ياسر عرمان حُكِّم عليه بالاعدام ومع ذلك سيكون رئيس الطرف المقابل.. حوارمع (معدوم) دي كيف ..؟ !
إعلان عن دواء لمحاربة الصلع وإنبات الشعر الذي يعلن عنه أصلع.. صلعه ليها ضُل.. دي كيف؟
شركة تعلن عن استردادها للديون مهما كانت.. حقو ناس يبقى لحين السداد يتصلوا بيها لأنو الشركة البتجيب الديون دايرين نشوفا دي كيف؟
باسم يوسف قدم في برنامجه البرنامج أغنيتين واحدة قال افريقية والثانية قال سودانية.. وقدم الأغنية السودانية نطلع العالي وننزل الدقداق بعدين غنوا معاهو الأفارقه برطانة أفريقية يمكن حبشية.. باسم داير يقول الأغنية السودانية افريقية ماعربية دي كيف؟
دواء واحد اسمو(بلقرين) اشتريتو من صيدلية بي 38 جنيه في صيدليات تانية بي 42 جنيه دي كيف؟
كاتب كان واقف ألف أحمر ضد كاتب تاني.. التاني قام عمل جريدة شغل فيها الكاتب الأولاني دي كيف دي ..؟!
خرج نايل من المنافسة.. فازت عليه منافسته وهم.. التي دغدغت عاطفة الناس بأغنية (ست الحبايب) وأهدتها إلى أمهات الشهداء.. حين غنى (نايل) بطريقته.. وأعتقد إنه أجاد وتفوق لكن اعتماد التصويت على (ابن البلد) جعل التفوق بالأكثرية شعب (وهم) ثمانين مليون.. وشعب نايل ماتامين تلاتين مليون تلاتا أرباعو فقراء.. دايرين يصوتوا لكن العين بصيرة والايد قصيرة.. وصدرت فتاوي ضد التصويت له.. فهل انهزم نايل وتفوقت (وهم) دي كيف؟
شركات النظافة بتشيل رسوم شهرية على أساس إنها تنضف الأحياء من القمامة.. لكن للأسف الشديد القمامة ماليه البلد ومرات بحرقوها وانحنه بندفع دي كيف؟
أسمر جميل .. أسمر جميل فتان .. ياسمارة الليله ياسمرا.. سمرا ياسمرا الخمري لونك.. زولي الأخدر.. الليموني.. أسمر ياأسمراني.. أسمر اللونا.. ومع ذلك بعضهن يعتدين على السمرة بتبيضها.. دي كيف؟
موية الصحة بقت بي اتنين جنيه.. السبب شنو.. لا فيها سُكر.. لا فيها روح.. موية الله والرسول.. برضو تزيد دي كيف؟
زادت أجور الطائرات في السفريات الداخلية.. والناس بركبوا الطيارات عشان يتفادوا حوداث الطرق.. وانحنا عملنا طيارات.. وكمان طياره بدون طيار.. دي كيف؟
صحن البوش الكلو مويات.. موية فول.. موية جبنة.. وموية دكوه.. برضو الشيرنق بتاعو خمسة جنيهات.. دي كيف؟
طالبة من دارفور قالت بإنها بتمشي تلاته ساعات كداري عشان تؤدي الإمتحان.. ويمتحنونها في المقررات مش في المشي .. دي كيف؟
شعار تطلقه قناة النيل الأزرق:
لحظة حب بين المشهد والحياة.. دي كيف؟
الصباح..رباح – آخر لحظة
[EMAIL]akhirlahzasd@yahoo.com[/EMAIL]
