* فريق الأهلى القاهرى لكرة اليد ماشى الكتغو.
* ماشى مع الزمالك لكرة القدم فى طائرة واحدة.
* ماشى علشان يلعب السوبر الأفريقى لليد.
* ماشى يلعب ضد الترجى التونسى لكرة اليد.
* وبعد ده نحنا نقول عندنا أندية كبيرة.
* نفكها فى روحنا.
* كبار قال.
* الأندية الكبيرة هى التى تجدها فى نهائيات البطولات القارية ممثلة
بعدد من المناشط.
* أسى الهلال فى المجموعات.
* أين سلة الهلال؟
* وسباحة الهلال؟
* وكرة يد الهلال؟
* وتنس الهلال وريشة الهلال الطائرة.
* وأين وأين وأين.
* ناس شتر نحنا.
* الرياضة عندنا كرة قدم فقط.
* وحتى كرة القدم ما ناجحين فيها.
* لأننا لا نملك إستراتيجية واضحة.
* بلد فيها خرطمية ولاية.
* وفى كل ولاية وزير رياضة.
* يبقى خرطمية وزير رياضة.
* ووزير إتحادى.
* ووزير دولة.
* وما عندنا ولا منشط غير كرة القدم.
* قاعدين سااااااااى.
* ويا ريتنا لو قاعدين فوق راى.
* قاعدين بدون راى.
* نعرف للشكل فى دخول لجان الإتحادات.
* ونعترك حتى الثمالة لدخول اللجنة الأولمبية.
* وإذا سافرت بعثة أولمبية لتمثل البلاد.
* بكون فيها حداشر إدارى ولا عب واحد.
* خجلتونا ياخ.
* لجنة اولمبية ليه.
* مناشط وإتحادات عامة وإتحادات ولائية ليه.
* الموضوع ده داير بحت شديد.
* وجاك الموت يا تارك الصلاة.
* حا نبحت لامن نحير الفار ذاتو.
* كتلتوا المواهب.
* طفشتوا الكوادر.
* وأولادنا يرفعون أعلام دول أخرى مجنسين محققين لتلك الدول
النجاحات الرياضية.
* مغستونا ياخ.
* لكن برجع ليكم.
* إتحاد إتحاد.
* منشط منشط.
* لجنة أولمبية لجنة أولمبية.
* إصبروا بس.
* المهم.
* فرحنا بقرار مجلس المريخ بالإستعانة بأولاد الرديف.
* وللحفاظ على الغابات مخضرة.
* وموجودة.
* وللحفاظ على الغطاء النباتى موجوداً.
* الناس الفاهمين.
* بزرعوا شتلة تحت أى شجرة.
* عشان يوم يقطعوا الأشجار الكبرت.
* ما تكون الأرض صحراء.
* تكون الشتول قاعدة حلالالالالالالاته.
* شجيرات سرعان ما تبقى أشجار كبيرة وجميلة.
* ولذا.
* خيراً فعل مجلس المريخ بغرس شتلة تحت أى شجرة.
* ولكى نحمى شتولنا.
* يجب ان نزرع معاها واحد من الذين راعوا تلك الشتول فى مهدها
فى المشتل.
* أيام كانت مزروعة فى الأكياس.
* أيام كنا بنخاف عليها من الهواءحتى يقوى عودها.
* أقصد من ذلك.
* ترفيع احد الفنيين الذين رافقوا الرديف من الأشبال.
* جندى وعاطف منصور.
* الأولاد ديل كبروا فى إيدينهم.
* حماية ووقاية وحفاظاً ليهم.
* يجب ان نرفع معهم واحد من كبارهم.
* لأن من تمرد على رئيس النادى.
* لايصعب عليه التمرد على طموحات الجماهير.
* وخلق جو متوتر وغير معافى لأولاد الرديف.
* يكرههم فى اليوم الجوا فيهو المريخ.
* وبالذات ديل الشتلات المزروعات تحت الشجر الكبار.
* غيرة ساااااااااااى.
* تقع فيهم شجرة مهوقنى توديهم سابع أرض.
* شجر المهوقنى ده تقيل شدييد.
* المهم.
* الهلال سجل برازيلى.
* شفتوا فى الصورة.
* ماسورة.
* أمسكوها منى.
* الزول ده قدر عطا المنان.
* ذكرنى كواريزما.
* الزول ده لو شاف ناس مازيمبى جاريين سااااااى.
* نفسو بقوم.
* نفسو بقوم البرازيل طوالى.
* غايتو الزول ده يا صاحب كامبوس.
* يا قرا معاهو.
* يا عديلو.
* الزول ده ما صغير أبداً.
* ده الفرش السرير التانى ذاااااااااااااتو.
* أيها االناس.
* الأسد عفص ضل القرد وقع براهو.
* كلما أشوف قون أتير من الكرة العكسها تراورى.
* أتذكر قصة الأسد والقرد دى.
* الخوف بيعمل أكتر من كده.
* أيها الناس.
* غداً كلنا راجيين رضا.
* دايرين نعرف.
* التسلل والتداخل وهدف الهلال.
* الجمعة إلا تطيروا فوووووو فى السماء دى.
* أيها الناس.
* رئيس النادى وعد بتغيير كبير وحتمى فى فريق كرة القدم.
* هذا التغيير بالتأكيد شعاره المجرب لا يجرب.
* وقرار الإستعانة بالرديف بخلينا نتأكد من صرامة القرار.
* المطلوب شفافية ووضوح فى قرارات الإحلال والأبدال.
* المطلوب إدارة كرة قوية تستطيع أن تعيد تربية اللاعبين على
إسس المريخ.
* تستطيع ان تقتلع التمرد والفوضى وعدم المسؤولية.
* وحاتم عبدالغفار قدرها.
* أتركوا له إختيار معاونيه.
* أها.
* نجى لى شمارات والى الخرتوم.
* أكان شفت يا والينا.
* الخريف قرب يجينا.
* والرطوبة ماسكانا يا والينا.
* لا بنقدر نعوم.
* لا بنقدر نخوض.
* ولا بنقدر على البشتنة.
* السيل جايينا جايينا.
* بدل تحفروا لينا يا والينا.
* أحفروا لينا.
* الضبان خلوهوا لينا.
* نضمن السارس ما يجينا.
* لكن الباعوض أكتلوهوا يا والينا.
* بكمل عليكم باقى الدم الفينا.
* باقى الدم الفضل لينا.
سلك كهربا
ننساك كيف وباقى الدم الفضل لينا فحص ما بتم يفحص لينا
والللللللللللى لقاء
سلللللللللللللللك
في السلك – بابكر سلك
