* وناس محمد عبدالماجد إتبلوا شديد.
* إتبلوا لامن عرفوا حاجة.
* بل شديد.
* بل فيهو رشة من نص الخريف.
* سحابة حبشية.
* إتبلوا وإتبلبلوا.
* عشان كدة محاولة البشكرة ما بتنفع.
* البشكرة ما زى الفشخرة.
* الفشخرة ممكن تتفشخرها بى خشمك سااااى.
* هو الكلام بى قروش!!!!
* لكن البشكره دايره صرف.
* دايره زول بى حقو.
* ودايره عصر هدوم.
* وقبل ذلك مكان ينستر فيهو الزول.
* عشان ينشف هدومو أول بعدين يتبشكر.
* المهم أتبلوا لما عاموا ذاتو.
* وقلنا ليكم الغريق قدام ما صدقتوا.
* لكن ما سمعناه عن تهديد مجلس التسيير بالإنسحاب كلام غريب.
* فريق فى أرضو وبين جماهيرو رجل الخط يتفلق ويدخل فى غيبوبة
أدخلت عربة الإسعاف للملعب.
* زعلانين فى عقوبة تلاتين مليون ونقل كورة للكاملين؟؟؟
* الغريبة عندما جاء مجلس التسيير ده قلتوا الفهم والحقانية والإنسانية وحاجات تانية.
* فهمكم شنو فى التهديد بالإنسحاب رفضاً للعقوبات!!!!
* وهى وينها العقوبات!!!
* عقوبتكم دى ذكرتنى قصة حصلت للأستاذ جعفر سليمان وبعض
أصحابو.
* ناس أبوالجعافر كانوا بجيبوا الطعمية يختوها لمن ينتهوا من الشغل
يأكلوها.
* معاهم واحد يلقط فيها قطعة قطعة.
* قطعة ماشة وقطعة جاى.
* طوااالى ويووووومى.
* لما يهبشوها يلقوها قربت تتلاشى.
* المهم فكروا فى حل يحلهم من الأشكالية دى.
* معام واحد مسيكيييييييييييييين.
* قالوا ليهو تانى الطعمية دسها من فلان ده.
* صاحبنا دساها.
* آخر الدوام قالوا ليهو الطعمية وين؟؟؟
* قال ليهم دسيتها فى كيس العيش.
* مشوا لقوا العيش والطعمية ماف.
* بواقى بس.
* الكيس ناااااااااابى.
* أقصد الكيس فااااااااضى.
* كيسهم بقى فاضى.
* واحد فيهم قال ليهو أنت دسيت الطعمية منو ولا حشيتها ليهو!!!!
* دحين العقوبات دى الأتحاد دس بيها الطعمية من الهلال ولا حشاها
ليهو!!!!
* وبعد ده ما قبلانين.
* شى يحير.
* فعلاً الأختشوا ماتوا.
* أيها الناس.
* المادة واضحة.
* من ينسحب ينزل طوالى للدرجة الأدنى.
* وحكاية إمهال ثلاثة أيام الحصلت زمان ديك كانت بدعة ساى من
شداد.
* فمن يعلن الإنسحاب لا يستتاب.
* قطع طوالى.
* وأتمنى أن تبطلوا تهديد وتعلنوا الإنسحاب.
* عشان تانى الدورى أب شمساً بره.
* يعنى الحكم ده تكتلوهو ولا شنو يعنى؟؟؟
* دى كوميديا منكم ساى.
* ووفروها لى كوميديا المجموعات.
* ضحك زى الضحك.
* وموش حاتقدر تغمض عينين.
* ترمش ساى.
* بفوتنك قونين.
* البتجى بى فوق جمعة بكون قايله قمرية.
* زى القمرية الشنداوية الحبشية الجات بعد محاولة قتل رجل الرايه.
* أيها الناس.
* الروم الأيام دى متضايقين.
* وروما وشها يلعن قفاها.
* حى حكامات روما بقن يبشتنن فى الروم ويتهموهم بالتواطؤ
والشيشة والتمباك.
* وحتى شعراء روما أعلنوا ان بوياسوديسكوس عمل بويا للكورة.
* وبويا بلغة الروم يعنى باع.
* وهى كلمة أصلها عربى.
* بويا من باع.
* وبعض شعرائهم قالوا جمعتوز تواطيوس.
* وتواطيوس أصلها الرومانى تواطيس.
* وتواطيس هى أيضاً كلمة رومانية قديمة.
* وأيضا أصلها عربى.
* وتعنى التواطؤ.
* تواطيوس وتواطؤ.
* لاحظتوا الشبه!!!
* روما تعبانة.
* وأمامنا معركة ضدها.
* يجب ان يعرفوا حاجة.
* وأنها فرصتنا.
* فروما مبلولة.
* والأتبلبل بعوم.
* تعالوا نعومها لما نغرقها.
* ولا يتأتى ذلك ألا بالأتحاد تحت راية واحدة.
* بنفوس راضية ونزيهة.
* بدون إصطياد فى الماء العكر.
* ولا نكون كذلك إلا إذا حاربنا تحت راية أمير المؤمنين.
* وبعد النصر.
* وقبل تقسيم الغنائم.
* يمكننا أن نسأل ونستفسر أمير المؤمنين.
* لماذا أتيت بعاملك فلان والياً علينا فى ولاية كذا يا أمير المؤمنين.
* هنا أمير المؤمنين ملزم بالرد علينا.
* ولكن الآن فكونا من التناحر وروما مبلولة.
* المهم.
* إسلام قالت لى لاحظت حاجة يا بابا؟
* قلت ليها ليه؟
* قالت لى عمو نادر كلو ما يخت كراعو فى البلد دى بنطير.
* وكان جا لقانا ما بدينا.
* من التمهيدى يبدا لينا.
* لى أسى ما قدرت أرد على البت دى.
* البت دى ما بتنسى أصلو.
* كدى نراجع الجيات والطيرات.
* الحكاية دايرة دراسة.
* أها..
* نجى لى شمارات والى الخرتوم..
* أكان شفت يا والينا.
* واحد بتاع بحر قريباً لينا.
* حضر اللقاء التفاكرى بتاع الأحزاب العملوها لينا.
* بعد اللقاء طلع الشارع يكورك يا والينا.
* عندنا مسابقة جائزتها كبيرة للبحلها لينا.
* أيها الناس هلموا تعالوا لينا.
* السؤال المطروح مننا ولينا.
* أذا علمت أنو أحزابنا تلاتة وتمانين وقالوا معمولات لينا.
* شنو علاقة الأحزاب التلاتة وتمنين المعمولات لينا بالتلفزيون
القومى يا أهالينا؟؟؟
* يلا.
* قربوا علينا.
* حلوها لينا.
* وغلبنا الحل يا والينا.
* قمنا قلنا ليهو حلها لينا؟؟؟
* قال بعد سمعت اللقاء التفاكرى بتاع الأحزاب ده يا أهالينا.
* لقيتم نسخة من التلفزيون القومى اللدينا.
* لأنهم الأربعة وتمنين(تلاتة وتمانين حزب وتلفزيون)يا والينا.
* كلهم بيتفقوا فى انهم ما عندهم برامج لينا يا والينا. سلك كهربا
* ننساك كيف وتلاتة وتمانين حزب وتلفزيون مافيه ولا برنامج.
والللللللللى لقاء
سللللللللللللللك
في السلك – بابكر سلك
