أديني خاطرك

أديني خاطرك والسلام.. مالي معاك أبداً كلام

أنا كنت شايلاك للظروف.. ووهبتك الحب والغرام

كم بي وراك شفت العذاب.. وكم مره جافاني المنام

وبقول عليك إنت الحنين.. والبينا أحلام واحترام

لكن مع الأسف الشديد.. ما كنت قدر الالتزام

فارقت درب المتقين.. باريت براك درب الحرام

***

علمتك الحب الحلال.. وريتك الود والوفا

لوّنت ليك الأمنيات.. خليتا خضرا ووارفة

ورسمت ليك عش السرور.. في صورة زاهية ومترّفة

والليلة تظلمني وتجور… على ريدة صادقة ومنصفة!

أنا ما بقول إنت القسيت.. ولاّ النسيت زمن الصفا

لكن براي.. خليت هواي… صدق عهوداً زائفة

ما كنت قايلاك يوم تخون.. بعد المواثيق والوفا

أديني خاطرك والسلام.. أديني خاطرك بس.. كفى

****

سِكّتنا صبحت سكتين.. ما أظن نعود يوم ننسجم

أديني خاطرك والسلام.. أديني خاطرك مبتسم

مبروك عليك دنيا الغرور.. على قدر ما جواي ألم

كمّلت فيك كل الكلام.. والليلة جد كِمل العشم

ما دايرة أتوسد أساي.. أو أستبيح دمع الندم

ولا دايرة أحكي لأي زول.. عن ريد كبير فجأة انهزم

وأملا المساحات بالحنين.. وأملا البراحات بالسأم

أنا داير أعيش واقع وفاي.. من دون أكون باريت وهم

أديني خاطرك ويلا فوت.. أنسى الدلالات والقيم

ما أظن أشوفك من جديد.. ولا حتى أحلم بيك حلم

*تلويح:

خاطرك ذاتو ما لازمني.. ياخ من جور هواك ارحمني.. لا تهاتفني لا تكلمني.. وكان لاقيتني ماااااتسالمني!