وجع الحنين

أتاري الشوق كمان بيوجع؟؟

أنادي عليكا طول اليوم ولاااا بتسمع!!

مراكبي تطوف بحار الهم.. وكان حضنك زمان مشرع

وليلي يطول أسى وتنهيد ولي كأس الحنين أجرع

دموعي عليك تبل الروح وأبكيك زي بكا الشفع

ولي وسواس عذاب الشك بقيت مرتع

تسوقني ظنون.. تجيبني ظنون.. وأقول منك خلاص أقنع

بس أطرى الكان حنان وأمان.. ولي دنيا اليقين أرجع

حبيبي المالي كل الكون.. محال في يوم يجور يخدع

بعرفو وقور وحافظ لي ودادي شهور.. ولي شتل الوصال يزرع

محال الريح تهز.. كل البنيتو معاو ولي كل الشتول تقلع

أنحنا البينا ساقو متين.. وصل حد السما وفرع

وغايتو نبيلة مافي مثيلها.. من كل الغرام أرفع

ده زول ستار فضايح الروح.. يواسي الخاطر المجروح.. يكفكف دمعي عز النوح.. ويصبح للعيوب مقنع

أكابد لهفة الأنفاس.. وأتوق للضحكة والإيناس.. وياخي الشوق كمان بيوجع..!!!

تمر الذكره في الخاطر.. وترحل روحي لي باكر.. وبرضك باقي لي مرجع

عرفت معاهو علم الكون.. وليه العشق قالوا جنون.. ولي كل الجبابرة صرع

وتعود يا ريد.. يجينا العيد.. نغني وبيهو نستمتع

يلفنا فيض فرح مخزون.. ونمرق كم ولع مكنون.. دموعنا الغالية تتجمع

ونبكي ونبكي كل الكان.. وليلنا الطال مع الأشجان.. وياخي الشوق.. حرام بيوجع

وما تقول إني مرة نسيت.. ولا عن قربك استغنيت.. وحاتك باكي فيك لسع

فحاول لو قدرتا تعود.. لتفتح بابك المسدود.. ولي جور الغرام تخضع

وخليك أقوي من البين.. ومن وسواس جفاك الشين.. ومن طير الخريف أسرع

براهن لسه في الأيام.. علي أنك كما الأنسام.. وإنك في الأنام.. أروع

أريتك بس تحس بالشوق.. وتعرف إنو جد بيوجع.

تلويح:

كلما استبد بي الوجع.. بحثت عن زجاجات عطرك القديمة!