نان تاني أن عرست.. ما تلوموني

تفاءلو خيرا تجدوهو.. التشاؤم هو الزول يتوقع شي كعب يحصل.. أي زول بيتشائم من شي غالبا الخايف منو يبقى.. كتير عندنا الواحد يقول ليك والله الزول دا أنا بتشاءم منو.. أو الجلابية دي متشائم منها قدر ما البسها تحصل لي نصيبة.. عشان كدي اديتها الشحاد.. يتبالا بيها وإن لبسها لومك بي ما في ولا زول ح يديهو تعريفة.. أسوأ تشاؤم ومدمر التشاؤم من العرس والعروس أو العريس.. لكن نحن قاعدين نعصر على العروس أكتر من العريس.. يعني لو العريس شليق ومعروف انو شليق.. ويوم العقد من شلاقتو وقع وكسر كراعو.. طوالي ممكن تتجه أصابع الاتهام إلى العروس وانها شؤم.. مع علمنا ويقيننا انو العريس شليق.. وديمة واقع مزلط نفسو.. وكاسر يدو واللا كراعو.. واللا مفلوق.. والغريبة لو كان أهل العريس فيهم جزء ما راضين انو يعرس المرا دي.. إن ماتت غنماية ساااااكت يقولو”اها ما قلنا ليكم الناس ديل شؤم؟.. علي اليمين تعرسو منهم بعد شهر واحد بس.. تعدمو نفاخ النار وتتقرضو كلكم.. يا زول الناس ديل اختوهم”.

*مارسيلو تيتشييرا.. عريس برازيلي.. منتظر عروسو.. جنب الكنيسة.. عشان العقد.. أصيب بأزمة قلبية ووقع.. العروس لحقتو في المستشفى ولقتو اتوفى.. اها العروس ما عرفت تسوي شنو؟ غايتو بكت.. لكن قالت “هوي ما تجلطوها فيني ساكت.. الزول دا اصلو عندو قلب وعيان وكان هنا قاعد يتعالج.. عان ها الشوم الشوم.. تتقاطعن.. انت يا نسوان ساوباولو عرفااااااااكن”.

*في السعودية.. عريس مصري.. رسلو ليهو.. عروسو.. جا جاري فرحان سايق عربيتو.. فوق الدرب عربيتو طصتها تريلة ومات.. قبل ساعة من وصول العروس.. العروس رجعت في نفس الطيارة.. بعد أن غشوها وقالوا ليها إجراءاتك ناقصة وما بنقدر ندخلك السعودية.. ولما وصلت أهلها حدسوها بي خبر السواد دا!!

*أما في العراق.. قبال كدي مات (مصلي محمد المجمعي).. 97 عام.. . عرس بنية عمرها عشرين سنة.. نان اتهنا بيها مسكين؟.. ستة شهور وجاتو سكتة قلبية.. لحق أمات طه..

شفتو البت دي كُراعا كعبة كيفن؟.. راجل عايش 97 سنة.. نزلة ساكت ما جاتو.. ما يموت علا معاها؟.. حسي كان ماهي كان تمّ المئة..

*أما في السودان.. العروس من منطقة والعريس من منطقة.. مشو سيرة لاهل العروس.. فوق الدرب حصل حادث.. العريس مات.. وامو وابوهو ماتو.. اخواتو تلاتة بوليداتهم ماتو.. اخوهو مات.. خالتو وولد خالتو ماتو.. عمو ود اعم ابوهو مات.. سواق الحافلة مات.. في زول كان قاطع الشارع راكب حمار هو سبب الحادث هو وحمارو ماتو.. في شفع كان بيلعبو جنب الشارع الحافلة اتقلبت وادرقت فوقهم كتلت تلاتة منهم.. ام العروس سمعت الخبر جاتها سكتة قلبية ماتت! أما العروس شديدة ولضيضة.. علا ركبت الزلط!!

أحد أقرباء العريس سعل عن اسم العروس.. قالو ليهو اسمها (إسراء).. صفق ايديهو وقال ليهم”إسراء.. واللا.. إسرائيل دي؟”