وان طال السفر

قاعدين (متكومين) نحضر في المسلسل ..ولا في بالنا …لا انتوا ولا هم.

شايلينهم خالص ما حسابتنا.

لو الزول فكر في حاجة تانية ..دي فيها حاجة وإلّا مجرد التفكير ممنوع.

ما تفكر تفكر ليه؟. اذا ناس خضر عندهم (راكوبة) حرقت من (التفكير).

اول التفكير بحرق الرواكب.

الشيء البعرفو انا التفكير بحرق (اللبن).

يعني يكون عندك لبن في النار ..تقوم تفكر ليك في موضوع خارجي كدا.

يقوم اللبن يفور ويدفق كمان.

لكن التفكير يحرق (الرواكيب) دي جديدة علينا.

سعد الدين ابراهيم الشاعر والصحفي المتعدد المواهب قال انه عندما كتب (حكاية عن حبيبتي) لجنة النصوص والاجازة اعترضت على (الرواكيب) التى ادخلها سعد في النص ..وقالوا ليه عاوز تدخل لينا (الرواكيب) في الغنا كمان.

وفي الاغنية ذلك الاثر الجميل للراكوبة.

عن حبيبتي بقولكم

لونه سمرتومنكم

عن حبيبتي بقولكم

ماخده حاجات منكم

الأليفه ندي الشروق

الغني لي زراع أرضنا

الأصيله زي الشعاع

تدخل رواكيبنا وأوضنا

الجميله تفوتناهسه

ونبقي مشتاقين برضنا

لكن في النهاية سعد الدين ابراهيم قدر ينتصر للراكوبة ..وادخلها بتلك (الوسامة) في اغنية حديثة فزادتها حداثة رغم (روكوابية) المفردة والنص والفكرة.

قد تكون هذه فكرة مختلفة …تلب بيها سعدالدين ابراهيم من التراث الى الحداثة بهذا الجمال.

في واحد قام (تلب) بفكرة مختلفة من الدعايات ، ونحن قاعدين نحضر في المسلسل التركي …قال لينا انتوا عارفين الخريف على الابواب.

قلنا لينا خريف شنو؟…الخريف إلّا يجينا في المسلسل دا ..من ثم نشتغل بيه ..لكن غير كدا ..والله لو فتح الباب ودخل الصالون جوة ما في زول يجيب ليه خبر.

والناس ديل اصلا ما جايبين اي خبر.

قال لي الناس ديل منو؟.

قلت ليه الناس ديل يعني ح يكونوا ناس لجنة التسيير حقت الهلال.

مالك انت من الصباح.

عامل عيونك كدا زي قفص الجداد الما فيه جداد.

او زي الجداد الما عندو قفص.

في شوية (لخبطة) كدا حصلت في (الكُلي).

يعني ممكن الكلية الشمال تكون مشت يمين.

واليمين تكون جات شمال.

دي ما مشكلة.

المشكلة الكلية تمشي مكان القلب..والقلب ينزل مكان الكلية.

وتقعد على كدا (تحب) بي كليتك.

دا حب (كلوي) خالص.

الخريف قرب…(الكلام دا انتوا ما بتدوره).

ورمضان ذاتو قرب.

تطيروا في عيونكم كدا متل (باقى الطوب) من يجيبوا ليكم سيرة رمضان …(زي السراير المجدعة في الحوش).

الخريف جاء.

الي الان ما شفنا لينا (طورية) حايمة في الحلة.

هسع الخريف يجي ..وتقعدوا (تجرسوا) فينا.

نحن بقينا ما فاضيين للحركات دي.

نداءات ..ومنظمات ..واغاثات في النهاية تجوا تلقوه في السوق.

واحد بدون مناسبة كدا زعل من الكلام دا.

قال لي احسن نطلع من الموضوع دا.

قلت ليه نطلع نمشي وين؟.

شارع النيل.

نطلع كاس العالم.

نقعد في السخانة دي نتكلم عن (بشه).

يا جماعة.

عندنا دكتور ..عامل فيها حريف.

زمان وقت الدنيا كانت بي خيرها قبل ما يظهروا ناس (الفاتح وديدي) ديل.

الدكتور كانوا بقولوا ليه (الحكيم).

الدكتور ما زول قرأ طب بس ..وبقى يعالج الناس.

ابدا.

الكلام دا ما صحيح.

الدكتور كان (حكيم) يعني عندو حكمة وانسانية..عشان كدا بقولوا عليهم ملائكة الرحمة.

طبعا الي الان في دكاترة (حكماء)…والي الان في اطباء (ملائكة رحمة).

لكن برضو في نوعية تانية.

النوع الوقت يقعد مع المريض (3) دقائق بعاين في الساعة ..واعصابو بتبوظ؟.

ويضايق في الدنيا دي جنس ضيق.

ما عندو وقت.

عاوز يكلفت الموضوع في دقائق ..عشان يمشي لي (كشف) تاني.

زمان نحن كان عندنا دكتور (حكيم).

حكيم بالجد ..عارف ليك اي مرض عضوي سبب نفسي.

عشان كدا لمن تمشي تشكي ليه من (المعدة)..بقول ليك كدا (المعدة) دي خليها …احكي لي عملت شنو في (القراية).

تخلي المعدة ..وتقعد تحكي ليه عن (القراية).

في النهاية بدل ما تطلع منو بي حبوب وروشتة وحقن ..بتطلع منو شايل ليك (كتاب) ..راوية لي جبران خليل جبران او ديون شعر لي امل دنقل.

تنسى موضوع (المعدة) خالص.

بعد عشرة يوم الدكتور دا ذاتو بلاقيك في مناسبة …يقوم يسألك هو من (المعدة)..تقوم انت تقول ليه : (يا دكتور ما عندك كتاب تاني؟).

دا الطب كدا ..ودي الحكمة.

ما زي هسع ..الدكتور تمشي ليه ..لا يعرف حالة الزول المادية لا يعرف ظروفو ..يجر الدرج ويطلع ليه ورقة ويكتب ليك (7) ادوية لمن تمشي الصيدلية تكتشف ان سعرها بـ (350) جنيه.

350 جنيه يجيبوها ليك من وين؟.

الزول بدل ما يتعالج ..حسرتو تزيد وحالتو تتدهور اكتر لأنه ما قادر يشترى (الدواء).

امس في قوون قرأت ان الهلال يترقب وصول ثلاثة محترفين جدد.

خد ليبيا فتحت.

حكاية الهلال (يترقب) دي ما قاعد ارتاح ليها من زمن صلاح ادريس.

بعدين المحترفين البترقبوهم ديل ذاتهم ما بكون فيهم فائدة.

ديل محترفين وإلّا مطر؟.

موضوع المحترفين ديل زي ..الزول وقت ىكون راجع من برة.

خاصة لو كنتوا راجعين مجموعة.

بتكونوا واقفين كدا منتظرين (الشنط).

مترقبين الشنط.

فلان شنطتو ظهرت ..وفلان لا.

ودي شنطتي ..ودي بتشبه الشنطة حقتي …والشنطة فاتت انتظرها تلف تاني.

شنطة هي وإلّا خليفة…البتلف وتجي تاني راجعة؟.

المهم الزول بكون قاعد يترقب كدا ..الي ان يكورك بدون ما يشعر ويقول ليك (شنطتي ظهرت).

هسع حكاية (الشنط) دي زي حكاية المحترفين ..عليكم الله ما تجيبيوا لينا (نكرات) تجربوهم لينا في الهلال.

النكرات ديل ممكن نقبل بيهم في بداية الموسم.

لكن تسجيلات يونيو دي ما بتستحمل التجريب والنكرات.

عاوزين تسجيلات ..تسجيلات بطولة.

تسجيلات تجيب لينا كاس الاندية الافريقية.

جيبوا لينا محترفين معروفين …الناس كلهم شافوهم.

ما عندنا وقت.

والهلال بيلعب في مرحلة المجموعات.

يعني محترف نص نص دا ما بنفع معانا ..ولا بنكضب عليكم.

لا بد من محترف جاهز ..عندو الخبرة ..والقدرة على الدخول سريعا في تشكيلة الهلال.

يعني محترف نجيبو عشان يقعد لينا (كنبة) ما عاوزنو.

الكنبة دي في السودان بنلقى ليها ناس يقعدوا فيها.

ان شاءالله نجيبهم من دار الرياضة ام درمان.

لذلك مجلس الهلال مطالب ان يسجل في يونيو القادم تسجيلات صاح ..ويا ريت الاتحاد الافريقي يسمح باضافات للكشف الهلال قبل المجموعات.

واضح الهلال يحتاج الي (اسعاف) فوري في الستجيلات.

في بتروجيت هنالك محترف صغير في السن ..وسريع ..(اسرع من سادومبا) ذاتو ..ويمتلك مهارات كبيرة ..في مباراة بتروجيت والزمالك هذا المحترف ارتكب معه دفاع الزمالك ضربتين جزاء ، بسبب سرعته الفائقة.

اضف الي ذلك سجل هدفا جميل في شباك الزمالك من غير ضربات الجزاء.

المحترف (جيمس تيبي) يمكن للجهاز الفني للهلال ان يراقبوا مستواه في مباريات بتروجيت القادمة.

جيمس تيبي يمكن الاستفادة منه في مرحلة المجموعات. .. كذلك هنالك الطرف الشمال في فريق دوجليبا المالي كما اشار له الفني والمحامي امين.

واظن ان وجود طرف شمال في الهلال الى جانب سيسه في اليمين سوف يعطي الهلال قوة كبيرة.

وبالاطراف ممكن تعملوا اي شيء ..ونطلع من تلك الاخطاء التى يقع فيها بشكل دائم اطراف الهلال.

الذي يهمنا هنا هو ألا يتعامل الهلال مع التسجيلات القادمة بفقه (في شنطة ظهرت) وان تكون تسجيلات الهلال مدروسة وحسب الحاجة وان يحسن الجهاز الفني ومجلس الهلال الاختيار.

ما تقعدوا تجربوا لينا ساكت.

مهاجم بتروجيت (جيمس تيبي) اذا نجح الهلال في التعاقد معه ، ونتمنى ذلك سوف يحل مشكلة الهجوم بشكل نهائي في الهلال وسوف يكون هذا اللاعب اضافة كبيرة للهلال في مرحلة المجموعات.

اللاعب توافقه مع هجوم الهلال الحالي سوف يكون سريعا لأنه يتميز بالسرعة الفائقة.

ويمكن القول ان جيمس تيبي هذا اسرع من سادومبا ذاتو كما اشرت ..واكرر لتأكيد.

ارجو مشاهدة اللاعب في مباريات بتروجيت المصري ..والذي يتصدر الان مجموعته في الدوري المصري.

ملحوظة : خلونا من حكاية الشنط دي.

هوامش

يمكن القول ان مباراة الهلال القادمة مع النيل الحصاحيصا ساهلة نسبيا.

رغم من ان الدوري الممتاز بقى ما فيه مباراة ساهلة.

المباراة الصعبة الامل والمريخ.

خلاص صدارة المريخ اتبخرت.

الناس ديل من عطبرة (نقطة) ما برجعوا بيها.

عشان تكونوا عارفين.

نحن بعد ح نجهز (من الغلاف للغلاف).

عطبرة دي عاوزة ليها (من الغلاف للغلاف).

الموضوع ما بمر ساكت.

امير كمال عرفها ..اتخارج من بدري.

بس في عطبرة يا ربي الحكم سوف يمنح المريخ كم ضربة جزاء.

الليلة سيحة طبعا ممكن يتم لينا الناقصة.

ان شاء الله الكهربة تقطع يا رضا.

ما عاوزين نشوف عالم الرياضة.

قال فقرة الامبراطور قال.

بقينا نتمنى نشوف صلاح الجزولي في مباراة كاملة.

وعاوزين كمان وارغو.

امام النيل الحصاحيصا صلاح الجزولي ووارغو لا بد منهما.

ويا ريت نشوف وليد علاءالدين.

الاضافات التى سوف تكون للجهاز الفني للهلال اضافات جيدة وممتازة.

لكن نتمنى ألا يظلم مجدي كسلا.

عطبرة قالوا درجة الحرارة الايامات دي 57.

يعني يا ناس المريخ ما تفكروا في اي (نقطة).

احترموا نفسكم ..واتغلبوا واحد ..وتعالوا راجعين.

شن قدرتكم على السخانة دي.

تراوري وشيلميس من شندي برجعوهم ليكم.

سخانة عطبرة دي ما بقدروا عليها.

….

عاجل : هو امير كمال ود البلد اتخارج ..البخلي تراوري وشيلميس (الاجانب) يمشوا عطبرة شنو؟.