“””””””””””””””””””
صلاح محمد عيسى قدم (الفريع البان) بلحن موغل في (الرومانسية)…وطريقة أداء صلاح للأغنيات متل شاي المغرب
“””””””””””””””””””””””””
عبدالعزيز محمد داؤود هو سلطان الطرب يبلغ بأغنياته حد (السلطنة) التى تجعلك تهوم في الطرقات تسأل عن بيتكم ورقم تلفونك
“”””””””””””””””””””””””””””””
قدم الأغنية من بعده محمود عبدالعزيز (حوت) الأغنية السودانية فحاز بها على الجمال كله ..وأسكنها في (فسيح) صوته (الصخري) العتيق و(رفوفه) المخملية البضة
“””””””””””””””””””””””””””””””
·قبل سنوات طويلة كانت (الحفلة) بتبدأ بـ (يا فريع البان اليسوح نديان والله يا سلام).
·ما في زول بقعد ليه في كرسي مع (الأغنية) دي.
·الناس كلها جوه الدارة.
·اتذكر ذلك جيد أي واحد ينفض ليه (كرسي) ويقعد فيه…تمشي تبشر للعريس تلقى في زول قعد في الكرسي حقك.
·الواحد ما يبارك يعني.
·واتذكر (زمن الدنيا بخيرها) أن حفلات زمان كلها كانت في (برد) يلخم.
·ما عارف (الفلسفة) شنو في الحكاية دي؟.
·البرد يلقط في (النخرين) زي البلح.
·زمان كانوا بقولوا ليك برد يقطع (النخرة).
·هسع البقطع (النخرة) البعملوا فيه ناس التلفزيون ديل.
·من غرايب أغنية (الفريع البان) أنها قدمت صلاح محمد عيسى عندما كان يافعاً.
·صلاح محمد عيسى قدمها بلحنه الموغل في (الرومانسية)…وطريقة أداء صلاح محمد عيسى للأغنيات متل شاي المغرب.
·فيها ذلك الأنس والإلفة ..واللمة ورشة الحوش الكبير.
·صلاح محمد عيسى كان (أعزلاً) من كل شيء إلا من أغنياته التى كان فيها من (اللطف) ما يجعل (الخلايا) الميتة تعيد تكوينها لتكون خالية نشطة.
·تشحتفوا الروح.
·عاش صلاح محمد عيسى مؤمناً بقضيته الفنية ورسالته التى قدمها عبر السلم الخماسي مع تأثره الواضح بالمدرسة المصرية السافرة في الألحان الشرقية الجميلة.
·دا نظام براهو.
·وقدم في سنواته الشعبية الحافلة ، وعبر (الرق) الفنان محمد أحمد عوض أغنية (الفريع البان) فأضاف للأغنية الحس الشعبي الذي كان يبدع فيه محمد أحمد عوض بصورة تجعلك تحلق بعيدًا في فضاء رحب.
·تمرق من روحك وتخش غرف حواسك غرفة غرفة.
·العزلة التى يتحدثون عنها ..تنفض (الشوق) في أكمام القميص (عشان كدا أكمام القميص بتكون بلون داكن من الشوق).
·محمد أحمد عوض هو صاحب (يا ريت يا حبيبي يا ريت تبقى لي وتكون من نصيبي وتنسى المر بي).
·زمن!!.
·الأغنية أيضاً فيها من اللطف ما يجعلك تقفل (المروحة) عشان لو اخدتك الهاشمية ، وشالتك (هوشة) وقفزت طرباً (المروحة) ما تضربك.
·اذكر أن الحاجة لها الرحمة والمغفرة كانت من خوفها علينا تنبهنا بين الفينة والأخرى وهي تصرخ (المروحة).
·والمروحة مقفولة ولكن خوف الوالدة أعرض من سكنة المراوح وشغف أجنحتها الحديدية الساكنة.
·يا!!.
·لكن الحديث الان عن (الفريع البان)…وهي أغنية قدمها أيضاً وتجلى فيها بصوته (الحرجلي) القاتم بالطرب (العجوي) عبدالعزيز محمد داؤود.
·الله.
·وعبدالعزيز محمد داؤود هو سلطان الطرب يبلغ بأغنياته حد (السلطنة) التى تجعلك تهوم في الطرقات تسأل عن بيتكم ورقم تلفونك.
·لعبدالعزيز محمد داؤود قوة تطريبية يحركها على كل (حرف) حتى أن حرف (الألف) عند عبدالعزيز محمد داؤود مثل (كيلو الباسطة).
·تتمدد فيها حد (الكروعة).
·الحرف (طريّاً)عند عبدالعزيز محمد داؤود حد أنه يمكنك أن تملأ من نداوة الحرف عنده (جركانة) لبن.
·ثم تهز من الفرح (عصبك) الداخلي حتى يتدفق (طربك) في خشم الباب…وتمرق على حسك.
·والحديث عن (الفريع البان) هذه الأغنية المشحونة بالطرب مثل (لواري ود البخيت) في (بقروسي) عندما تئن من ثقل (البرتقال) وهو يتساقط من (الهينو) فنتلاقفه على أنه صيد ثمين.
·الفريع البان قدمنها البلابل بصورة استعراضية فيها إرث شعبي جميل وهن في بداياتهن الفنية – الفيديو والأغنية يمكن أن تحصل عليها في (اليوتيوب) الان إذا كتبت الفريع البان البلابل تسجيل قديم.
·وقتها كانت الدنيا سهلة ..تمتد بالبساطة ـ لا فيها مشقة ولا تعب ..ولا ضفر ولا بله جابر.
·ولا تلفزيون السودان.
·الأغنية قدمها أيضاً بسلطنته الفخمة كمال ترباس …وهل يمكن لترباس أن يتجاوز أغنية بهذا الطرب وهو صياد للأغنيات.
·وقدم الأغنية من بعد محمود عبدالعزيز (حوت) الأغنية السودانية فحاز بها على الجمال كله ..واسكنها في (فسيح) صوته (الصخري) العتيق و(رفوفه) المخملية البضة.
·إذا سمعت الأغنية بصوت محمود عبدالعزيز سوف تجد نفسك قد صرف ليك بكت شاي وبكت بن وبكت من تومين السكر.
·سوف تصرف ليك كل هذه (الحصص)….زهواً بصوت محمود عبدالعزيز (المتعتق) مثل كثبان الرمال في تلال الأبيض في فصل الخريف وهي تكتسي بالخضرة.
·حفلات زمان كانت تبدأ بـ (الفريع البان) عشان الأغنية كانت بتطلّع البنات من الغرف …وتلم ليك الأولاد من الحيشان ليحلقوا حول الفنان وهو يغني في (الفريع البان).
·وبين الفينة والأخرى..يمسك (المايك) زول (شفت) أو هكذا نحن كنا نتخيله ..زول دشن ..سمين وعنده عضلات وصوته (اخرش) يقول بصوت واضح وقاطع : (يا جماعة الفاصل القادم للبنات الأولاد يطلعوا لينا بره).
·بعد أي أغنية زولكم دا بمسك الفاصل وبقول : (يا جماعة الفاصل القادم فاصل للبنات الأولاد يطلعوا لينا بره).
·في ذلك الوقت الحكمة التى كانت سائدة كانت بتقول : (الحلة بصلة).
·اتذكر أن أحد الطلاب طلعوه في طابور الصباح عشان يقول لينا حكمة ..قام قال : حكمة الصباح (الحلة بصلة).
·نحن في ذلك الوقت صفقنا ليه عشان افتكرنا هذه الحكمة جاءت إلينا مع الحكم الاغريقية القديمة.
·إلّا أن الأستاذ غضب وقتها من تلك الحكمة وقال لزميله استاذ الجغرافيا : (أنت عارف مثل هذه الحكم هي البتغلي البصل وبتخلي سعرو يولع نار).
·وكان وقتها قبل ظهور (الواتس آب) ودوشته كانوا بقولوا إن (الفول زيت).
·الله.
·هسع الفول بقى حاجة تانية.
·مثل هذه (الحكم) أشاعها بقصد (العزابة)..هم أصحاب هذه الثقافات ..ولهم في ذلك (فضل) شيوعها.
·الحكمة الثابتة والراسخة الان بنقولها ليكم هي أن الهلال (مدرجات).
·نحترم صديق منزول.
·نحترم جكسا.
·نحترم عزالدين الدحيش.
·نحترم مصطفى النقر.
·نحترم منصور بشير تنقا.
·نحترم طارق أحمد آدم.
·نحترم عمر بخيت.
·لكن (معليش)..روعة الهلال وسحره وجماله وقوته في (المدرجات).
·الإبداع كلو في (الجمهور).
·وسر الهلال في جمهورو.
·ومباراة الجمعة معليش ..لا مباراة مجلس ..ولا مباراة مدرب ولا مباراة لاعبين ولا مباراة إعلام.
·مباراة الجمعة هي مباراة الجمهور.
·جمهور الهلال عندما يكون حاضراً بقوة ..وعندما تمتلأ المدرجات يكون النصر حليف الهلال.
·جمهور الهلال قادر على التهام كل الخصوم ..إذا هتف اهتزت الأرض ..وإذا شجع تحركت الأرض تحت خصوم الهلال.
·في هذا الجمهور كل السحر ..وكل الروعة ..وكل النصر.
·نحشدكم لمثل هذا اليوم.
·ونأتي إليكم ..لنمتليء (فخرًا) بالهلال العظيم وهو يجندل منافسي الهلال.
·جمهور الهلال قادر أن يكون في الموعد يوم (الجمعة)..هبّوا على استاد الخرطوم ..انطلقوا نحوه بالفرح والقوة والشموخ.
·تعالوا إليه …النصر يأتي معكم ..ويحضر بحضوركم فلا تتخلفوا عن هلالكم.
·هذا هلالكم في حاجة إليكم فلا تغيبوا عنه ..ولا تتخلفوا دائماً انتوا في الموعد.
·سوف نبدأ حفلتنا يوم الجمعة بـ (الفريع البان)..سوف يتغنى لنا بها في ذلك اليوم نزار حامد (الصاقعة).
·وناس (بشه) هناك يصفقوا.
·والجمهور (بشيل) مع جمعة وبشه ونزار ومهند الطاهر.
·عاوزنها تبدأ بـ (الفريع البان) ..يعني شنو؟.
·أقول ليكم.
·يعني الهدف الأول بيجيبو (نزار حامد).
·كدا حفلتنا ح تكون بدأت بـ (الفريع البان).
·أول انتوا فاكرين شنو؟.
·فاكريني من الصباح بتكلم ليكم عن (الفريع البان) دي ساكت.
·يا جماعة أنا بتكلم ليكم عن (الفريع البان) دي على نظام أن الهدف الأول ح يجيبوا نزار حامد.
·وأظن بعد الهدف الأول ..ح يمسك الزول (المايك) ويقول للجمهور ..الفاصل التاني للعريس.
·والعريس هو مدثر كاريكا.
·تطلعوا تخلوا الدارة لي مدثر كاريكا يعمل فيها زي ما عاوز.
·ما عاوزين أي جوطة.
·ما عاوزين أي لخمة.
·ما عاوزين أي لخبطة.
·الفاصل التاني فاصل العريس ..يعني فاصل (مدثر كاريكا) ..يعني الهدف التاني ح يجيبوا (مدثر كاريكا).
·انتوا يا جماعة إلّا يقولوها ليكم عديل كدا.
·يشرحوا ليكم الحكاية ألف مرة.
·أصلو ما بتسمعوا الكلام.
·والله تكتروا الكلام أجيب ليكم (الطحنية).
·وانتوا عارفين لو دخلت ليكم (الطحنية) للصباح ما بتمرقوا مني.
·ما تخلونا نقعد (نتفلسف) فيكم ساكت.
·الموضوع واضح.
·الناس بس بتغالط ..وبتتكلم كلام بره رأسها.
·كلام شنو؟.
·أنا عارف.
·ملحوظة : كدا نكون قفلنا ليكم موضوع (الفريع البان) دي يا جماعة.
هوامش
·مجلس إدارة نادي الهلال أثبت فعلاً أنه (لجنة) ملقطنها زي (الدوم).
·ديل أي واحد في حكاية (سيرجيو) طلع ليه بتصريح براهو.
·الرئيس يصرح في حتة.
·وحمدان يصرح في حتة.
·وعمر النقي يصرح في حتة.
·يا لجنة تسيير الهلال اعملوا ليكم قروب في (الواتس آب) عشان تصريحاتكم تكون واحدة ..بدل ما تنشروا لينا كدا بتصريحات ضاربة.
·دا علي حمدان الدخل أول أمس قعد يصرح براهو.
·يا جماعة (اتحاد الغناء الشعبي) دا وحدوه لينا.
·نحن ما ناقصين.
·وما فايقين الأيامات دي مع طيران المريخ ..مع (الخرمجة) البتعملوا فيها دي.
·خلونا نركز مع طيران الوصيف.
·ما تجهجهوا (المربوطة) حقتنا ساكت.
·موسى الزومة قالوا ليه كلامك بقى كتير.
·قال ليهم (الشطب) بعمل اكتر من كدا.
·الجمعة جمعة جمهور الهلال.
·إن شاء الله نكتب يوم المباراة جمعة الجمهور.
·فيتا كلوب ما في زول بقدر عليه غير الجمهور.
·جمهور الهلال في الملعب.
·ما عندنا أطراف.
·لكن عندنا (مدرجات).
·تاني المشكلة في شنو؟.
·الليلة (خصخصنا) ليكم (الفريع البان)…تاني كل فترة كدا ح نعمل (خصخصة) لبعض الأغاني السودانية الخالدة.
·انتوا لو بتصبروا ما بتجيكم عوجة.
·والله الحبة ما تجيكم.
·جمال الوالي شكلو قرب يزعل.
·جمال الوالي شوية كدا ..ويمشي يقعد في بيتو.
·الزول دا اقترب من قفلة التلفون.
·زول يطير من سيكافا عاوزين بيه شنو؟.
·نحن صلاح إدريس بدون طيران من سيكافا قفلنا عليه السكة.
·صلاح إدريس لو كان طيّر الهلال من سيكافا ..كان في الأهلي شندي ما بنديه فرصة.
·يا جمال الوالي فريق (فداسي) يحتاج لك.
·….
·عاجل : انتوا وقت (أطهر) ما بتقدروا عليه ..البخليكم تسجلوا هيثم مصطفى شنو؟.
[/JUSTIFY]
وإن طال السفر – محمد عبد الماجد
صحيفة قوون
مقالات ذات صلة
-
-
-
-
-
-
-
-
