ندى القلعة : أنا هلالابية وما داساها

قادت فنانة الجماهير الاولى ندي القلعة التشجيع من المدرجات لرفع الروح المعنوية لدي نجوم الهلال في مباراة الديربي الافريقي التي جرت احداثها امسية امس الاول التي تغلب فيها الهلال علي المريخ بثلاثية ديمبا والمعلم عمر بخيت وايفوسا
ندي القلعة كانت حضورا في المدرجات ومعها عملاقة الفن النسائي حواء الطقطاقة وابنها وائل للوقوف خلف الهلال في هذه المباراة التي توجت مجهودات اللاعبين الي تحقيق هذا النصر التاريخي الكبير وعقب اللقاء نزلت ندي القلعة وابتهجت وعبرت عن فرحتها مع نجوم الهلال وجماهير الهلال من جمهور فنها ووجدت صعوبة في الخروج من ملعب استاد الهلال وكانت عربتها اللاندكروز تتحرك ببطء من مدينة ام درمان وحتي وصلت الي الخرطوم بعد معاناة شديدة حيث كانت جماهيرالهلال وبكثافة تشل حركة سيرها في مسيرة فرح صاخبة واخيراً وصلت فنانة الجماهير الي مكاتب قوون التي تعودت وبعد كل مباراة للهلال علي المستوي الافريقي والمنتخب الوطني ان تجئ بنفسها قاطعة مسافات بعيدة للاحتفال مع اسرة تحرير قوون مع كل فوز وانتصار.. ولكن هذه المرة جاءت وهي فرحانة فاستقبلنا ضيفتنا وكانت فرصة للجلوس معها في حوار غير مبرمج بدون اي مواعيد حتي نوع الاسئلة التي طرحناها لها كانت من خلال اجواء المباراة ومادار فيها من احداث.
فكانت اجابات ندي القلعة كما عودتنا صريحة وبكل تواضع.
انا زولة هلالبية وماداساها والمشكلة في شنو؟
قلت لها تغنيتي للهلال والمريخ باغنيات جميلة اصبحت محل اهتمام
كل الناس ماهي ميول ندي؟
ردت قائلة.. هي دي دايرة ليها سؤال انا هلالابية موت وعلي السكين وماداساها علي زول دي حاجة والحاجة الثانية دي ما اول مرة اقيف فيها مع الهلال في مبارياته المهمة لذلك درجت علي الوقوف خلف الهلال في كل مبارياته الافريقية واردفت الحديث قائلة: انا لست من انصار بعض الفنانين في كتم السر عن الميول بدعوى ربما يكون لذلك تاثيرعلي فقدان عدد من جمهور فني فالحمد لله انا من اسرة هلالية وافتخر بانتمائي للهلال مدرسة المبدعين.
دي اول مرة اخش فيها هلال مريخ
انتي متعودة اذا علي دخول هلال مريخ؟
لا لا والله.. دي اول مرة ادخل فيها مباراة للهلال والمريخ ودي من المباريات الصعبة ودائما مايكون فيها شد وجذب واعصاب وتوترات ومشاحنات لكن اقول ليكم حاجة دخلت الكورة لانني كنت واثقة من فوز الهلال الاكثر جاهزية للمباراة لانو الهلال ولظروف ما خسر مباراة نيجيريا امام كانوبيلارز النيجيري والهلال دائما في مسيرته في البطولات الكبيرة لايخسر مرتين.
عبارات الجمهور عادية.. وما مهتمه بالموضوع كثيراً
انا لاحظت حاجة،، جماهير المريخ وجهت لك اساءات كثيرة في مباراة هلال مريخ الاخيرة وحكاية الشريف؟ الحكاية شنو؟
الحكاية عادية جدا في هذا الوقت بالتحديد لا استطيع ان احكم ان كانت تلك هي اساءات لان جمهور فني بمختلف انتماءاتهم للهلال والمريخ يحبون اغنياتي ويدندنون بها ويحبون ندي القلعة حبا.. العبارات التي صدرت من بعض جمهورالمريخ وقتها كان الهلال متقدما علي المريخ بهدف اللاعب ديمبا في اثناء المباراة في لحظة اعتقد ان هذه الجماهير لم تستطع السيطرة علي نفسها وهي تري فريقها متخلفا بهدف لذلك انا ما مهتمه بالموضوع كثير.
حبي لبيت المال كبير والحب للهلال قائم
طيب انتي علي اي اساس اصبحت من اعضاء نادي بيت المال.. وانت هلالابية؟
ايوه انا بحب بيت المال واهلي فيها وانتمائي لنادي بيت المال لايؤثر علي انتمائي وحبي للهلال بل لايغير فذلك يمكن ان يحدث.. واهلي واحبابي في بيت المال وايضا هناك عدد كبير منهم انتماءاتهم هلالية واخرون لهم انتماءات مريخية ولا اعتقد ان هناك مشكلة في ذلك وانا زولة مثقفة والحمد لله دي نعمة كبيرة من الله احترم جمهور المريخ فهو لم يسيطر على نفسه في المباراة بعد الهزيمة.
اصطحبت حواء الطقطاقة وابنك وائل
هل كنت واثقة من فوز الهلال علي المريخ؟
دي حقيقة كنت واثقة علي هذا الانتصار وكنا قد استعدينا للمباراة من خلال اصطحابي لخالتنا حواء الطقطاقة وكمان معاي ولدي وائل يرتدي شعار الهلال وجلسنا في المقصورة منتظرين الدقائق تمر حتي يكتب الله للهلال الانتصار في ذلك اليوم السعيد.
واضافت ندي القلعة في سردها للحديث فريق الهلال فريق احلام وفريق منظم يضم لاعبين اصحاب مهارات وخبرات كانت واضحة في سحب البساط من المريخ وقد كان..
القلعة: مقبرة الابطال لو قنعان تعال عمل فني جديد سيري النور قريبا
في الاخبار لديك عمل فني للهلال متي يري النور؟
هناك عملان فنيان علي وشك الانتهاء منهما سيريان النور عما قريب ، العمل الاول هناك اغنية تقول كلماتها: استاد الهلال مقبرة ابطال لو قنعان تعال.. اما العمل الجديد الاخر لمهند الطاهر تقول كلماتها : هوبا ياهوبا.. كورة حلوة مقلوبة.. انتو مستعجلين مالكم. حتسمعوها قريب الشفقة في شنو!!
سحب الثقة ليس بهذه السهولة
طيب ماخايفة ياندي تفقدي جمهور فنك من المريخاب؟
ضحكت ثم اجابت قائلة: انا فنانة لي احساس بل احاسيس ومشاعر وانتمي الي قبيلة رياضية واسرتي هلالابية كما ذكرت لك في فقرة سابقة وماشايفه عيب.. الفنان بطبعه زي لاعب الكورة معرض لحاجات كثيرة واستفزازات وانا زولة قومية قاعدة اغني للسودان في مباريات المنتخب واخلاقي السمحة تجعلني اقول لجمهور المريخ دا ماكان يوم المريخ.. وهذه هي كرة القدم يوم ليك ويوم عليك
برجع تاني لسؤالك.. دي ماعندها علاقة لانو الجمهور الفني يختلف عن جمهور ناس الكورة ومايحدث عندكم لانو الجمهور لايسحب الثقة من فنانه المفضل بهذه السهولة لكن دي كورة.
جيت قلبي تقيل
ياندي طيب شعور وصولك الي استاد الهلال ؟
حقيقة دخلت استاد الهلال وانا مطمئنة وجيت قلبي تقيل.. قاطعتها في الكلام.. يعني شنو.. وماذا تقصدين من هذه العبارة؟ اجابت يعني واثقة من فوز الهلال وزاد اطمئناني في وجود الكم الهائل من الجمهور الهلالي الذي كان ياخذ مواقعه بداخل الاستاد فقلت في نفسي لحظتها معقولة الهلال دا يخذل الجمهور ده كلو.
بحبك يا هلال.. وبموت فيك يا قوون
كلمة اخيرة ياندى؟
في كلمتي الأخيرة اشكركم علي هذه الدردشة واللقاء السريع دا وانتو ماقاعدين تقصروا ياناس قوون دائما قاعدين تقيفوا في اللحظات الحاسمة مع الهلال ولكم تاريخ ناصع في وقفاتكم القومية مع المنتخب الوطني وانا بقول ليكم رمضان كريم وكل سنة وانتو طيبين وربنا يديكم الصحة والعافية واقول ليكم حاجة قبل ان اودعكم وانا ذاهبة الي بيتي لاحتفل بهذا الانتصار.. بحبك بحبك يا هلال ياعسل ياكل جمال.. وبموت فيك ياعزيزة ياقوون.
سكرتير تحرير قوون مبسوط مع ندي القلعة
من خلال اجراء هذا الحوار رأيت سكرتير تحرير قوون اخونا الكبير الاستاذ احمد الحاج مكي يبادل الفنانة ندي القلعة في حب الهلال وكان يبادلها بقفشات مضحكة في وجود عدد من الزملاء الصحفيين بقوون والاسرة الرياضية بحي يثرب وعدد من الاطفال حيث كانت لحظات ممتعة بحق وحقيقة.

صحيفة قوون