الوديعة (القطرية)

اضايروا.

ما تقفلوا ليكم قوس في السخانة دي…بتكتلوا الكلمة.

انك تجي.

أو تفوت عدل.

الاستغراب في البلد دي ذاتو انتهى.

زمن أنا ما شفت لي زول (مستغرب).

الناس بقت ما بتستغرب.

زمان كنت بطلع الشارع بلقى لي زول واقف في محطة المواصلات (مستغرب).

بقول ليه يا زول أنت مستغرب مالك؟.

بقول لي : نسيت الباقى عند الكمساري.

بقعد أنا ذاتي استغرب معاه.

عليكم الله شوفوا (براءة) الاستغراب دا.

مرات تمشي ليك عرس ..تلقى الناس كلها قاعدة (مستغربة).

تقول ليهم (الاستغراب) في شنو؟.

يقولوا ليك تصور العريس إلى الان ما جاء من الاستديو.

هسع العريس لو ما جاء نهائي ..لو (طفش) مرة واحدة ما في زول بيستغرب.

لو من الاستديو مرقها في القلابات ما في زول بيسألو.

حليل أيام زمان ..الواحد لو قلت ليه تلاتة في تلاتة بي كم = بقعد (يستغرب) ليك.

لو قلبت ليه في طلب الفول ..طلب كبدة ..بقعد يستغرب.

كانوا الناس قدر حالها…ماشيين تحت الحيط.

الناس كانت بتستغرب في أقل حاجة.

لو الكهربة جات بيستغربوا.

البشوف ليه عمارة بيستغرب.

البشوف ليه حمامة بيستغرب.

البشوف ليه بنت بيستغرب.

يعني الواحد لو شاف ليه (بنت) ممكن يكتب ليه فيها (ديوان شعر) عديل كدا.

هسع لو شفت (أيشوارياراي)..ما بتشتغل بيها.

لو (أيشوارياراي)..جات شالت ليها سمك من الموردة ما في زول بيستغرب ليها.

لو نزلت من عربيتها ..وحولت ليها رصيد بـ (2) جنيه ..ما في زول بعاين ليها.

شعراء الحقيبة ديل زمان (البنت) بشوفوها في السنة مرة وهي بتدفق الموية في الشارع ..(لمحة) كدا يقعدوا يكتبوا ليك (حاول يخفى نفسو وهل يخفى القمر ابداً وطبعاً لا شفناه شفناه).

اتخيلوا شعراء الحقيبة ديل في الزمن دا مع الفضائيات دي ..وكترة البنات ديل كانوا ح يكتبوا شنو؟.

ما كانوا ح يشتغلوا بيهن.

في أزمة (استغراب).

بقى ما في أي (استغراب) في البلد دي.

هسع يمين الواحد لو وقعت قدامو (صاقعة) عديل كدا ..ما بيستغرب.

يمكن عشان الناس بقى دمها بارد.

ويمكن عشان الناس ..بقى ما عندها (احساس).

الواحد لو وقعت في رأسو (فلنكة) ما بحس.

الفلكنات دي طبعاً بعرفوها ناس السكة الحديد.

بعرفوها ناس عطبرة.

الواتس آب ..ذاتو قلل (الاستغراب) بصورة كبيرة.

نشف الاستغراب عديل كدا.

قالوا ليك في زوج وزوجة قعدوا يتناقشوا في مواضيع هامة جدًا.

اصلو ما وصلوا لاتفاق.

الجوطة وصلت السماء.

قربوا يطلقوا.

والكواريك دورت.

أي واحد ما عاوز يسمع التاني.

أي واحد ما عاوز يفهم.

رأسهم ربط.

خلاص ..الزول وقت يقفل ..تاني ما بيستوعب.

آخر حاجة الزوج فكر كدا ..وقال لي زوجتو كدا ادخلي (واتس آب) خلينا نتفاهم بي رواقة كدا.

دخلوا (واتس آب) ، اللغة اتغيرت ، اتفاهموا في لحظة.

الناس ادجنوا على (الواتس آب).

بقوا (موتسبين) طبيعي كدا.

يمكن الناس بقت ما عندها قدرة على الحوار.

الناس بقى ما عندها صبر ..عشان تفهم ..وعشان تحاور ..وعشان تقنع ..وعشان تجادل ..وعشان تمنطق.

لذلك اختزلوا الحكاية كلها في جملة ..جملتين.

الواتس آب ..سد بينا افق الحوار ..وقفل لينا مساحات التواصل المباشر.

لذلك غاب (الاستغراب).

بقى ما في دواعي عشان تندهش ..وتستغرب …(الاحاسيس) دي كلها راحت.

وبعد زمن تأكدوا ح يروح كمان احساس الضحكة ..والابتسامة …والفرح ..والحزن.

ح نبقى مجرد آلات حافظة.

الاحساس فينا ح يموت.

لذلك حافظوا على (استغرابكم)..وما تخلوه يروح ساكت في محطات الغير.

قبل سنوات…الكلام دا زمان ..جابوا لينا استاذ.

الاستاذ قال لينا ح ادرسكم (تاريخ).

قلنا ليه نحن (التاريخ) دا فترنا منو؟.

ندرس في التاريخ دا من قمنا ..في البيت ..في الشارع ..في المدرسة ..في التلفزيون ..في الجرايد ..في الاذاعة.

كلامنا كلو بقى تاريخ.

الاستاذ كان متفهم ..قال لينا خلاص ما مشكلة ..ح ادرسكم (جغرافيا).

قلنا ليه الجغرافيا دي نحن فترنا منها.

البلد اتقسمت …تاني جغرافية شنو؟.

الاستاذ كتر خيرو ..اتفهم للحكاية.

قال لينا خلاص ..ح ادرسكم رياضيات.

قلنا ليه عشان تقول لينا كيلو اللحمة بقى بـ (60).

عليك الله ما تقفلها معانا.

الاستاذ قال لينا خلاص ح ادرسكم لغة عربية.

قلنا ليه هو نحن بلا العربي دا العملها فينا شنو؟..امل كتبت وبدر قرأ.

الحاجات دي بقت ما بتقسم.

الاستاذ قال لينا خلاص ..ح ادرسكم (كيمياء).

قلنا ليه لكن يا استاذ كيمياء في السخانة دي.

قال لينا طيب احياء كيف؟.

قلنا ليه نفس الشيء.

الاستاذ قال لينا طيب ادرسكم شنو؟.

قلنا ليه يا استاذ كدا شوف لينا الواحد لو عمل ليه قدرة فول في ركن البيت ..بتغطي معاه.

الاستاذ قال لينا لو بتغطي ..أنا البيجيبني هنا شنو؟.

الموضوع دا كلو نهايتو كدا ..بوضح انو بقى ما في أي (استغراب).

لكن عشان ما تفتكروا أني عاوز اطلع ليكم من الموضوع …والدنيا مسخنة ..والشمس مولعة ..ارجع ليكم للعنوان.

الايامات الفاتت كان في حاجة اسمها (الوديعة القطرية).

وهي عبارة عن مليار دولار قدمتها دولة قطر للسودان كوديعة.

بعدها الدولار تجاوز فاصل التسع جنيهات.

قعدنا في الصقيعة.

الوديعة دي يا ربي ناس المريخ عندهم فيها كم؟.

بكون عندهم نص فيها.

ما علينا.

المريخ سافر إلى عطبرة بـ (القطر).

ونحن من هذا المنطلق ممكن نقول لي ناس عطبرة ..يا جماعة المريخ جاكم وديعة (قطرية).

يعني وديعة بالقطر.

يلا اتصرفوا لينا في (الوديعة) دي.

علماً أن (الوديعة) دي في شندي اتجهجهت ..ودخلت مدرسة عديل كدا.

الوديعة دي في الحصاحيصا القريبة دي ..ما فهمت حاجة.

واليوم جاء دوركم انتوا يا ناس عطبرة.

الوديعة جاتكم.

وصلتكم بالقطر.

يعني (وديعة قطرية).

أظن كدا الموضوع بقى واضح ..وصريح ..وما فيه أي لفلفة.

ما فيه أي دوران.

إلا تكونوا براكم عاوزين تلفوا وتدوروا.

ناس الامل ما بقصروا.

دي حاجة واثقين منها.

المريخ بي قطرو دا ..(نقطة) ما برجع بيها من عاصمة الحديد والنار.

بس اعملوا حسابكم من (الحكام) يا ناس عطبرة.

لو عملتوا حسابكم من (الحكام) تاني ما بتجيبكم أي عوجة.

الحبة ما بتجيكم.

بعد كدا ..لو عاوزين تستغربوا ..استغربوا.

ما عندنا معاكم أي مشكلة.

إن شاء االله تستغربوا للصباح.

الاستغراب الجميل ..أن قرعة المجموعات سوف تكون اليوم في القاهرة.

وقبل كدا …ومن غير أي وديعة …الهلال اليوم سوف يستلم نصيبه من الاتحاد الافريقي بعد أن تأهل عن جدارة واستحقاق لمرحلة المجموعات.

ح نأخد حقنا عديل كدا بالعملة الصعبة.

وانتوا يا ناس المريخ شيلوا حقكم من (الوديعة القطرية).

ناس تدخل للبلد دي عملة صعبة.

وناس كمان …الوديعة البتدخل للبلد من بره بشيلوا منها.

شفتوا الفرق كبير كيف بين الهلال والمريخ.

انتوا ناس ودائع ساكت.

ونحن ناس مجموعات.

الذي يهمنا الان ..هو أن يشيل الامل نصيبو من (الوديعة) التى وصلتهم أمس بالقطار.

اوعكم تفرطوا في الوديعة دي.

اربعة شوية عليهم.

الوديعة بعد عطبرة ..ح تمشي على (النقعة).

ومن النقعة بجوا علينا جاي.

بجونا فاقدين سوائل.

إن شاء الله ترجعوا لينا بدون أي نقطة.

وتبعدوا لينا بعد كدا ..نحن بنتم الناقصة.

ملحوظة : وديعة وجاءت من السماء.

هوامش

المصور الفنان محمد دفع الله …خرج بلقطة الموسم كما جاء في قوون ..وهو يلتقط لينا صورة سيدي بيه عندما اتكعبل الحكم ..وبقى عامل زي الفيلم الما واضحة فيه الترجمة.

أنت يا سيدي بيه ..الحركات البتعمل فيها دي ..اعملها يوم 10 مايو لي ناس ضفر.

غايتو يا سيدي بيه لو عملت العملية دي في (ضفر)..صاحبك دا إلا يلموه في نهاية الدورة التانية.

هسع ما بقدروا عليه.

سيدي بيه طبعاً مكمل (الحرفنة)..قالوا ليك أول ما استلم الكورة ..الحكم ما عرف يتصرف كيف؟.

الحكم خاف يتجه شمال …يقوم سيدي بيه يمقلبو يتجه جنوب.

خاف يتجه جنوب ..يقوم سيدي بيه يعملها ويتجه شمال.

خاف يمشي شرق ..سيدي بيه يلعب الكورة غرب.

يمشي غرب ..يقوم سيدي بيه يقلب الطاولة ويمشي شرق.

عشان كدا الحكم جرى على كل هذه الاتجاهات ..قام اتفرتك لينا بالصورة دي.

أنا ما عارف محمد دفع الله ..جمّع لينا اللقطة دي كيف؟.

قالوا ليك الحكم إلى الان ما عارف الحصل شنو؟.

وقت يسألوه بقول ليك والله فجأة كدا شعرت بي اني عامل ارضاً سلاح في وقت كان يفترض أن أعمل فيه ارنب استعد.

طيب يا أخوي أنت ما سألت نفسك.

ناس ضفر.

ناس ضفر ..يتصرفوا كيف مع الوضوع دا يوم 10 مايو.

مرة نزار الصاقعة عمل ليه عملية (خراطة) ملاعب لي علاء الدين فييرا.

جمع ليك فييرا ..وطرح ليك منو علاء الدين يوسف.

في اللحظة دي ..علاء الدين يوسف حاول يرجع ..قام لقى ليك فييرا فات.

حصل ليك التداخل دا بين فييرا وعلاء.

انتوا سيحة ما قال حاجة في الموضوع دا.

هسع لو جبتوا ليه اللقطة دي يقول ليكم نزار حامد كان متسلل.

ح يطلعها ليكم (تسلل).

لكن لو جينا للحق ..(شوفوا الصورة فوق)..وارجعوا كملوا العمود ..لو جيتوا للحق ..الحكم دا مفروض ناس الاراضي يصرفوا ليه (تعويض).

عشان خبط الواطة بي رأسو.

وناس الارصاد الجوي برضو مفروض يعطوه (درع)..عشان عمل ليه عملية ناس الارصاد ما بعملوها.

وبعد كدا منظمة شباب الوطن حقت ناس وليد زاكي الدين ..مفروض تكرمو..عشان الزول دا ممكن كان يستشهد في الحركة دي.

عليكم الله ارجعوا اتمعنوا في الصورة ..وارجعوا لي.

غايتو الزول وقت يكون عاوز ليه سبب.

يمشي الفرن ..يقولوا ليه رغيف مافي.

بالمناسبة دي ناس الهلال ما يقوموا يركزوا لي في مباراة عطبرة.

مباراة النيل ذاتها خطيرة.

ناس النيل ديل بقوا يلعبوا قدام القمة.

ومبارك سليمان ..مفتح.

لذلك الحذر واجب.

اللعب بي مسؤولية.

رجعوا لينا (الهلال) البنعرفوا.

وألعبوا لينا كورة صاح.

طقطقوها زي ما بقول الكتاب.

نحن فترنا ..من الحالة دي.

احسموا المباراة من بدري ..وفارق الهدف ..دائماً بيعطي الفريق الخاسر دافع أكبر.

اتذكروا انكم بتلعبوا في المجموعات.

الليلة القرعة.

ألعبوا عديل.

وخلوا لينا الباقي.

….

عاجل : أنت يا محمد دفع الله ..الحكم وقت عمل عمليتو دي كان سايق ليه (موتر)…دراجة بخارية يعني ..عشان العمود دا يمكن يقرأوه (روس).
[/JUSTIFY]