من النادر ان تجد ممثلا او لاعب كرة يتفرج على عمل درامى او تسجيل لمباراة قد اداها فقد ينظر لها حينا بعين الناقد واخرى بعين المتفرج..وجدنا الممثل الكوميدى محمد عبد الله موسى فى امسية رمضانية مندمجا فى الفرجة على احدى حلقاته الدرامية فى التلفزيون..قلنا وقال:
– يازول بتتفرج على نفسك مالك؟
عادى بعد التخرج من الجامعة بقيت اتعمد اقعد اشوف شغلى فى التلفزيون.
زمان مابتتفرج ليه؟
الفهم ماكان زى حسى ..كان بسجل وخلاص واليحصل يحصل.
-وحاليا؟
بتفرج عشان اجود شغلى.
– ممكن تضحك لمشهد اديته؟
كتير كتير.
– بتشعر بتقصيرك فى الاداء؟
مرات ..مره مثلت دور زول شايلو حمار نوم لمن جيت اتفرج لقيت فى حتة معينة لو كنت هنقت وانا ماشى كان احسن!
-فرجتك لنفسك ناقد ام مشاهد؟
ناقد.
– من اساسو الجابك التمثيل شنو؟
ماصدفة منذ طفولتى كنت بمثل فى المدرسة شافنى مكى سنادة مره قال لى بتنفع ممثل.
– وغير التمثيل اشتغلت شنو؟
بعت اكياس فى السوق وملابس واشتغلت طلبه وكمان بناء شاطر جدا
– دى مهن شظف وجادة وانت كوميديان ؟
منو القاليك انا ماجادى..الا فى المسرح بس لكن بره صعب خالص
– المهن دى استفدت منها ايه فى حياتك الدرامية؟
استطعت تقمص الادوار الشعبية باجادة نقلت حياة الناس ديل للمسرح بدون مشاترة.
– منو من زملاك بخاف يتفرج على نفسو؟
زميلنا عبد الفتاح احمد الشيخ.
– والبخاف من النقد؟
عوض شكسبير.
– وآخر يعجبه الاطراء؟
جمال حسن سعيد.
– مهنتكم دى مغطية معاكم؟
بحب الناس ..الا تنتج براك حتن تغطى معاك غير كده خليها مستورة.
– بعدين اتجهتوا لمسرح النكتة؟
فى غياب فى كتاب المسرح ..ازمة عديل كده الظروف الحياتية طيرت الناس من على الخشبة.
– انتم والاعلان التجارى ؟
الممثلين النجوم ديل فى العالم مطلوبين لتسويق المنتجات ..بس هنا نجومية ماعندنا ..لكن هو فعلا بيخصم من شخصية الممثل الدرامية.
الراي العام
-
-
-
-
-
-
-
-
