كــــورتكم مع الصبــــر عــــاوزة ليـــها (كرتونة خبيز)

نملك مهاجمين جيدين في التحرك والخلخلة ولكن لا نملك مهاجمين يسجلوا من انصاف الفرص

اذا اضاف الهلال ثلاثة محترفين لكشوفاته في التسجيلات القادمة على مستوى عالي يمكن للهلال أن يحقق كل بطولات 2015 التى ينافس عليها

ناس الارصاد الجوي اصبحوا مثل (المحللين السودانيين) تماماً يقعدوا يحللوا ليك بين الشوطين حتى اذا جاء الشوط الثاني وجدت كلامهم كلام الطير في الباقير

مباريات الهلال في الفترة الاخيرة اضحت مثل (قشير البصل) فيها الكثير من المعاناة والرهق ، والدموع التى تنزل من غير ارادة.

والقطر الشالك أنت يتكسر حتة حتة.
هسع (القطر) الدخلو في الموضوع شنو.
معاناة الهلال بتكون بشكل واضح في شوط اللعب الاول.
مباريات مثل مسلسل (الشهد والدموع).
ومرات ما بنشوف لينا أي (شهد) بتكون كلها (دموع).
نقعد نحرق في اعصابنا ونحن ما بنستحمل في الهلال أي حالة (تعادل).
أي هجمة بنقيف ليها برة ونقعد نكورك في (الحكم).
الاتحاد العام لكورة القدم بقى بجيب لينا (حكام) الكورة دي زي كأنهم شافوها على كبر.
الانتصارات في مباريات الهلال اضحت غير مضمونة وأن تحققت جاءت متأخرة مثل حال (الموية) في ولاية الخرطوم تأتي في الساعات الاولى من الصباح زي اخبار (اخبار اليوم).
ننتظر الهدف في مباريات الهلال بي جركانات الموية (بين اليقظة والاحلام) تقول قصة حب ما موية.
اصبحنا ننتظر الشوط التاني تقول مسافرين بطائرة سودانية ما معروف موعد وصولها ولا معروف موعد اقلاعها…وما معروف اولها من اخرها.
قاعدين كدا بس ما معروف البحصل شنو؟.
كحال كل الاشياء في السودان.
معلقة إلى (اجل غير مسمى).
كل شيء متروك للظروف ومتروك لحالة الطقس وناس الارصاد الجوي الذين اضحوا في كل خبر طالع منهم يأكدوا أن هنالك امطاراً سوف تهطل في ولاية الخرطوم صبيحة اليوم وما نشوف لينا أي مطر.
اها وينها (مطرتكم)؟.
ولا نقناقة.
ما قاعدين نشوف أي حاجة.
انتوا وقت ما بتعرفوا تتوقعوا قاعدين تنظروا لينا ليه في الجرايد والفضائيات.
نحن ما فاضيين لتوقعاتكم المجلية دي.
مطرة انتوا ما قدرها ما تقعدوا تتوقعوا ليها.
بعدين ولايتكم دي (توقعات) ساكت ممكن تغرق.
انتوا قايلين الخرطوم دي واقفة على هطول الامطار.
التوقعات ساكت بتخلي مويتنا للركب.
لقوا ليك المطر شغالة بقوا كل يوم يقولوا ليك بكرة ح تهطل امطار.
والحكاية في الاول كانت ماشه.
يشفقوا ليك في الناس ويجهجهوا ليك في القمصان البيضاء.
طبعاً القمصان البيضاء ما عندها أي علاقة بالموضوع دا.
زي الفيلم الهندي البكون فيه مشهد في المحكمة يقوموا فجأة كدا يجيبوا ليك البطل بغني وبرقص مع البطلة في حديقة وارفة.
طبعاً نحن زمان في حصة الانشاء كانت بتعجبنا ليك حكاية (حديقة وارفة).
بي مناسبة وبدون مناسبة تلقانا بندخل ليك بين الجملة والتانية جملة (حديقة وارفة).
موضوع عن استقلال السودان ندخل ليك فيه حديقة وارفة.
موضوع عن الاراضي المحتلة ندخل ليك فيه حديقة وارفة.
موضوع عن يوم الشهيد ندخل ليك فيه حديقة وارفة.
عن عيد العمال برضو بنجيب ليك فيه (حديقة وارفة).
ما في أي علاقة بين الموضوع والحديقة الوارفة.
الموضوع بكون في حتة والحديقة الوارفة في حتة.
كنا بنتحرفن وبنبحث لينا عن علاقة بين الموضوعين.
زي الهنود تماماً البطل يكون قاعد في فراش ابوه المقتول يقوم يجيبوه ليك في المشهد التالي بغني ويرقص مع البطلة.
جنهم رقيص.
بي مناسبة وبدون مناسبة تلقاهم قاعدين يغنوا.
حياتهم كلها غنا.
لمن نحن تلفزيوناتنا فترت من حكاية البطل البكون من اسرة فقيرة والبطلة من اسرة غنية.
تقوم تحصل دراما بين الصراع بين الفقر والغنا.
الغريب في الافلام الهندية دائماً (الفقر) بيكسب.
والخير بيكسب.
والحب بيسكب.
لكن في الواقع ما قاعدين نشوف الحاجات دي.
هنا الواحد ريقو ينشف ينزل من الطابق العاشر ..يقطع الزلط تلم فيه عربية تجيب اجلو.
في الافلام الهندية (البطل) يطلع فيه (قطر) ما تجيه حاجة.
ودا كلو ما يطلعنا من موضوع الامطار والتوقعات المجلية دي.
ناس الارصاد الجوي تقول بتكونوا من محللين فنيين فهم قد اشاروا إلى هطول امطار صبحية يوم الاحد وصبيحة يوم الاثنين وصبيحة يوم الثلاثاء.
وطلع كلام ساكت.
يوم الاحد ما جات مطرة ويوم الاثنين امس ما كان في مطرة ولا ندري هل سوف تهطل امطار صبيحة اليوم أم لا؟.
ناس الارصاد الجوي اصبحوا مثل (المحللين السودانيين) تماماً يقعدوا يحللوا ليك بين الشوطين حتى اذا جاء الشوط الثاني وجدت كلامهم كلام الطير في الباقير.
كلام ما عندو أي علاقة بمجريات الاحداث في الشوط الثاني بل كلامهم ما عندو أي علاقة بكورة القدم بصورة عامة.
المحلل السوداني تلقاه قاعد في الاستديو يحلل في مباراة وبتكلم ليك عن سعر كيلو اللحمة وعن تأجيل المدارس.
وعن كيلو الموز.
هسع عليكم اللـه لو ما ساي علاقة كيلو اللحمة بالكورة شنو؟.
البجيب الموز في التحليل الفني شنو؟.
انتصارات الهلال في الفترة الاخيرة بقت زي (الموز) في التحليل الفني للمباريات.
انتصارات غير مقنعة.
الهدف نفسو بيجي بعد تلتلة.
ونحن واللـه ما عندنا صبر للحاجات دي.
مبارياتكم مع (الصبر) عاوزة ليها (كرتونة خبيز).
زمان الهلال عندما يلعب امام اندية الولايات في الخرطوم عادي جداً يفوز بالخمسة والسبعة والتمانية.
هسع انتصارات الهلال كلها بفارق هدف أو فارق هدفين.
انظروا إلى اهداف الهلال في هذا الموسم سوف تجدوها قليلة كما أن معظم الاهداف تأتي من لاعبين في الاصل هم لا يلعبون في خط الهجوم.
في مباراة الهلال امام هلال كادوقلي سجل مهند الطاهر وعبداللطيف بويا.
وفي مباراة الامس أمام الرابطة كوستي كان التسجيل ايضاً من نصيب المدافع سيسه ولاعب الوسط بشه.
وهذا يعني أن خط هجوم الهلال غايب تماماً عن التسجيل.
الهلال يفتقد المهاجم القناص المهاجم الذي يسجل الاهداف.
نملك مهاجمين جيدين في التحرك والخلخلة ولكن لا نملك مهاجمين يسجلوا من انصاف الفرص.
يمكن ذلك يرجع إلى افتقاد الهلال للمهاجم المحترف الاجنبي أو المجنس.
هجوم الهلال الان كله يتكون من لاعبين وطنيين.
علماً أن نبوغ المحترفين ونجاحاتهم وفوائدهم تظهر في المقدمة الهجومية.
الهلال لم يستفد من تلك العوامل …ومن النجاحات الثابتة للمحترفين في الهجوم.
يحتاج الهلال إلى محترف اجنبي يسجل من ربع فرصة.
محترف الهلال السابق سادومبا كان جيد في التحرك في المساحات وفي الانطلاقات من الخلف بسرعته الفائقة.
محترف الهلال السابق ساني كان خطير وممتاز في الضربات الرأسية.
محترف الهلال السابق تراوري كان جيد في المهارات والمراوغة.
محترف الهلال السابق كلتشي كان (ثعلب) داخل الخط.
كل هذه الاسماء فرط فيها الهلال في التسجيلات الاخيرة.
كنا قد طالبنا بإعادة قيد تراوري فأهمل مجلس التسيير ذلك …وكانت فائدة تراوري مع الهلال سوف تكون كبيرة لو كان يلعب للهلال في هذا الموسم.
طالبنا بإعادة كلتشي وقد كان كلتشي لاعب حر ويمكن اعادته بسهولة ولكن لجنة التسيير لم تلتفت لحاجة الهلال للاعب.
فرطوا في سادومبا ..وكان الهلال محتاج بشدة له في منافساته الافريقية والمحلية بعد أن اكتسب خبرات افريقية عريضة داخلياً وخارجياً.
مجلس الكاردينال المنتخب الان عليه أن يأتي بمهاجم بمواصفات نادرة وبمهارات كبيرة.
معظم بطولات الاهلي المصري تحققت برأس فلافيو.
وكل بطولات الترجي التونسي كانت نتاج جهود الأجانب الذين يلعبون له.
إذا أراد الهلال التقدم في المنافسات وتحقق البطولات القارية عليه أن يأتي بمحترفين (سوبر ستار).
واظن أن اول ملفات الكاردينال التى سوف يمتحن فيها ويختبر هي ملفات الاجانب.
إن نجح في ذلك الملف فإنه سوف يمضي بعيدًا بالهلال.
عليه أن يدرس تلك الامور ويبحثها منذ الان.
يمكن القول إن في الهلال الان ثلاثة محترفين على مستوى عالي الجيد سيسه ونيلسون وسيمبو وسيدي بيه.
إذا اضاف الهلال ثلاثة محترفين لكشوفاته في التسجيلات القادمة على مستوى عالي يمكن للهلال أن يحقق كل بطولات 2015 التى ينافس عليها.
لكن بصورة عامة الهلال يحتاج إلى مراجعات شاملة واللـه نحن التلاتل دي ما عندنا ليها صبر.
ولا بتخارج معانا (مقصورة).
ولا بنغشكم.
ولا بتنفع.
…
ملحوظة : كربوا الفريق ..وجندلوا الكورة.

هوامش

بشه محلياً وافريقياً بقى حاضر بهدف.
ننتظر أن يمنح الجهاز الفني للهلال الفرص كاملة لمحمد عبدالرحمن ووليد علاء الدين.
وننتظر حل اشكالية أحمد بيتر وأطهر الطاهر.
كل الذين شاهدوا أحمد بيتر قالوا إن هذا الحارس سوف يكون حديث الناس في المستقبل.
مطلوب من مجلس الهلال أن يتحرك لحل اشكالية اللاعب لأن ابتعاد اللاعب من المشاركة في مباريات رسمية يفقده أهم مقومات اللعب.
أحمد بيتر حارس صاحب مواصفات خاصة.
عجلوا بحل اشكالية هذا الحارس حتى لا تخسروا موهبة كبيرة.
السودان كله يعاني في حراسة المرمى.
والاتحاد العام يجب أن يعجل بحل اشكالية اللاعب قبل الهلال لأن المنتخب في حاجة لهذا الحارس.
المشكلة أن الأمور في الهلال لا تحل سريعاً.
وليس هناك تحرك فعّال من أجل حل مثل هذه الاشكاليات.
لو كان هذا الحارس في المريخ لتدخل القصر بنفسه لحل اشكالية اللاعب.
…..
عاجل : ناس سيكافا ديل الليلة ما عاوزين نشتغل بيهم.
[/JUSTIFY]