس) شكلك ظاهر عليك ما مقتنع انت حاجات زي دي ما بتقنعك

مثل هذه البطولات مثل (الرصيد) البجيك بالغلط ممكن تفرحك وان كان بسيط لكن في النهاية لا قيمة فيه

في اي حتة بتلقى ليك زول واقف اليوم كلو قدر ما تلاقيه بقول ليك : (انت لسع ما عرست؟).

زي الزول الكل ما يشوفك في التلاجة يقول ليك : (معاك موية).

انت ما عرست؟.

تقول لسه ..يقعد يديك محاضرة في البعد الاجتماعي عند تولستوي.

وهاك يا نظريات.

يحضر ليك (تولستوي) قدامك.

الزمن بجري وجلحاتك بقن زي غداء الجمعة لو ما نزلت ليه في (الواطة) ما بتلقى راحتك.

السنين بتفوت بقى تضرب ليك لي زول تلفون يرجع ليك السنة القادمة.

تقول ليه وين انت؟.

يقول ليك : كنت نايم.

السنين بتجري.

بمناسبة غداء الجمعة.

ليه غداء الجمعة دائما بعمل ليه (بقعة) في الجلابية…الفلسفة في الحتة دي وين؟.

عليكم اللـه ما تتفلسفوا فينا.

غداء الجمعة مهما تبقى حريف وحريص بتلقاه عمل ليه اثر في كُم الجلابية.

ليه الحاجات دي بتحصل.

واللـه يا ود الناس حليل الاكل الكان بوسخ الهدوم وبعمل ليه (بقع) في الجلابية.

دا كان زمان.

هسع الاكل بقى كلو (نواشف).

ممكن الزول البسألك من عرسك دا يفتح معاك تحقيق ويكب ليك نظريات الدنيا كلها وممكن فجأة كدا وبدون مقدمات يدخل ليك في ارتفاع الاسعار.

بدون مناسبة كدا.

واخر الكلام يقول ليك يا زول ما عندك مشكلة انت بس اتزوج واللـه نقيف معاك وقفة رجال واصلو ما نقصر معاك.

ما عندك اي مشكلة وما تشيل هم.

نحن ح تلقانا قدامك في اي حاجة.

تقوم تتزوج الزول القال ليك بقيف معاك دا (بصلة) ما يجيبها ليك.

تلفون ما يضربو ليك.

ولا يشتغل بيك.

تلاقيه بعد شهر ونص صدفة يقول ليك تلفوني اتسرق والارقام كلها ضاعت.

ليه اي زول ما بضرب ليك بقول ليك تفلوني اتسرق؟.

دي فلسفة براها كمان.

وفي ناس موضوع العرس دا بعاينو ليه من حتة تانية يقولوا ليك عندنا (قروش) حائمة ساكت عاوزين نلقطها بالكشف.

عاوزين نرجع القروش الدفعناها في كشوفات الناس.

يقوم الزول يعلن ليك عن عرسو ويخت ليك البند الاول في العرس (الكشف).

اهم مرتكز عندو (الكشف).

يوم العرس تلقى الناس جايطة وحايمة التلج نقص وفي ناس ما اتغدوا..العريس يمشوا ليه يقولوا ليه الكهربة قطعت.

يقوم بدون ما يشعر يقول ليهم : عملتوا لي شنو (الكشف).

بالو كلو في الكشف.

في الدعوة اول ما تدخل في (4) شخصيات من الشخصيات المعتبرة في المناسبة بتتولى امرك وتقول ليك : (الكشف هناك).

شخصيات مرشدة للكشف.

الزول الماسك الكشف دائما بكون زول اخضر وطويل ولابس ليه جلابية ..وقدامو شنطة سوداء.

زول حازم كدا ورسمي ما وبحب الكلام الكتير.

تجي داخل المناسبة تسأل من (العريس) يقولوا ليك الكشف هناك.

ناس المريخ هسع عاوزين يطبقوا نفس الحكاية.

جابوا ليهم (كأس) عملوا الاحتفالات والمهرجانات وفتحوا ليك كراسة للكشف.

عارفين موضوع سيكافا دا خسران معاهم ..البطولة بكل جوائزها لا تتجاوز قيمتها المادية (30) الف دولار.

وهذا المبلغ دفع جمال الوالي ضعفو اربع مرات عشان الطائرة الخاصة.

(30) الف دولار دي (موية باردة) ساكت ما بتغطي مع ناس المريخ.

عشان كدا فتحوا باب (التبرعات).

حاولوا يستغلوا المناسبة ويقوموا يلقطوا ليهم (قروش).

في مسؤولين طبعا (متعصبين) بكونوا منتظرين مثل هذه المناسبات على ما هو احر من الجمر عشان يدفعوا لمريخهم.

جاريين جري على الكشف.

المنتخب السوداني بقيادة خالد جوليت مرة وبقيادة هيثم مصطفى مرة اخرى فاز ببطولة سيكافا للمنتخبات مرتين قبل سنوات.

ما في زول اشتغل بالمنتخب باعتبار ان البطولة لا ترقى لمستوى الاهتمام.

ولا استقبلوه في المطار.

ولا عملوا ليه فقرة في اي برنامج تلفزيوني.

وما فيه زول بشتغل بيه الشغلة زي كأنو المنتخب السوداني دا منتخب تاني.

مثل هذه البطولات (بطولات سيكافا) مثل (الرصيد) البجيك بالغلط ممكن تفرحك وان كان بسيط لكن في النهاية لا قيمة فيها.

ناس المريخ هسع جاءهم رصيد بالغلط قاموا يتفارحوا فينا كدا.

وناس عثمان مصطفى اسماعيل استغلوا الحكاية وجابوا ليك ناس الحكومة عشان يقننوا حكاية الدفع للمريخ.

عشان يبرروا الحكاية.

البلد غرقانة.

والخريف ما خلى ليه بيت واقف.

وجماعتكم برقصوا ويغنوا مع كمال ترباس (عدم موضوع بس).

وكمان فرحانين.

المنتخب السوداني سافر للاسف الشديد على دفعتين ولقطوا ليه حق التذاكر وكمل ليهو النثريات بالدين وهو مشارك في تصفيات رسمية ينظمها الكاف.

وناس المريخ جابوا ليهم كأس (درع إلا شوية) وجابوا ليك ناس كمال ترباس والامين البنا وجمال فرفور عشان يغنوا.

يتخيل لي كدا في الزمن المادي دي جمال الوالي لو شال ليه (شاحن موبايل) ممكن يعملوا لينا بطولة.

كسير تلج بس.

الجماعة ديل عاوزين يجاملوا جمال الوالي عاوزين يجمّلوا ليه موقفه.

عشان كدا فتحوا ليه القنوات.

قناة النيل الازرق قطعت برمجتها خصيصا لبرمجة (سيكافية) خاصة عن البطولة.

البحث عن هدف خلوا الهدف وقعدوا يتحدثوا عن سيكافا.

حتى صحة وعافية للدكتور عمر محمود خالد انصرف للحديث عن (سيكافا).

يا جماعة في تواضع اكتر من كدا.

وكذا فعلت الشروق برمجة صباحية وبرمجة مسائية عشان يقنعوا ليك الناس بالبطولة.

نحن لو اقتنعنا البقنع الديك منو؟.

وتلفزيون القومي امس استضاف ليه (مسطبة) كاملة من ناس المريخ.

عشان شنو؟.

عشان يقنعونا ليك بالبطولة.

نحن قول اقتنعنا انتوا اقتنعتوا يا محمود محمود (اسكونس) شكلك ظاهر عليك ما مقتنع انت حاجات زي دي ما بتقنعك.

البطولة دي لا بتقنع ليها زول ولا حاجة.

حكاية المريخ دي ذكرتني ليك حكاية يا (اسكونس).

قالوا ليك واحد طلع من الحلة (متحمش).

تقول ماشي يجيب ليه (كبش).

صاحبكم مشى السوق جاب ليه (بطيخة) دفع ليك فيها (30) الف دولار.

اقصد (30) جنيه.

زولكم جاء شايل (البطيخة) الحلة كلها تتفرج.

البيطخة بقت مشهودة.

زوجتو شافتو ليك لحقتو ليك بي (زغرودة).

الرجل اتبسط واتكيف ونزل البطيخة.

الاولاد جاءوا جاريين بالسكاكين.

ابوهم قال ليهم براحة انا البطيخة دي دافع فيها (150) جنيه انتوا قايلنها ساهلة.

فتحوا البطيخة لقوها ما حمراء ومسيخة كمان.

المرا اغمي عليها.

رشوها بالموية زوجها حاول يطمئنها ليك قال ليها ما مشكلة الـ (150) الدفعتها فيها بمشي استرجعها.

زوجتو قالت ليه المشكلة يا ابو الاولاد ما في الـ (150) جنيه المشكلة في (زغرودتي) الراحت ساكت انا زي (الزغرودة) في في عرس ولدي ما زغردتها.

الراجل ما قدر يقول حاجة.

……

ملحوظة : محسن سيد دا شكلو كدا لسع فاكر نفسو بدرب في مريخ الفاشر عشان كدا فرحان بالكاس.

هوامش

شكل الاحتفالات والافراح وحتى الكتابات والبرامج في الفضائيات السودانية كلها ناتجة مع علاقة البعض بجمال الوالي.

كلهم اردوا فقط بمجاملة جمال الوالي.

قاموا طسوا في الفرح.

عاوزين يقنعوا ليك الناس ان جمال الوالي عمل حاجة.

اول مرة اشوف لي بطولة تذاكر سفر بلة جابر ومحسن سيد اغلي منها.

قروش السيول والفيضانات السنة دي شالها المريخ.

الناس غرقانة والحكومة بتتبرع للمريخ.

المريخ بقى اخطر من السيل شال قروش الحكومة كلها.

كمال ترباس نحن بنعرفو.

كمال ترباس لو عارف سيكافا …وعارف تواضعها ما كان بغني ليكم.

كمال ترباس ثقافتو الرياضية ضعيفة.

لكن مع ذلك قالوا غنى ليهم (يلوحن لي حمامات).

اما جمال فرفور فهو اصبح ماشى حسب التعليمات.

عشان كدا ما في زول يلومو.

ما في زول يقول ليه حاجة.

ناس الارصاد قالوا الليلة بتجي (مطرة).

هو والي الخرطوم فاضي لي من سيكافا.

شوفوا شوارعكم بقت كيف؟.

مطرة واحدة بتجهجكم.

اتوقع انضمام اسامة عطا المنان لدائرة الكورة في المريخ.

نحن نقول الخرمجة البتحصل في برمجة الممتاز دي حاصلة من وين؟.

خلاص عرفناها طالعة من وين؟.

تشبحوا لي في عيونكم متل صواني الباسطة.

اول صواني الباسطة بتشبح عيونها.

البلد دي اي حاجة بقت تشبح في عيونها.

…..

عاجل : الباشا استفرغ في المطار تكون سيكافا قلبت ليه بطنو…الباشا دا من الاول كان عندو رأي في سيكافا.

[/JUSTIFY]