> الجماعة ديل ناس هيثم كابو ..عاوزين يقنعونا ليكم ان الخروج من دور الـ (64) افضل من التأهل لدور الـ (8).
> يا جماعة دا منطق شنو الوقعنا فيه دا؟.
> انتوا عارفين مرحلة الهلال التى تأهل لها تضربها في (8) بتديك المرحلة التى خرج منها المريخ.
> دي عاوزة ليها آلة حاسبة.
> شوفوا (الفضيحة).
> دي نحن لو عملناها …كان مرقنا من البلد ..انتوا العين القوية دي بتجيبوها من وين؟.
> الغريب انهم عاوزين يقنعونا بي كل جدية ..وبي امانة شديدة كدا ..وبي صدق ..واخلاص ..ان الخروج من (التمهيدي) افضل من الوصول إلى المجموعات.
> افنقعوا ضحك.
> الظاهر انتوا كبيتوا ليكم (خميرة) في عصير الليمون..والخميرة مع عصير الليمون ..قالوا ليك بتخلي الزول يشوف باب البيت (قلاب تراب).
> قلاب التراب هسع الدخلو شنو؟.
> وبتخلى ليك الواحد يفتح تلفزيون السودان ويقعد يتابع في مباراة النسور والرابطة ..ويكون متخيل نفسو بتابع في مانشيستر سيتي والارسنال.
> عشان كدا ..الجماعة ديل نزلوا لينا بالمنطق المتل النعلين المقلبة دي…عاوزين يقنعونا ليك ان المريخ احسن ليه وافضل انه خرج من التمهيدي ..احسن ليه من الهلال.
> يا جماعة المنطق (المقلبن) الوقعنا فيه دا شنو؟.
> خلاص يا جماعة …نحن رضيانين ..ومبسوطين للطيش ..كل سنة اطلعوا من دور الـ (64).
> كمان الخروج من (التمهيدي) فيه بطولة.
> معليش عاوز اسألكم سؤال.
> سؤال عادي كدا..ما فيه أي (صفيحة) احراج.
> ما فيه (جردل) احراج.
> انت وقت عاوزين تطلعوا من دور الـ (64) بتلعبوا مع بايرن ميونخ ليه؟.
> بتدفعوا مليون دولار ليه؟.
> الموضوع دا بدون (بايرن ميونخ) ممكن يحصل.
> بدون ما تدفعوا (دولار) واحد ممكن تطلعوا من دور الـ (64) ..ما في داعي للتعب دا كلو.
> مليون دولار ..وتسجيلات ..وجهاز فني الماني.
> يمشي جهاز فني الماني ..ويجيبوا جهاز فني الماني.
> عشان شنو؟.
> عشان يطلعوا من دور الـ (64).
> ويقعدوا ليك في البيوت..ويقولوا ليك..والله الطلوع احسن لينا.
> افضل لينا كدا..من نلاقى الترجي التونسي والصفاقسي ومازمبي ووفاق سطيف والزمالك المصري.
> يا زول ديل ما بتقابلوا ..ولا بتصاقعوا.
> جماعتكم (شمتانين) في الهلال.
> والله دي اول مرة تحصل في العالم..فريق يشمتوا فيه عشان اتأهل لمرحلة (المجموعات).
> يا جماعة دي بتحصل.
> دي حصل سمعتوا بيها قبل كدا.
> شفتوا ليكم ناس يشمتوا من فريق اتأهل لدور الـ (8).
> فريق طلع من دور الـ (64) موش مفروض يمسك خشمو عليه ..وإلّا يشوف ليه (حواشة) يزرعها بصل.
> البصل مفيد.
> البصل مفيد جدًا للناس البطلعوا من (التمهيدي).
> يا جماعة.
> يا عالم.
> اذا كان دا فهمكم ..ودا منطقكم ..ودا حنكم…ح تمشوا لي قدام كيف؟.
> بتهاجموا جمال الوالي.
> اول جمال الوالي بهاجموه.
> معارضة المريخ وقت خلاص تتجرأ..وتتنفخ بتقوم تهاجم ليك الناس الحوالي جمال الوالي.
> ما بقدروا يقولوا أي حاجة في جمال الوالي.
> ولا كلمة.
> عشان كدا.
> وعشان خاطر جمال الوالي عاوزين يقنعونا انو الخروج من دور الـ (64) افضل من التأهل لدور الـ (8).
> يا جماعة ديل يقولوا ليهم شنو؟.
> يا جماعة ديل يفهموهم كيف؟.
> دي ما بتنشرح.
> ولا بتصلح.
> ولا بتجي.
> عليكم الله حاولوا صلحوه شوية.
> اتصلوا بـ (مصطفى الاغا) خلوه يعمل ليكم جائزة لأفضل فريق خرج من مرحلة التمهيدي.
> جائزة الفريق المثالي في التمهيدي.
> موش جمال الوالي دا حصل فاز بجائزة افضل رئيس نادي عربي (شعبية).
> موش حصل جبتوا لينا هنا الاهلي المصري ..وعملتوا لينا تكريم لجمال الوالي بهذه المناسبة (الاغاية) بتاعة (صدى الملاعب).
> حصل ولّا ما حصل؟.
> يبقى حصل.
> اها افضل رئيس نادي عربي شعبية طلع من دور الـ (64).
> دي عاوزة ليها (رئيس).
> اتصلوا بي احمد شوبير ..اصلو زولكم..خلوه يقول في برنامجو ان الهلال حارس مرماه من جنوب السودان.
> وان مسألة استبعاد الهلال من البطولة الافريقية ..مسألة وقت.
> مسألة وقت.
> ح نديك شهر تاني.
> شهرين..يلا ورونا شطارتكم.
> خليهم يستبعدونا.
> يا بتاع (مسألة الوقت) انت.
> مسألة الوقت دي قولها لي (فيفي عبده) التى تم اختيارها الام المثالية في مصر.
> انتوا من شروط الام المثالية في مصر انها تكون بتعرف (ترقص).
> علاقة (الرقيص) بالام المثالية شنو؟.
> يا جماعة الله.
> يا ناس.
> يا عالم.
> عليكم الله واحد منكم يحاول يقنع لينا (المريخاب) ديل ..الجماعة ديل صدقوا ان الخروج من (التمهيدي) افضل.
> افضل ليهم من مواجهة الترجي أو الصفاقصي او مازمبي.
> في (خوف) اكتر من دا.
> شفتوا ليكم (جبن) بالصورة دي.
> جماعتكم حمدوا ربهم ..على قعادهم في البيوت ..من مواجهتم للترجي.
> اقعدوا خوفوا لينا كدا.
> بعدين انتوا وقت دا شعوركم ..ودا خوفكم ..ناس بلة جابر وموسى الزومة شعورهم ح يكون كيف؟.
> ديل ح يتحرروا متين من مرحلة (التمهيدي) لو كان هذا هو تفكيرهم.
> الحكاية بايظة من كبارها.
> اقنعوا ساي يا ناس المريخ.
> عندكم اعلام ..عاوز يقنع العالم كلو ان الخروج من التمهيدي افضل من التأهل لمرحلة المجموعات.
> خلاص عليكم الله ..خلوا الدولة تكرمكم.
> خلوها تديكم وسام من الطبقة الاولى بمناسبة خروجكم من دور الـ (64).
> على الاقل انتوا هسع ضامنين انكم ما ح تلاقوا الترجي التونسي.
> شوفوا الفرح.
> شوفوا (الانبساطة).
> على كدا اراهن منذ الان ان المريخ لن يتقدم في البطولات الخارجية.
> سوف يظل هكذا فتى التمهيدي المدلل.
> فوبيا المواجهات الكبيرة يسيطر على المريخ بكل قطاعاته.
> عندهم مشكلة في الحتة دي ..مفروض يتعالجوا منها.
> اذا لم يتخلصوا من هذه (الفوبيا)..سوف تبقى اقصى طموحاتهم هي الفوز على النسور.
> والانبساطة بذلك.
> الانتصار على الاهلي عطبرة.
> والفرح بذلك.
> المريخاب بسبب هذه (الفوبيا)..جعلوا ليك الاتحاد العام لكرة القدم يأجل مباراة القمة من اسبوع إلى اسبوع.
> ما بستحملوا.
> ما بستحملوا مواجهة الهلال.
> ما بقدروا على (الصدمة) دي.
> لهذا اصبح الاتحاد يرحّل في مباراة القمة من اسبوع إلى اسبوع ..من شهر إلى شهر…لمن قربوا يبرمجوها لينا في الموسم المقبل.
> ديل خلاص اتعودوا على (الراحات) دي.
> يلعبوا ليهم مباراة ودية مع بايرن ميونخ.
> يتبادلوا (الفنايل).
> شيلميس يجيب ليه (5) اهداف في فريق النسور.
> اتعودوا على (الساهلة) دي.
> وقت تجي ساعة الجد ..والمواجهات الكبيرة ..والرسمية ..كلهم يمسكوا (بطونهم).
> يا جماعة انتوا ح تكبروا متين؟.
> يا جماعة الحاجات دي انتوا كبرتوا عليها ..تطلعوا من (التمهيدي) وتقعدوا تتحدثوا لينا في السياسة.
> المجموعات دي سياسة ما تتكلموا لينا فيها.
> نلاقى الترجي.
> نلاقى مازمبي.
> نلاقى الجن الاحمر..انتوا مالكم؟.
> انتوا دفعتوا مليون دولار عشان تلاقوا (بايرن ميونخ) في زول سألكم.
> دفعتوا دم قلبكم عشان تلاقوا (الاهلي المصري) في تكريم جمال الوالي.
> اها نحن الناس ديل بنجيبهم حمرة عين.
> بنجيبهم هنا في استادنا غصباً عليهم.
> ولا على كيفهم.
> انتوا اقعدوا اتفرجوا ..وشوفوا البحصل شنو؟…والموسم القادم اطلعوا لينا عليكم الله من (التمهيدي).
> الحاجات الكبيرة دي ومرحلة المجموعات ..خلوها لينا نحن ..والله العظيم مبسوطين بيها ..والفرح عاوز يشقنا.
> لكن عشان تكونوا عارفين ..تاني لو عملتوا البتعملوا فيه دا ..ح نجيب بدلاً عنكم (النسور).
> ما فاضيين لي (التمهيدي) حقكم دا.
> الغريب ..والشيء العجيب.
> المريخ طار.
> الفريق الذي طيّر المريخ (كمبالا سيتي) هو ذاتو طار.
> والفريق الذي طيّر (كمبالا سيتي) ناكانا الزامبي هو نفسه طار وخسر امام الزمالك صفر / 5.
> وبعد دا ..يتكلموا ليك عن مرحلة المجموعات.
> مرحلة المجموعات دي زول طلع من دور الـ (64) مفروض ذاتو ما يتكلم فيها.
> ملحوظة : غايتو فصاحة زي دي من الله خلقني ما شفتها.
هوامش
> سامر العمرابي مراسل قناة بن سبورت قدم تغطية جميلة لمباراة الهلال..ونجح في تقديم تقارير رائعة عن الهلال.
> ومن دون شك ننتظر من العمرابي الكثير في المرحلة القادمة ..بعد ان تشفّر المرحلة القادمة من البطولة.
> العندو كرت ..عندو ..والما عندو يعصر على ناس النسور.
> النسور إلى الان ما عندو (نقطة) زي المريخ في البطولات الافريقية.
> انتوا عارفين..المريخ دا (نسور) دوري ابطال افريقيا للاندية.
> المريخ يعاني من هاجس كبير خشية مواجهة الهلال.
> جابوا اتوفيستر.
> اتوفيستر ذاتو جابوا معاه احمد ساري.
> ابراهومة قال سوف يرحل من المريخ بعد مباراة القمة.
> اها شفتوا جرسة قدر كدا.
> الناس ديل طبعاً ما جابوهم عشان بطولة افريقية.
> ولا جابوهم لبطولة سيكافا (عشان الموضوع دا اصبح مكشوف).
> الجماعة ديل جابوهم فقط عشان الهلال.
> والهلال ان شاء الله لو واجههم بي جماعتكم ديل ..ح يخلى عصام الحاج تاني يطلع يشمت فيكم.
> تسجيلات يونيو …هي الاهم يا هلال.
> ركزوا في اضافات حقيقية للهلال في التسجيلات القادمة.
> عاوزين الصورة تكتمل …عاوزين البطولة.
> لا بد من نجوم جدد في قامة البطولة الافريقية.
> تتخيلوا تسجيلات ديسمبر الماضي يشارك منها فقط كوليبالي وسيسه.
> بعيد عن المشاركة وارغو وسيمبو وصلاح الجزولي ووليد علاء الدين.
> عاوزين اضافات يستفيد منها الهلال.
> مواجهة الهلال القادمة في الدوري الممتاز امام الاهلي شندي نخشى ان يهملها الهلال في ظل الافراح التى يعيش فيها.
> عليكم الانتباه ..والتحضير الجيد لمباراة الفريق امام الاهلي شندي.
> تذكروا ان الهلال لم تستقبل شباكه هدفاً حتى الان في مباريات الدوري الممتاز.
> الحذر من الاهلي شندي واجب …ومواصلة الانجاز والارقام القياسية امر لا بد منه.
> الاهلي شندي حتى في الخرطوم لن يكون سهلاً.
> خاصة وان الاهلي شندي في معسكر مقفول منذ اكثر من (10) ايام تحضيرًا لهذه المباراة.
> الخروج من اجواء البطولة الخارجية …والدخول في اجواء البطولة المحلية ..يسبب في الغالب خلل فني.
> ونخشى من (الدوار) الذي يكون بين البطولتين.
> سؤال لي ناس المريخ.
> انتوا مفتاح عطبرة كم؟.
> ….
> عاجل : المريخ ضمن كلية (64) نادي افريقي …والهلال ضمن افضل (8) اندية في افريقيا.
وإن طال السفر – محمد عبد الماجد
صحيفة قوون
-
-
-
-
-
-
-
-
