> مباراة التأهل لدور الاربعة في سيكافا
> اظهرت مؤشرات جيدة
> أولاً عودة روح الاصرار على الانتصار
> ثانياً الغيرة الكبيرة والتي ظهرت في الاحتفالية بالنصر
> ثالثاً اننا كسبنا حارس مرمى ممتاز جداً
> رابعاً ان الاهلة حزنوا لتأهلنا اكثر من حزنهم على خروجهم من الكنغو
> العيد ذاعوهوا في الكنغو
> ما زعلوا علي القصة دي قدر زعلهم على تأهل الزعيم
> الحمام زعل اكتر من عزام
> خامساً وهو الاهم
> اننا نحقق بحمد الله اهداف مشاركتنا في سيكافا بهدوء شديد
> وبخطى واثقة وثابتة
> سادساً عرفنا الخانات التي تحتاج لي شغل ودعم
> صديقنا ابو الهل عندو موضوعين مهمين اليومين دي
> الموضوع الاول يكسب الشكوى
> والموضوع التاني يغلب الزمالك
> واردة انو يخسر الموضوعين
> ولذا نتمنى له توفيق اوضاعه
> ويكون ذلك التوفيق في توفيقه في واحد من الموضوعين
> يا يغلب الزمالك
> يا يفقد الشكوى
> وفي الحالتين ابو الهل ضايع
> لانو لو غلب الزمالك وخسر الشكوى
> بعمل سبعة نقاط
> وفيتا عشرة وباقي ليهو لعبة
> ولو كسب الشكوى
> الزمالك ذاتو بكون كسب الشكوى
> تبقى هزيمة ابو الهل من الزمالك تأكيد للصفر الازلي
> وعلى الاهلة الاختيار
> الشكوى ولا الزمالك؟
> واحد فيهم بس
> والخوف يبقى الخيار بين الشكوى والفوز على الزمالك
> زي تخيير الاسد للضبعة زي ما قال شاعر النجوم بمروي
> فالاسد خير الضبعة وقال ليها
> يا اكلي البتاب وخلي لي العيش
> يا انا آكل العيش واخلي ليك البتاب
> والخوف تطلع شكوى كبسور اكل بتاب
> وتطلع كورة الزمالك بتاب
> وكتر البتابت عيب
> أيها الناس
> المستوى الذي ظهر به الهلال بعد رجع من نكسة الكنغو
> اقصد رحلة الكنغو
> يجعلنا نخاف عليه من الزمالك في عقر الدار
> واهمال الكاف لشكوى كبسور وتأجيل البت فيها
> يجعلنا نردد كلمات الشاعر الكبير اشرف الكاردينال
> والتي تغني بها المبدع محمد عيسى
> والتي تقول في مطلعها
> مالو ما ضرب لينا والله يكضب الشينة
> مالو الكاف في الشكوى ما فصل لينا
> الله يكضب الشينة
> شينة الكاف هينة
> كعبة شينة الزمالك
> المهم
> خطوة اخرى هامة في سيكافا نخطوها مجدداً
> نتمنى التوفيق فيها للزعيم
> كي نحقق كل اهداف المشاركة في سيكافا
> سيكافا الناس القيافة
> لاقاكم زول شال سيكافا ما قيافة ؟؟
> طيب لاقاكم زول قيافة ما شال سيكافا ؟؟؟
> أيها الناس
> إن تنصروا الله ينصركم
> أها
> نجي لي شمارات والي الخرتوم
> كان شفت يا والينا
> اليومين دي الباعوض الحايم فينا
> شغال صامت يا والينا
> ما بنسمع صوت حولينا
> وفجأة نلقاهو بطعن فينا
> ما بقرص يا والينا
> بطعن فينا
> ده ما قدوم باعوضه ده سكينة
> تقوموا عليها يا والينا
> ولا نقوم عليها نشغلها تسالي نقزقز بيها بدل تقزقز بينا
سلك كهربا
ننساك كيف والباعوضة زي طيارة بدون طيار تجي لي مكان محدد وما بتخطئ أبداً
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
