نحن حكايتنا شنو بالضبط كدا؟

ناس الحمد لله.. تامين.. عندنا ايدين وكرعين واضنين.. ووشي ونخرين.. وما ناقصين حاجة من خلق الله.. فينا البيفهم.. وفينا الفهمو على قدرو(يا قول المصرين..).. لكن لينا زمن وزمن طويل.. شغالين صلبطة.. في التاريخ وفي الجغرافيا.. وفي خريطة الجينات الوراثية.. وفي أي حاجة نحس إنها قد ترفع من قدرنا.. كأنو عندنا عوجة ودايرين نضاريها بالنضم دا.. اجتهدنا وكتبنا الكتب وبحتنا وكوسنا كواسة شديدة عشان نثبت إنو جدنا العباس.. لحدي ما أي زول فينا حدر طاقيتو.. وشال عكازو.. وقدّل في السهلة وقال جدي العباس.. لو العباس عم الرسول أبولهب برضو عماً للرسول ما فينا زول بالكضب ساكت قال بيبقى ليهو.. مع أني أشك في علاقتنا بيهو وبامرأته حمّالة الحطب.. وشوفتو نسوانا جنهن حطب كيفن؟.. من طلح وشاف. ويشيلن فيهو بالشوالات واللواري تنقل.. والركشات تنقل.. والبكاسي تنقل.. والدواب تنقل.. وهن براهن فوق روسينن ينقلن… أها دي حِمالة حطب واللا ما حِمالة حطب..؟ وحمالة الحطب “أروى” ما حبوبتن لينا؟.. يعني جينات المغدوب عليها مرة أبو لهب فيهن فيهن.. قالو بلال، قلنا مننا.. لكن ما فينا زول قال بلال جدن ليهو… لي شنووووووو؟.. النجاشي رضي الله عنه.. قالو أصلا كان ملك السودان.. والحبشة المقصودة ياها السودان دا.. والنجاشي جدنا.. عنتر أمه زبيبة من عندنا.. البحر الرمت فيهو أم سيدنا موسى.. موسى وهو طفل البحر الليلينا دا.. شفتوهو؟.. البحر الدايرين نسويهو كلو سدود دا ونقعد نحرس للمصرين مويتهم دا ياهو البحر الرمو فيهو موسى.. ونبي الله الخدر.. لاقى موسى ونضم معاهو في المقرن.. المقرن الحسي قاعد دا.. وأخبرني أحد المثقفين السودانيين.. وهو جاااااادي.. قال لي إنت عارف ربنا كلم سيدنا موسى بجبل البركل.. جبل البركل الما يغباكم دا.. قال لي كان الجبل اسمو طور.. والنضم البيتقال دا كلو إسرائيليات، دايرين يبعدوهو من عندنا.. وكل ما يطلع لينا واحد.. وعاجباهو روحو.. يقول لنا خليت لكم العباس، علا الرسول جدي.. جمال عبد الناصر اصلبطنا فيهو.. وقلنا أصلا سوداني علا المعايش ودت أهلو لي مصر.. السادات أمو سودانية.. وحتى نتنياهو رئيس وزراء إسرائيل طلعناهو شايقي حافض غنية اسيا بابورك في الأراك.. اتشبكنا في كلاي.. وفي بيليه… ولما أوباما فاز.. جرينا علي كتبنا نكوس فيها.. وقدر مافي عجوز عندها ولد طافش ومطول من البلد سعلناها.. يمكن يكون أبو أوباما ياهو ولدها السافر دا.. ويطلع أوباما بيبقى لينا.. عشان نقعد ننطط ونفجط في العالم ومافي زول يسعلنا ويقول لنا تلت التلاتة كم؟.. لحدي ما ظهرت حبوبة أوباما في كينيا.. لكن برضو ما خليناها مشينا بحتنا وراها.. وناس الحركة الشعبية الله يطراهم بالخير.. طلعوها دينكاوية.. علا برضو المعايش رمتها في كينيا.. ليه نحن ما نحاول نتصالح مع نحن.. ونقبل نفسنا زي ما هي.. ونطورها.. ونجتهد بعيد من العباس وبعيد من أبو لهب.. ونبقى ناس.. الناس تعمل لنا حساب.. بس كان خلينا الغتاتة شوية.!!