الحنة.. زينة.. ومرات علاج.. ما معروف الحنة جاتنا من وين..؟؟.. الأيامات العلينا دي بقت الحنة يفتحو ليها دكاكين وكوفيرات وبيوت.. وظهرت أسماء مشهورة في مجال الحِنّين.. والما اتحننت عندها ما اتحننت.. وخصوصا لو كانت عروس يبقى عرسها ناقص..
والحنة ورسوماتها بقت فن وفيهو فنانات جد جد.. وفيهو متشربكات ساكت.. وهؤلاء أكتر..
كل واحدة عرفت ترسم لها وردة في ضهر كراس المدرسة.. وللا رسمت في إيد جارتها في الفصل قلب وفيهو وردة والوردة مارق منها دبيب.. وجارتا جاملتها وشكرتها وقالت ليها (حلوة والله).. دي تصدق وباكر خلت المدرسة والقراية واشتغلت حنانة..
أعتقد طالما الحنة بقت فن لابد من التعامل معها كفن بصورة جادة.. يعني الحنانة الفنانة ومحترمة رسما للحنة.. ما تحنن أي كراع اتمدت لها.. أو تكون عارفه أنواع الكرعين السودانية وياتو ستايل بينفع معاها..
الكرعين وأعني القدم وجزء من الساق أي الجزء الذي يقع عليه رسم الحنة.. تنقسم إلى أنواع كثيرة.. أذكر منها مثالا لا للحصر.. كراع ضهر أبو القدح.. ودي تكون كبيرة وغليدة وزرقاء ومغبشة وفيها زي شقوق في ضهرها من فوق أصابعين صغار غاتسات في لحم الكراع ما عدا الأصبع الكبير وهو في حركة دائمة.. أها دي دايرة حنة بوضع معين.. وأنا أقترح يخلو الكراع كلها بلا حنة ويحننو الأصبع الكبير دا وبس..
وكراع ضهر البَرَدة.. والبَرَدة هي سمكة بتضرب كهربا.. الكراع دي تشبه كراع أبو القدح لكن أطول منها شوية وأرقّ منها.. وشوية الضهر أملس.. الأصابعين متساويات.. دي أقترح يحننو الأصابعين بس.. ويخلو الباقي والله كريم..
كراع كلب.. دي شبه مدورة ومدبلبة والأصابع واضحة ومتساوية مع رُق واضح في الساق.. دي أقترح إنها ممكن تتحنن كلها.. ولكن باستعمال تقنية الخفج.. تجيب الحنانة كوز كبير تملاهو حنة.. وتغتس الكراع فيهو.. وتخلي الكراع تبيت في كوز الحنة للصباح..
وكراع شنقل طوباية.. دي كراع ما بتعرف ضهرها من بطنها.. كلهن واحد.. دي ممكن تتحنن برسومات هندسية مستوية.. دوائر مثلثات.. مربعات.. شبابيك.. أبواب.. لكن أوعَ الحنانة تخلي باب فاتح علي الشارع.. لأنو ممكن تجي كديسة ضهبانة وتدخل في الكراع..
وكراع كراع عنقريب (ما عناقريب كسلا).. دي بتكون غبشا فيها في الساق زلطات قديمة من كانت الواحدة عمرها خمس سنوات.. تركت آثار واضحة وحُفر بيّنة أها دي يجيبو جركانة ويملوها حنة ويدخلو فيها الكراع وللصباح برضو..
كُراع سيراميك.. أها دي الكراع التستاهل يقيلوا ويقعدوا يرسموا فيها.. يختاروا ليها أحلى الرسومات لو رسموا فيها قلب لو انت واقف جنبها من سماحتو تسمعو يقول (دل دل دل).. ولو رسمو فيها زهور.. تشم للزهور ريحة وتجيب جريدة وتطبقها وتقعد تساكك في النحل ما يرك في الكراع عشان الزهور.. أو أقول ليكم كراع زي دي زاتا لو الحنانة جابت فُرشة جير وعمطتا في الحنة ورشت على الكراع.. برضو حتطلع سمحة..
الباب البجيب الريح- صحيفة اليوم التالي
