* قدمت شرها على خيرها
* لأنى أرى أنها باعدت بيننا وبعض الشرور
* مجلس المريخ إستطاع أن يسجل هيلمانة من اللاعبين
* فى الفريق الأول وفى الرديف وفى الأشبال
* وللعلم
* التسجيلات جيدة
* ولكن أجودها تسجيلات الأشبال
* مواهب خرافيه وقعت وبصمت للزعيم
* شباب صغار لكنهم كبار من حيث الموهبه
* وده الكلام الصاح
* النادى يكون عندو فرق سنية مليانة مواهب بأعمار مختلفة
* إذا مشينا صاح وإهتممنا بتلك المراحل
* بالتأكيد تانى من بره الا النادر جداً
* فى بيوتنا دى
* البجيب التموين بالجمله
* مشيت الدكان ليهو إلا ساى للونسة
* كل الطبخة بتكون متوفرة فى البيت
* وتنوع كمان
* وبأبخس الأثمان
* وهذا إنجاز يحسب للمجلس
* قارنوا بيننا وبين إخوتنا الأهلة
* رئيسهم قال مفلسين
* قالها عديل كده
* قال تسجيل نيلسون قوم نفسنا
* تسجيل لاعب واحد قوم نفس الأهلة
* ونحنا سجلنا تسعه
* وبنتنفس بكل هدوء
* نستمتع بالنفس الطالع
* ونتمتع بالنفس النازل
* ونتجدع فى المدرجات فى الدورة التانية
* أكيد وبالتأكيد
* نجاحات المجلس فى التسجيلات لن يسكت عليها كثير من الأعداء
* لابد من خلق جو يؤدى الى فشل الجدد
* وطبعاً دى ما بتفوت على زول شفت
* وجمهور المريخ شفت
* ولكننى أثق تماماً فى دعم المعارضة للتسجيلات الماضية
* ما ممكن معارضه فاهمة للدرجة دى تقيف مكتوفة الأيادى من تسجيلات ناديها
الذى تحبه حتى الثمالة
* المعارضة من ناحية دعمت دعمت
* لكن بس يكون سجلتها بفاعل خير
* ما دايرين يروحوا الثواب منهم
* شكراً معارضتنا التى تشارك فى بناء الفريق بصرف النظر عن من يحكم
* دى المعارضة ولا بلاش
* أيها الناس
* حكمت محكمة المريخ على هيثم بالبقاء سة أشهر فى الكشوفات
* الحكم ده أساسى
* حكم وجوبى
* يعنى ما سجن فى حالة عدم دفع الغرامة
* عشان كده الغرامة ماها نافعة
* والداير يدفع غرامة
* يجيبها عمدان مدنكلة للبرنس
* أيها الناس
* هكذا حكم هيثم على نفسه
* بعد سته شهور الخور
* زول بسجلو تانى مافى
* ويبقى دفع تمن سماع قصص ناس قلنا ليهو بودروك
* ما سمع كلامنا
* أيها الناس
* جمهور المريخ أحسن إستقبال هيثم
* وقابله بوفاء
* وهيثم قابل ذلك الوفاء بعد وفاء
* ومخير
* يدفع التمن براهو
* المهم
* ثق تماماً فى إستعانة برهان ومحسن بالرديف
* وفى إستعانتهما باللاعب الجاهز بصرف النظر عن من هو ذلك اللاعب
* لذلك أتوقع إزدهاراً فى التنافس الشريف بين الكبار والرديف على الخانات
* ذلك التنافس بالتأكيد سيستفيد منه المريخ كثيراً
* أيها الناس
* اليوم البكون فيهو اكبر لاعب فى المريخ عمرو أربعة وعسرين سنة
* وخبرتو الدولية ستة سنين
* صدقونى لو لعبونا فى المجموعتين
* والسبعة فرق بتاعت المجموعتين لعبوا ضدنا
* صدقونى بنجيب الكاس من إضنينو
* ودى البداية
* شباب ودماء حارة وغيرة
* والدور والباقى على الجماهير
* تقف خلف أبنائها وتصبر عليهم
* تشجعهم وتقويهم
* وتربيهم على غيرة المريخ والتفانى له
* ووقتها
* بطولة جوية بتجى
* زى ما جات قبل كده
* بتجى تانى
* لكن لو ما جات قبل كده
* زى ناس كده
* ما أظنها بتجى
* فلو الزول قال ليك بديك بونية
* بالتأكيد بتقول ليهو أديت منو قبل كده
* نحنا أدينا مانديلا بونية قدام عين أفريقيا كلها
* أنتو يا روشا أديتو منو؟؟؟
* أديتو الحكم؟؟؟؟؟
* الحكم ذاتو أديتها بونية ولا جلاكسى؟؟؟
* ولا بتنوعوا يا حبيب؟؟؟
* فريق يا ناس يعير لاعبه
* وما يجيب غيره
* ويخلى الخانة فاضيه
* وحق السفر للكنغو ما عندو
* تقول لى كبار!!!!
* كبار بالسن؟؟؟؟
* المهم
* أمس حضرنا كأس العالم
* أسبانيا أخدت خمسة
* ده حالتها ما مشت الكنغو
* كان مشت الكنغو كانت أخدت خمسة وخمسة
* فى الكنغو الكورة بدل واحد كورتين
* واحدة فى لوممباشى
* والتانية على الماشى
* المهم أسبانيا أخدت خمسة
* زى الما حصل شى
* وتجولت بنا الكاميرا
* جابت المدرجات
* ويا ليتها ما جابت المدرجات
* لكن برضو كان الجمال حاضراً
* فكان الذين أظهروا فلكلورهم الوطنى
* بمنتهى الإحترام كان وجودهم
* ويبقى كاس العالم إحتفالاًمحترماً يظهر أدب الشعوب وفنونها المحلية
* لكن أسبانيا أخدت خمسة
* حالتها ما مشت الكنغو
* المهم
* تتذكروا الزول الفلق رجل الراية يوم شندى؟؟؟
* طيب بتتذكروا الحتة الإتجدع منها الحجر؟؟؟
* طيب بتتذكروا انو الحجر كان حجر طاحونة؟؟؟
* أها طيب قارنوا بتاعة رجل الراية يوم شندى وبتاعت عمر بخيت
* الحجرين من نفس المكان
* الحجرين حجار طاحونة
* وجدعهن نفس الزول
* ومجدوعات من المسطبة الوسطى
* من إتجاه الجنوب الشرقى الى الشمال الغربى
*يعنى الزول الجدعهن أشول
* يا ناس أمن الملاعب
* يعنى إلا نوريكم إسمو ولا شنو؟؟؟
* أها
* نجى لى شمارات والى الخرتوم
* أكان شفت يا والينا
* بنتفرج على كاس العالم فى الراديو
* بنشوف فى سماعة الراديو يا والينا
* فالحاجة تولد الإبداع
* بالذات إذا مافى زول بيشتغل بيننا
سلك كهربا
* ننساك كيف وممكن نشوف فى الراديو زى الما حصل شئ
والللللللللللللى لقاء
سلللللللللللللللللللك
في السلك – بابكر سلك
