“””””””””””””””””””””””
اقعدوا بالكراسي برة مشاعركم وشغلوا ليهم (المروحة)
“””””””””””””””””””””””””””
سندوتش الطعمية في السلم التعليمي زمان لو ما دخلت الصف الخامس ما بتكب ليك فيه شطة
“””””””””””””””””””””””””””””””
الليلة يوم 2 رمضان العيد باقي ليه بي حساب الجماعة ديل (8) ايام …وعشرين يوم
“””””””””””””””””””””””””””””””””””””
· واقفين نلقط في العيون…(بَصل) الكلام الغلط دراش دراش.
· الضل يجابد في الزمن لا الزمن بجابد في (الضل) زي القميص القصيّر.
· زي الغطا القصيّر.
· تجر تغطي (وشك) ..تنكشف الاقدام.
· تغطي الاقدام ..ينكشف الوش.
· دا الضل والزمن شغالين في (المجابدة) دي.
· نهار رمضان.
· مكاجرة شديدة.
· الساعة كم؟.
· ما تسأل من الساعة.
· الساعة ذاتها بتداغل وقت تشوف الناس مهتمة بالزمن.
· اعملوا رايحين.
· كسروا (مقاديف) الرغبة في انو الزمن يمشي.
· ما تشتغلوا بالقضية دي.
· اقعدوا بالكراسي برة مشاعركم وشغلوا ليهم (المروحة).
· مراويح الزمن دا من كسلها لو شغلتها في خمسة ..عاوزه منك (حافز).
· تشتغل ليك في تلاتة بي يا الله.
· لو شغلت المروحة اليوم كلو عاوزة منك (اوفر تايم).
· الزمن دا ما في حاجة ساكت.
· واحد عامل فيها في الانجليزي ما في زول بقدر عليه.
· عامل فيها حافظ الانجليزي.
· في جماعة قالوا ليه غني لينا اغنية بالانجليزي.
· صاحبكم ما كضب.
· مسك اضنينو وقعد يغني ليهم : (يا تايم وقف شوية واهدي لي لحظات هنية).
· خلاص يا بتاع الانجليزي ما قصرت تب.
· قفلت (الانجليزي) اصلو ما فيك كلام.
· ولا كلمة.
· بقيت اخطر من (نايل) في الغنا بالانجليزي …ما بتصاقع.
· الزمن بقى صعب.
· بقت الحاجات فيه ما مفهومة …ملخبطة زي (السلطة) الما معروفة دي سلطة وإلا شوربة عدس؟.
· طبعا ما في اي علاقة بين السلطة وشوربة العدس.
· ولا في وجه شبه واحد.
· لكن الزمن الغريب دا لخبط الحكايات.
· شاي اللبن بقوا يعملوه بالكركدي.
· شاي المغرب تشربو مع النباه الاول الحاجات (اتلخبطت) شديد وبقت ما مفهومة.
· الزول البسلّم عليك كويس ..وتحس بالالفة والشوق في سلامو بعد شوية بطس نظريتك دي ويقول ليك : (معاك قروش).
· دا ما سلامك.
· دا سلام القروش.
· شباك ناس (حليمة) في رمضان اليوم كلو بكون (مقفول).
· وعباس ود حاج الخليفة في رمضان ولا بكضب بشغل الموبايل صامت.
· بشغّل الموبايل صامت وبكون هو في حد ذاتو (هزاز).
· اليوم كلو يرجف من (العطش).
· لو قلت ليه …كيلو اللحمة بقى بي كم؟..يقول ليك العيد باقى ليه (28) يوم.
· قاعد حارس العيد كدا زي (التفل).
· الليلة يوم كم رمضان؟.
· الليلة يوم 2 رمضان العيد باقي ليه بي حساب الجماعة ديل (8) ايام …وعشرين يوم.
· العشرين اليوم الاخيرة ما مشكلة بتمشي سريع..الناس فيها بكونوا مشغولين بالخبيز والسفر.
· يا جماعة صلحوا اعمالكم ..ما تقعدوا تنشغلوا لي بالخبيز وحلاوة العيد…الموضوع دا بدري عليه.
· لسع عليه شوية.
· العيد باقي ليه (8) ايام…اسكت مسافة كدا وقول و (20) يوم.
· العشرين ما مشكلة …مشكلة الـ (8) ايام الفوق ديل.
· زي الزول البقول ليك القميص دا بـ (43) جنيه ..عشان ما تديه اربعين جنيه بس .. بقوم يقول ليك والتلاتة جنيه الفوق اهم من الاربعين جنيه.
· تديه الـ (3) جنيه وتشيل القميص وتفوت.
· خلاصة الكلام يا جماعة.
· خلاص نحن بقينا قبالة العيد…ما طالبني حليفة …شفت ليك ناس عمر يشتروا لي شفعهم في هدوم العيد.
· ناس عمر اصلا شفقانين.
· رمضان دا يجهزوا ليه في الحاجات من رمضان الفات.
· ناس شفقانة خلاص.
· جايبين لينا (الشفقة) متل خياطة اليد.
· شوفوا يا جماعة ما تزعلوا ..ولا تغضبوا ..رمضان دا اصعب حاجة فيه اليوم الاول.
· وقت يفوت اليوم الاول اليوم التاني بفوت.
· وان فات اليوم التاني ..جهزوا (جلابية) العيد ساكت …وعلقوا (الستائر).
· الحتة دي فيها (فلسفة) غريبة.
· علاقة (الستائر) بالعيد شنو؟.
· النسوان ديل من يقعدن يصاقرن في الستائر اعرف طوالي العيد جا.
· زمان نحن عندنا ود خالتنا (طويل).
· طويل طولا يحير زي ليل النعام آدم.
· ود خالتنا الطويل دا ..كان في ايام العيد بكون شغال اكتر من عاصم البنا.
· لو ما حاجز قبل ميعاد مسبق ما بتقدر تسوقو معاك البيت.
· الزول دا كنا بنستفيد منو في تركيب الستائر.
· اي زول عندو تركيب ستائر في العيد بجيب ود خالتنا دا ..بعد كدا بكون لا محتاج ليه لي سقالة ولا برميل.
· زولنا دا منو والسقف.
· برضو الطول فيه فايدة في مسألة تركيب الستائر دي.
· طبعا في (حيط) ثقيلة ثقالة مبالغ فيها…الحيطة قدر ما تدق فيها (المسمار) ..المسمار ما يمشي.
· يتعوج قبلو.
· ودا الشيء البخلي الزول يكره الستائر وتركيبها.
· يوم مشينا لينا لي زول ..كان معانا زول طويل.
· الكلام دا كان في العشرة ايام الاواخر من رمضان.
· في واحدة من النسوان شافت الزول الطويل دا ..طوالي قالت احسن تستغل الموقف وتستفيد من الزول الطويل دا في تركيب الستائر.
· شوية كدا نادوا ليك الزول قبل الفطور ..وقالوا ليه عندنا ستائر عاوزين نركبها.
· زولكم طلع يركب في الستائر لمن التراويح انتهت ما نزل من الشباك.
· الفطور ما فهم فيه اي حاجة.
· اها الزول دا بعد اليوم داك ..اي عزومة يعزمونا ليها اول حاجة بسأل من (الستائر).
· لو كان الناس عندهم (ستائر) عاوزين يركبوها طوالي بقوم يعتذر ليهم.
· ولا بجامل طوالي بقول ليهم انا شغال والله.
· شن قدرتو على تركيب الستائر قبل فطور رمضان.
· في نسوان ذاتن حقارات ..بحقرن بي ازواجهن.
· الزوج تلقاه بنزل اجازة مخصوص عشان يركب الستائر.
· والله قادر بس ما ينجح في تركيب الستائر (المرا) تشيل حال في الحلة.
· تقول ليه انت يا الما زي الرجال ..الستائر ما بتعرف تركبها.
· النسوان ممكن يجاملن في اي حاجة إلّا (الستائر).
· كلو ولا الستائر.
· عشان كدا مفروض تحسموا موضوع الستائر دا من بدري.
· رمضان دا ان اتقسم ..ح تلقوا موضوع الستائر دا بقى موضوع.
· وبجيب ليكم (مشاكل) ساكت.
· انا بقترح على الحكومة تعمل في ماهية العيد السنة دي بند للستائر.
· او حوافز تسميها بدل ستائر.
· الستائر دي ممكن تقفل بيوت عديل كدا.
· ما تهملوها.
· وما تخلوا تركيبها للظروف.
· اها يا جماعة ما (اتساترت) معاكم.
· اقصد ما اتسرت معاكم.
· ساكت تغالطوا في الزول زي فتيل المحبرة.
· انتوا تعالوا هنا.
· وبدون مقاطعة ليكم.
· وبدون كلام.
· فتيل الحبر ..اختفي وين؟.
· والله المدارس دي من اختفي منها فتيل الحبر بقت ما نافعة.
· التعليم انتهي مع اختفاء فتيل الحبر.
· رجعوا لينا (المحبرة).
· زمان الواحد يكون طول وعرض يمشي المكتب ويقول عاوز ليه (محبرة).
· اول حاجة كان بتطلبها من ابوك …انو يجيب ليك (المحبرة).
· يمكن عشان الطالب وقتها كان ما بكتب بالحبر الّا اذا دخل الصف الرابع.
· عشان كدا الطالب بكون ضايق للمحبرة ..اول ما يجبوها ليه ..ويبقى يكتب بالحبر بشعر بي انو اصبح زول كبير.
· وبقى زول فاهم ..ومسؤول.
· شفتوا النظام دا كان كيف في المدارس.
· اي حاجة كانت بي نظام.
· سندوتش الطعمية في السلم التعليمي زمان لو ما دخلت الصف الخامس ما بتكب ليك فيه شطة.
· اي حاجة كانت بي نظام.
· هسع بي مناسبة النظام دا يا جماعة …الواحد بكون شعورو شنو لمن تكون كورية اللبن قدامو ..ويقوم ينوم يخليها وما يتسحر.
· والصباح اول ما يقوم ..يلاقى ليك كورية اللبن قدامو زي (الاستوبر).
· والله تنفقع من الزعل.
· احر حاجة تشيلك نومة في السحور.
· عشان كدا اظبطوا الموبايلات كويس.
· الزمن دا السحور بقى بـ (نجمة تلاتين مربع).
· الجماعة الليل كلو في الواتس اب ما بنومو.
· عشان كدا الزمن دا ما في زول بتشيلو (نومة).
· ديل بتسحروا اول حاجة من ثم بنوموا.
· لو نمت قبل السحور ما في ضامن.
· الناس بسحروا وبخلوك.
· عشان كدا احسن تحرس السحور براك اصلو ما تنوم.
· خليك شفت.
· خليك مفتح.
· وكورية اللبن ما تفرط فيها بالساهل.
· الشيء دي ما بتتعوض.
· ولا حاجة.
· ……..
· ملحوظة : اليوم انتهى.
هوامش
· كأس العالم بقي مسيخ.
· لا ايطاليا.
· لا انجلترا.
· لا البرتغال.
· عليكم الله دي كأس هسع وإلا سيكافا؟.
· خسارة كرت ساكت.
· لو عارفين الجماعة ديل بطيروا كان شفنا لينا (اريل).
· ولا كان في داعي للكرت.
· كنا حولنا (الطبق) ساكت.
· انتوا تعالوا هنا اخبار انتخابات الهلال شنو؟.
· والله زول شغال بيهم ما في.
· كل الذين يتصارعوا على الهلال الان ..لا جدوى منهم.
· نحن فترنا منهم.
· زي ما مشيت جيت.
· ولا في اي جديد.
· ح نعيد تاني الاسطوانة.
· مشكلة الهلال في اقطابه.
· الكارثة في الاقطاب.
· هم البعطلوا في الهلال …وعاملين فيها كمان بدفعوا للحوافز ..وبتصوروا في الجرايد.
· ديل بدفعوا من اجل الصور.
· من اجل الجرايد …وليس من اجل الجرايد.
· كلام ساكت.
· وعاملين فيها بحبوا الهلال.
· وكل مشاكل الهلال من اقطابه.
· كلما يقترب الهلال من البطولة يعطلونا (الاقطاب).
· ويوزعوا في الصور في الجرايد.
· رمضان السنة دي (29) يوم.
· يعني ما تشيلوا هم ساكت.
· رمضان دا عاوز ليه (7) تلفزيونات ..عشان اي زول يتابع الحاجة البتريحو.
· العاوز كأس العالم يتابع يتابع.
· العاوز مع النصري يتابع.
· العاوز اغاني واغاني يتابع.
· العاوز صاحب السعادة لعادل امام يتابع.
· اي واحد يتابع على راحتو.
· ………
· عاجل : اي زول شالتو امس نومة وما اتسحر يكون الليلة بعاين للساعة عشرة عشرة.
[/JUSTIFY]
وإن طال السفر – محمد عبد الماجد
صحيفة قوون
مقالات ذات صلة
-
-
-
-
-
-
-
-
