* فالظرف كان قاهراً.
* الخال الحبيب أعياه النضال.
* ولكن الله منّ عليه ببدء الشفاء.
* دعواتكم له فهو ينتظرها.
* إنه خالى.
* والخال والد وهذا يكفى.
* المهم.
* الليلة الهلال ضد الخرطوم.
* ولا خوف على الخرطوم إلا من أخطاء الحكام التى لاتظلم.
* ولكنها تؤثر سلباً على الفرق إلا واحداً فقط.
* الخرطوم من الأندية الطموحة.
* وجربت التمثيل الخارجى.
* والمنافسة على المراكز المتقدمة التى تؤهل للتمثيل الخارجى أصبحت شديدة.
* وعلى الخرطوم ان تلقط النقاط من أسى.
* والفرصة مواتية لها.
* لأن الضعف الذى يمر فيه الهلال حالياً لا تجده الخرطوم قريباً.
* بالذات بعد التكميلية.
* فقبال ما الهلال لى فريقو يكمل.
* مفروض الخرطوم عليهو يخلص.
* والرزق تلاقيط يا خرطوم ياوطنى.
* ويا وطن يا وطن أخبابى.
* أيها الناس.
* جماهير الرياضة لن تقبل بأية حركة ما فيها بركة تستر ناساً كده متضايقين.
* وزى ما السرير التانى برد فى الحوش أفريقياً.
* سريرهم فى حوش الممتاز برضو برد.
* لأنو بالمستوى الذى شهدناهو ضد هلال كادقلى والرابطة كوستى ومريخ السلاطين.
* تأكدنا بأن السرير بتاع الممتاز برد شديد.
* أيها الناس.
* على التحكيم أن يرتفع الى مستوى الطموح.
* يبطل الأخطاء الكتيرة دى.
* الأخطاء التى لا يظلم بها شخص قصداً.
* الأخطاء التى بالخطأ تصب فى مصلحة زول كده.
* زول محدد.
* والخرطوم نادى كبير.
* عندو جماهير.
* ما بقدر يسكت على أخطاء.
* بالذات الشنيعة.
* عشان كده.
* بدرالدين أو أبونب أو معتز التمشيطية.
* إذا(إذا دى للتمويه).
* إذا أدار مباراة اليوم حقو يفتح عينو كبيرة.
* ونوصى رجل الخط فى الجانب الشرقى يلبس ساتر كامل فى رأسو.
* أن شاء الله يعمل ليهو برندة بى طول الخط يعرشها بالزنك الأمريكى.
* بس الحجر ما يقع فيهو.
* حجارة الطاحونة كتيرة فى الجهة ديك.
* وجهجهة ناس المدينة بتشعل ثورة الطاحونة.
* فتتطاير تلك الحجارة الما كريمة.
* تمرق رجل الراية فى كريمة.
* مقتل رجل خط مقتل أمة.
* المهم.
* النسوان بعرفن الواجب وبعرفن يواجبن.
* مثلاً الواحدة لو أدت جارتها خبيز فى جردل.
* ده واجب.
* جارتها لمن ترجع الجردل فيهو سكر.
* دى مواجبة.
* عشان كده النسوان العندهن ذوق ما برجعن الجردل فاضى.
* أسى ناس الهلال ديل.
* يوم مصالحنهم فى القصر.
* ويوم مغدنهم فى القصر.
* ويوم معشنهم فى القصر.
* ويوم داعمنهم فى القصر.
* وده واجب القصر.
* بالذات لنادى الشجرة.
* لكن الهلال ما عمل المواجبة.
* ما رجع للقصر الجردل مليان سكر.
* رجعوا فااااااااااااضى.
* صفر كبييييييييييييير.
* لى أسى ماجاب للقصر السكر فى الجردل.
* زى ما ناس الزعيم جابوا للقصر السكر فى الجردل.
* برغم أنو الزعيم ماشاف خبيز القصر لليوم.
* القصر أدانا الجردل فاضى.
* رجعناهو ليهو مليان سكر.
* عزم غيرنا غداء.
* أصحابنا ديل لا بعرفوا واجب.
* ولا بعرفوا يواجبوا.
* طواااااااااالى يلهطوا ويرجعوا الجردل فاضى.
* عشان كده.
* حقو ناس الخرطوم الليلة يرجعوا الجردل للقصر مليان خبيز.
* عشان القصر يرجع الجردل للخرطوم مليان نقاط.
* التحكيم.
* التحكيم شنو يا ربى!!!!
* المهم .
* أعجبنى سارى وهو يخاطب لاعبى الرديف واعداً إياهم بالإعتماد عليهم فى الكبير فى حال أدائهم الجاد.
* فنحن نحلم برؤية مريخ كبير مليان رديف قوى وحريف.
* والجماهير التى صبرت على من أدمن الفشل.
* بالتأكيد ستصبر على من يضع قدمه الأولى على سلم العطاء.
* أن شاء الله نشوف منهم يوم كورة هلال الجبال نفرين تلاتة.
* أها.
* نجى لى شمارات والى الخرتوم.
* أكان شفت يا والينا.
* أول أمس والسخانة بتهرى فينا.
* كنا بنعلق على الحر الطلع عينينا.
* قول زول يقول حاجة.
* واحد قال الحكومة بالسخانة دى وفرت علينا حق الغاز.
* تطلع السمكة من البحر تنشوى براها وتتاكل.
* بتاع بحر سمع قولة بحر إتلفت.
* واحد تانى قال غايتو درجة الحرارة الليلة لو قالوا لينا أقل من خمسة وستين يكونوا غشونا.
* واحد تالت قال ليهو خمسة وستين شنو؟
* درجة الحرارة الليلة دولار عديل كده.
* بتاع البحر قال ليهو معقولة وصلت تمنمية وتسعين؟؟؟؟
* حرارة ولا عوارة!!!!!!!
سلك كهربا
* ننساك كيف وقالوا برج الأتصالات مكلف سبعين مليون دولار والدولار مع الجنيه بس حقار..
والللللللللى لقاء
سللللللللللللللك
في السلك – بابكر سلك
