“””””””””””””””””””””
بكري المدينة (ضنب العقرب الما بنمسك في اﻻيد)
“””””””””””””””””””””””””
مدثر كاريكا (فرخ أم صنقر الصايد البلد قديد)
“”””””””””””””””””””””””””””””
سيرجو جاااااكم …تاني لا ضفر لا سلك ما بقعدوا ليكم
“””””””””””””””””””
· زمان كان بسألونا في امتحان الجغرافيا عن عاصمة فرنسا…كان بنقول (باريس).
· بي ثقة ..تقول شفناها.
· زمن الجغرافيا جغرافيا …قبل ما تبقى الجغرافيا هسع كلها (واسطات).
· ديل دخلوا (الواسطة) في الجغرافيا.
· هسع المقرارات غيروها ..لو قلت (باريس) بيدوك غلط.
· لو جبت ليهم (باريس) هنا في الكلاكلة بيدوك غلط.
· ويقولوا ليك دا (المقرر) الجديد للجغرافيا.
· لو قلت عاصمة فرنسا (انجمينا)..يمكن يدوك صاح في زمنا (الاشتر) دا ..شقلبتوا لينا اي حاجة (المنقا) بدل المنقا بقت تشيل (قرع).
· (والله القرع بالكسرة حاجة ما تخلص).
· يا جماعة السطر الفوق دا فلت مني من غير ما اشعر ..(شيلوها برة).
· اعتبروا نفسكم ..ما قريتو.
· اي حاجة اتغيرت.
· حتى عاصمة فرنسا.
· زمن!!.
· زمان …كانوا بقولوا لينا في (الجغرافيا)…الامطار بتجي في الخريف الذي يبدأ من منتصف شهر يوليو وبستمر حتى سبتمبر.
· هسع المقرارات غيروها المطرة ذاتها بقت ما بتجي في الخريف.
· الحكاية اتلخبطت.
· الخريف يجيك في الصيف ..والصيف يقلب شتاء..والشتاء ما في اصلا ..(انتوا شفتوا البرد البنزل في الليل دا).
· الحكاية اتغيرت ..حتى في الفصول.
· المناخ ذاتو اتغير …(الجماعة ديل عملوا شنو في المقررات).
· عندنا زول مشى الدهب ..رجع (فيلسوف).
· امو زعلت ..قالت ليه انت الناس المشوا الدهب كلهم جوا عرسوا ..وجوا بالاموال والقروش ..انت تمشي الدهب تجيني (فيلسوف).
· طبعا نحن عندنا معتقدات في الحلة ثابتة …الفلسفة عندنا حاجة ما سمحة.
· الزول وقت يكونوا عاوزين يشيلوا حالو ..بقولوا ليك الزول دا (متفلسف).
· وكمان لو عاوزين يقطعوها معاه ..بقولوا ليك عنو (متفلسف وحق الفطور ما عندو(.
· الفلسفة دي يا جماعة تاني بثبتها ليكم في العمود دا …(زي الروسي).
· عندنا روسي زرع ليه (نخلة)..قالوا ليه بعد (6) سنوات بتجيب ليك (بلح).
· قال ليهم : ليه؟…بلح قاري طب اصلو ..البتجيبو لي بعد (6) سنوات.
· روسي لديح ..النوع البكشح ليه (ملوة) شطة في الفول وقت يكون عاوز يفطر.
· زول يقدر يشيل منو (لقمة) ما في.
· تطلعوا الزول من (ضفورو)..هسع الكلام دا لزومو شنو؟.
· هضربة مازمبي بدأت وإلّا شنو؟.
· زمان كانوا بقولوا لينا في مقرر الجغرافيا السودان بصدر القطن والصمغ العربي ..والثروة الحيوانية.
· هسع السودان ما بصدر اي حاجة غير (الكلام) والنقة.
· بنتكلم بس.
· دي الحاجة الفالحين فيها.
· زمان نشرة تسعة بتجي تسعة…تظبط ساعتك على (الفاتح الصباغ).
· من تشوف الفاتح الصباغ في النشرة ..تظبط الساعة ..الفاتح كان زي الساعة.
· هسع نشرة تسعة بتجي عشرة.
· جروا الساعة ..(ما تقعدوا تعاينوا لي كدا ..عاينوا للساعة).
· انا ذنبي شنو؟.
· زمان الواحد وقت يعزمك فطور ..بجيب ليك (سمك).
· هسع الواحد لو عزمك فطور ..بقفل تلفونو منك.
· تبقى زي الرصيد الرايح.
· اول الرصيد الرايح بعمل كدا…(والله انت ساكت عاوز تدخل لينا السمك في العمود دا).
· تفتش ليك سبب من ما في عشان تجيب سيرة السمك.
· يا زول (سمك) شنو؟.
· لكن عشان نطلع من الحتة دي بي حرفنة كدا.
· عجبني مسدار شعري كتبته رباح الصادق المهدي في صفحتها الخاصة عن والدها الامام الصادق المهدي قالت عنه بعد ام قدمت المسدار وعرفته بهذا(تلغرافشعريسربهحاجالعمدةللحبيبعام 1970 حينماكانمعتقلابشنديعبرعسكريحارس ).
· الحبيب هو الصادق المهدي والمسدار الشعري كان هذا القول القوى …والوصية الجميلة ، وشندي معروفة طبعا :
فرخأمصنقرالصايدالبلدقديد
وضنبالعقربالمابنمسكفياﻻيد
أكانقريتافوقلبنالجدادﻻتزيد!
· في تعريفاتنا العادية وقت يقولوا ليك الزول دا (مقدد) الشيء فذلك يعني انه عارف عنها اي حاجة.
· حافظها ..او منقطها.
· متل ان يقال لك : والله انا الحلة دي مقددها قديد ..او الشارع دا مقددو قديد ..تسألني من اي حاجة فيه بتلقاني عارفو.
· اذن (فرخأمصنقرالصايدالبلدقديد) دلالة على الخبرة والمعرفة والدردرة.
· وفي البيت المسداري ايضا اشارة للقوة ..واللحلحة.
· والزول المدردر لو ما مات بشق المقابر.
· ومن علامات (الدردرة) عندنا في الحلة ..لو الكهربة ضربت ..تشوفها ضربت وين؟.
· لو التلاجة وقفت ..تشغلها.
· لو التلفزيون صورتو طشت ..تجيبها.
· في ناس عارفين اي حاجة ….اي حاجة بعرفو يعملوها.
· هسع من علامات الدردرة التقنية ..انك تفك الموبايل ..وتقطع الشريحة ..وتكون عارف اي ملف فيه.
· تكون (مفتح) وإلّا بتروح فيها ساكت.
· وعشان ما تقولوا هسع الكلام دا مناسبتو شنو؟.
· اقول ليكم ان البيت الاول بذكرني بي مدثر كاريكا وهو قول بنطبق رياضيا على مدثر كاريكا (فرخأمصنقرالصايدالبلدقديد)، واظنكم تتفقون معي في هذا الامر.
· كاريكا بقدقد ليك الشوارع والشباك ايضا …وبنزل وبطلع بي نفس واحد (ما شاءالله عليه).
· هذا عن البيت الاول في مسدار بيت الامام.
· اما المقطع التاني وهو (وضنبالعقربالمابنمسكفياﻻيد) وهو بيت واضح وما عاوز تفسير.
· حتى الزول البشبه هذا البيت ظاهر ..وما عاوز ليه درس عصر.
· واظنكم كلكم قلتوا دا (بكري المدينة).
· موش بكري المدينة دا العقرب يبقى هو (ضنبالعقربالمابنمسكفياﻻيد).
· لو بتمسك كان علاءالدين ثبتو.
· علاءالدين دا مسكين ..كل مرة لاعب من الهلال يعمل ليك في نظرية.
· مرة نزار الصاقعة عمل فيه نظرية (مرقنبو قرنبو) في مباراة القمة قبل الاخيرة.
· المرة دي بكري المدينة طبق فيه اغنية سيد خليفة (جاري وانا جارو) لمن نفسو اتقطع.
· والله ضنب العقرب دا لا بتمسك ولا حاجة.
· ولا تحاولوا.
· كدا اظن الموضوع بقى واضح …تفقعوا في عيونكم متل البيت الناصية.
· اول البيت الناصية بفقع عيونو.
· البيت الثالث في المسدار وهو عنوان موضوعنا هذا (أكان قريتا فوق لبن الجداد ﻻتزيد!) عن محمد أحمد بشه.
· بشه عندو (الغتة)…زول غتيت ما بقر بي شيء …و(قريتا) يعني لو اتكلمت..ما تديهم عود فيه نفاخ…ما تزيدهم اكتر من (لبن الجداد).
· ولبن الجداد طبعا حاجة وهمية كدا.
· والله قطع زي دا يا رباح الصادق ..ما شفنا.
· يا جماعة انا بتكلم عن (بشه).
· تفكيركم ما يمشي لي بعيد.
· الجداد من الطيور المظلومة ..ودائما بضربوا بيها المثل في (القطع الناشف).
· في الاستحالة بقولوا ليك (سنون الجداد).
· قالوا ليه ديل (شفوت) جنس شفتنا ..سنون الجداد عملوا ليها (معجون).
· باعوا للناس معجون لي سنون الجداد.
· بعد ما تدفع القروش …تقول ليهم وينو المعجون ..يقولوا ليك يا زول انت مجنون ..اول الجداد عند سنون ..عشان يكون عندو (معجون).
· ادفع ساكت واتخارج.
· طبعا وقت (يمنطقوك) كدا ما بتقدر تقول اي حاجة.
· تكتمها في قلبك وتتخارج.
· في المسدار حديث عن (لبن الجداد).
· اتخيلوا الجماعة ديل ..يكونوا وصلوا الي اتفاق مع (الجداد) واقنعوه ليك بي انو بدل ما يجيب (بيض) احسن يجيب (لبن).
· انتوا قايلين الجماعة ديل ما بعملوها.
· الجماعة بعملوها ..والجداد ذاتو ما غريبة عليه.
· الجداد عرفناه ..الجماعة منو؟.
· عليكم الله ما تسألوني اسئلة زي دي..ما بحب الاسئلة التعسفية دي.
· الجداد برضو ..اطور ودخل العولمة ..واتجاوز حتة انو يكاكي.
· بقى في جداد الكتروني.
· واظنكم كلكم بتعرفوا (الجداد الكتروني).
· اها الجداد الكتروني دا ما ببيض…دا بجدع عديل كدا.
· المهم يا جماعة وعشان نتخارج من الحتة دي- حتة الجداد دا ..ونشوف لينا موضوع تاني ..البيت الثالث دا بتوافق مع (بشه).
· فترت انا من الجداد دا.
· قالوا ليك لبن الجداد دا فيه جنس (طعمية).
· ما تستغربوا ..يعني ح يكون فيه (شاي بي لبن).
· الزول وقت ينفخ ..احسن ينفخ سمح.
· عندنا واحد اشترى ليه (خروف).
· قال احسن قبل ما اضبحو اتصور معاه وانزلو في (الواتس آب).
· فعلا زولكم اتصور مع الخروف ..ونزل الصورة في (الواتس آب).
· بعد كدا صاحبكم ضبح الخروف ..وسلخو ..ونضف الكرشة ..وولع النار ..وركب الحلة.
· اول ما الشيه طلعت …الجماعة بتاعين قروب الواتس آب وصلوا..قالوا ليه عاوز تضرب ليك خروفك براك كدا.
· زولكم قال ليهم طيب ما كان تجوا في (السلخ)…جيتونا بعد ما (الشيه) طلعت.
· قالوا ليه نجيك مع السلخ ليه ؟…نحن ناس الحجز الصحي.
· ونزلوا ليك في الخروف ..ومن اليوم داك صاحبكم قرر ما ينزل ليه صورة خروف في (الواتس آب) إلا بعد (9) يوم من الضبيحة.
· خليك مفتح.
· وعارف اي شيء.
· ملحوظة : اقل (دقسة) بتروح فيها.
هوامش
· شفتوا المجموعات دي سمحة كيف؟.
· الهلال فتح ليك التسجيلات من يوم 14 مايو.
· ناس المريخ رأسهم ضرب.
· فهمهم تقيل ..ما استوعبوا لينا الحكاية دي.
· هسع وقت الموضوع يقع ليهم يجيبوا ليهم لاعب من الدرجة الثانية ويسجلوه.
· نحن يا مريخاب جبناه من البرازيل.
· انتوا البرازيل دي قريبة وإلّا شنو؟.
· كامبوس وصل في رمشة عين ما شاءالله.
· وسيرجو فجأة وصل.
· ومدرب الاحمال.
· البرازيل دي ..بقت ليك عند الهلالاب زي الفتيحاب.
· تكلة بس.
· تقولوا بجوا منها بي شارع الوادي.
· المريخاب ..مع (سيرجو) دا صبرهم قلّ.
· تاني ضفر ما بقعد ليكم.
· برجع الحصاحيصا.
· ضفر براهو …بابكر سلك ذاتو تاني ما بقعد.
· يمكن يرجع المسرح القومي.
· مع سيرجو دا ..البلد دي يا مريخاب لا بتتقعد ليكم ولا حاجة.
· رأسكم ما يبقى قوي ساي.
· وارغو غادر كشوفات الهلال.
· الزول دا ما شفنا منو اي حاجة غير هدف الشجرة.
· ما قصرت يا كابتن.
· العملتو في المريخ …عملتو في الهلال.
· لكن ناس المريخ صبروا عليك (5) سنوات ..الهلال (5) شهور ما صبر عليه.
· غايتو ناس المريخ ديل عندهم جنس صبر.
· ديل صبروا على جمال الوالي (11) سنة ما يصبروا على وارغو (5) سنوات.
· انتوا (الصبر) دا بتجيبوا من وين؟.
· عندكم جنس صبر.
· لو ما عندكم صبر ما بتعملوا ليكم دورة لحوض النيل.
· في صبر اكتر من كدا.
· هسع المريخ دا ما بدخل التسجيلات عشان دورة وادي النيل دي.
· شوفوا ليكم (برازيلي) صغير كدا من جياد وسجلوه لدورة وادي النيل.
· نحن عشان بنلعب في المجموعات ..جبنا لينا برازيلي كبير ..عمرو (35) سنة.
· انتوا قايلين ..المجموعات دي لعب.
· لكن بيني وبينكم …دورة وادي النيل دي ..ما عاوزة ليها (برازيلي).
· ما تتعبوا ساكت.
· سيرجو هل سيكون جاهز لمباراة الغد؟.
· نتمنى ان تكتمل اجراءات التسجيلات ..على الاقل وجوده في (الكنبة) سوف يعطي دافع للهلال.
· كامبوس عندو فهم براهو.
· مازمبي دا جاب ليه (برازيلي) مخصوص عشان يجضمو ليكم.
· لذلك نتمنى ان تكتمل اجراءات تسجيل جيرسو …على الاقل عشان كامبوس.
· جميل ان الهلال لم ينه التعاقد مع كوليبالي.
· على الاقل كوليبالي كان اساسي في تشكيلة الهلال ..كما انه سجل مع الهلال اهداف صعبة.
· ويمكن في وجود كامبوس ..ان يستعدل ويدور صاح.
· الهلال عندو فرصة للتجنيس.
· جنسوا.
· ناس المريخ ديل ح يفضلوا قاعدين كدا.
· يعني الهلال يجيب التجنيس.
· ويجيب الاعارات.
· ويقدم التسجيلات.
· وانتوا يا ناس المريخ قاعدين لينا كدا …(تمامة عدد).
· اصلو ما بتفكروا ..ولا بتخترعوا ليكم حاجة.
· قاعدين ساكت ..زيكم وزي ناس النيل الحصاحيصا.
· لكن بعد كدا ..ضفر برجع.
· قلت ليكم جيرسو دا ..ما بتنستروا معاه.
· ….
· عاجل : اخبار دورة حوض النيل شنو؟..ما في فريق مشارك في الدورة وصل بـ (لوري).
[/JUSTIFY]
وإن طال السفر – محمد عبد الماجد
صحيفة قوون
مقالات ذات صلة
-
-
-
-
-
-
-
-
