كاس العالم في البرازيل.. حدث هذه الأيام العالمي.. قدر مافي قناة تلفزيون تنضم، وقدر مافي اتنين ينضمو ويتونسو في مباراة.. انجلترا طارت وكسرت خاطر مشجعنها.. نيجيريا عندها كواديك.. الأرجنتين ماشة كويس.. إسبانيا اطرطشت.. إيطاليا اتوكلت وراحت اهلها.. والاورغواي ماشة مشي نضيف وعينها حمرا على الكاس.. وكوستاريكا تعافر وشادة حيلها.. وفي حفل الافتتاح شاكيرا غنت.. شاكيرا حردت ابت تغني.. شاكيرا حنسوها عشان تغني.. الجزائر إن شاء الله ما تقمحنا وتكهمنا، وتمشي لي قدام.. دا كلو نضم ونسة ساكت.. علا المخوفني.. قريت انو في حوالي خمسطاشر سعودي اتزوجو برازيلات.. ايام كاس العالم دا.. العرس سمح.. مالو؟ وحلال.. ومافيهو نضم.. في كواستي للبرازيل ومعرفة اهلها وطبيعتها.. شلاقة جلبت عليها.. طالما ربنا ما كتب لي مشية.. لقيت نضم والله ما رضاني.. .لقيت انو في نسوان هناك قاعدات ياكلن الرجال.. في احراش البرازيل في منطقة اسمها “فال دو جاباري” علي نهر الامازون توجد قبيلة “دباباس” البدائية.. نسوان هذه القبيلة.. المرا فيهن تكوس للراجل.. تعرسو.. وبعد ليلة الدخلة مباشرة تاكلو.. “نجم نجم نجم”.. اكل عديل كدي.. واحد من المستكشفين الخواجات عامل فيها حبرتجي وسمح والنسوان بيريدنو.. زاغ من اخوانو.. فقدوهو وكاسوهو.. بعد يومين لقوهو باقي منو النيفة والكوارع بس!! يستاهل.. هو الرمرمة العليهو شنو؟ قالو انهن بيكوسن للرجال من القبائل المنافسة.. أو أي راجل غريب ومطرف يخطفنو.. وتعرسو واحدة.. وتاكلو.. حكمة ربنا قالو المخطوف من القبائل التانية، بالرغم من انو يكون عااااااارف مصيرو يكون مبسوط ويضحك سنين سنين.. ويقضي ليلة العمر وهو فرحان.. وبصلتو يكون يكشنو فيها.!! قيل انهن بيستعملن سحر.. ووحات الله لو ما السحر دا.. العروس ما تعرف للعريس الح يفطرو بيهو تاني يوم دا، ما تعرف ليهو راس من قعر.. .ونقيطة دم واحدة ما تتلقي فيهو.. أريت عرسكن طاير عليكن!
أها أنا خايف على أخوانا في العروبة وفي الإسلام اخوانا السعوديين العرسو من هناك ديل.. تكون نسوان القبيلة ديل اخدن خبر عرفن انو في لمة رجال من كل الدنيا، والخير رقد.. واتسللن ومشن “سان باولو”.. وعرسن منهم.. ومنتظرات كاس العالم ينتهي.. ويقعن اكل فيهم.. لكن هن كان نسوان بالصح ونفسن عاجباهن اتحداهن الياكلن الفريق النيجيري!!
غايتو كان في زول سوداني وعندو قريشات زايدات وقال داير يكملّن في كاس العالم ومشى البرازيل.. نوصيهو من الاستاد للفندق.. ما يتفقلص ويقول داير يتفسح.. وأنا بحب الطبيعة.. ويمش يطمّش.. في الغابات.. وبعدين قالو النسوان ديل عندهن مقدرة شديدة علي جذب اجعص راجل.. الواحدة تجذبو وتعرسو.. وبعدين تاكلو!.. الربنا كاتب لو أكلة في الغربة اليمشي بي هناك ..
أريت عرسكن طاير عليكن!!
الباب البجيب الريح- صحيفة اليوم التالي
