ونحن على أبواب الخريف.. والمطر والطين والخبوب.. والخفجيبة.. ومساعدة مني لسكان الخرطوم العاصمة.. وعشان ما يشيلو حال الولاية.. وكفاية العليها من هموم وكُبب ونصائب.. أخذت أبحث عن فائدة الطين والخفجيبة.. وفقني الله سبحانه وتعالى إلى أن أضع يدي على العلاج بالطين.. قالوا إن الطين.. “مجموعة من البرفسيورات منهم الروسي ف.ب. فلاتوف”.. فيه علاج لكثير من الأمراض.. أهمها أمراض الروماتيزيوم.. والمفاصل.. لذلك أي زول يخوض في الطين أيام المطر.. يحمد الله كثيرا.. وأصلوا ما ينقنق.. لأنه علاج من حيث لا يحتسب.. وخصوصا كبار السن البيشكو من وجع الكرعين ووجع الركب وتلقاهم ماشين ملولوين.. والواحد إن قعد يكركب وإن قام يكركب.. خلوهم يخفجو في الطين.. ووجع الضهر برضو.. أها دا لو زول ازلق ووقع في الطين.. دردقوهو على ضهرو مسافة.. دردقة في الطين نص ساعة يوميا لمدة أسبوع.. برضو علاج للأوعية الدموية والجلطات الكترت الليام دي.. يعني لو زول في عز المطر قاعد تحت حيطة ووقعت فيهو طينة كبيرة فوق راسو.. يخليها مسااااااافة في راسو ما بتضر.. يمكن تصادف لها جلطة وتغتس حجرها.. برضو الطين علاج للأسنان.. والتهاب الأذن.. وهنا انوه للمثل البيقول “دي فيها طينة ودي فيها عجينة”.. نستغنى عن العجين وخصوصا لما يرفعو الدعم عن القمح ونستعيض عنو بالطين فيصبح “دي فيها طينة.. ودي فيها طينة”.. منها علاج ومنها كأننا ما سمعنا حاجة.. برضو الطين بينفع التهاب البروستاتا.. اتوكلو علي الله واجلطو بس.. ويعالج الضعف الجنسي عند الرجال.. تابع الجلط الاولاني وما تكتر.. وبرضو بينفع انحرافات الرحم عند النسوان. والعجز الوظيفي للمبايض.. والطين برضو للتجميل خطير جدا.. يشد الوشي.. ويديهو رونق.. ويخليهو مشرق.. اجلطي الطين ساعتين يوميا.. وتعالي شوفي النتيجة.. كانت كليوباترا جنها طين تجلط بيهو وشيها.. ومرات كل جسمها.. عندها حمام مشهور بمدينة مرسي مطروح للاستحمام بالطين.. ” طينوزي” حفرة طين.. يملوها ليها طين وتغتس فيها يوم كامل.. وتجي مارقة يمصمصنها الوصيفات.. تبقى سمحة سماحة البنيات لي حدهن.. اقترح افتتاح محلات تجميل بالطين.. (حنان طين للتجميل).. العروس يومين يغتسوها في الطين.. وتجي مارقة.. وقد عرف شعراءنا فوائد الطين التجميلية لكن سكتو عليهو وبقو يقولوهو من بعيد.. قال الحردلو الكبير..
البارح أنا وقصيبة مدالق السيل.. إلى نهاية الدوبيتة
مدالق السيل الحتة المنحدرة البيجي السيل جاري فيها.. والقصيبة “تصغير قصبة” دي واقفة هناك.. والطين حولها.. وبقاها سمحة.. عليه فإن حسناوتنا.. لو لقن طريقة ووقفن في الخيران.. أيام المطر.. بس الواحدة تمسك في حاجة عشان السيل ما يشيلها.. وتخلي موية المطرة بي طينها تصلها لحدي رقبتها.. يومين ورا بعض وتجي مارقة.. تقول لي كليوباترا انتي شنو؟..
اللهم اجعلها أمطار خيران وبِرك وطين وخفجيبة.. وشفاء للناس لا يغادر سقما..
اللهم أهدي ناس الولاية ما يصلحو أي خور ولا يخلو الموية تصرّف.. إلا بعد ما تبقى طين.. ويتعالج بيهو المواطنين الضعفاء.. واجلعها في ميزان حسناتهم!!
الباب البجيب الريح- صحيفة اليوم التالي
