* شعب يقود ولا ينقاد.
* شعب يؤثر ولا يتأثر.
* عشان كده عندنا الكثير من المفاهيم والكلمات بتاعتنا أصبحت عالمية.
* فكلمة يا زول حقتنا ملك.
* حقتنا برانا.
* ومثلاً الكجولة.
* وهى بالعامية السودانية تعنى المشى الما عديل.
* المشى الملولو.
* المشى باللف والدوران.
* وكلمة كجولة بتاعتنا دى جات منها كلمة كاجوال الأنجليزية برغم
أختلاف المعنى.
* الخواجات عجبتهم نغمة الكلمة.
* كجولة.
* قاموا عشان خشومهم صغار ما زى حقاتنا عملوا كلمتهم كاجوال.
* المهم.
* الكجولة هى المشى الما دوغرى.
* وماجستك برضو كلمة شالوها الخواجات مننا.
* أصلها سودانى مركب من كلمتين.
* مال فى لستك.
* الخواجات قلبوها ماجيستك.
* برضوا شالوا النغمة وأدوها معنى تانى مع تغيير طفيف فى النطق.
* فالكجولة بتاعتنا معناها المال فى لستك وتقوم بى نمرة اتنين وجمبك حبش داقسين.
* حبش خبر ما جايبين.
* حلاقين.
* والزقاق ضيق يا دوبك يشيل صحن الكبدة فى الأيدين.
* منظر يسر الناظرين.
* والداير يشوفوا الصور عندنا فيديو وصور.
* والأكسنت القديمة أعادت حليمة لى عادتها القديمة.
* أتغدى.
* أتغدى كويس.
* لكن الكجولة كلمة غالية يمكن ان تكلف بالسعر العالمى الفين وخمسمائه دولار.
* دولار ينطح حلاق.
* أقصد دولار ينطح دولار.
* القصة دى حكيتها لى أسلام.
* أسلام قالت لى يعنى يا بابا كاجوال معناها حلاق حبشى؟؟؟؟
* قلت ليها لأ معناها كبدة!!!!
* وسيد الشركة يدفع ويتلمع.
* شركة بيع وشرء العبارات والكلمات المحلية وتسويقها عالمياً.
* أسلام قالت لى سيد الشركة منو يا بابا؟
* وريتها صورتو فى الجريدة.
* قعدت تغنى.
* الشايل الجريدة ووب أنا يقراها ويعيدها حى انا.
* قلت ليها اللحن ده برضو كسودانيين حقنا.
* بكره يشيلوهوا الخواجات زى ما شالوا الكجولة والمال فى اللستك.
* ويغنوها لينا يا بتى.
* المهم.
* فرحنا لأقتناع الأتحاد بالموسم المشاتر.
* ونتمنى ان تعى الجمعية العمومية أهمية هذا الموضوع.
* وتديهو أهتمام كبير.
* وتختار التوقيت الأمثل.
* كفانا نقزان برة الحلقة.
* ونتمنى ان يتطور التحكيم عندنا شكلاً ومضموناً وموضوعاً.
* شكلاً يكون الحكم أنيق وحالق.
* لازم يحلق يوم الكورة.
* وشبعان متغدى كبدة.
* مضموناً يكون مضمونا لدينا.
* وموضوعاً يكون عارف موضوعو كويس.
* كده كورتنا ممكن تتطور.
* موسم يبدأ مع الناس.
* وتحكيم أنيق خلاص.
* بجينا الكاس.
* المهم.
* لقاء الريس محمد الياس بالريس الوالى لقاء أثلج الصدور.
* ففتحى ابراهيم عيسى الذى كان حضوراً أنيقاً لا يقل قامة عن القامتين.
* وبتلاقى الكبار يعود المريخ كبيراً وكبيراً جداً.
* أثلج صدورنا ذلك اللقاء.
* ونتمنى العمل بالتوصيات والمقررات.
* وأن تستمر الأحترامات.
* فلكل قامة مكانتها.
* ولكل محترم أحتراماً يجده من الناس.
* بالتوفيق للمريخ فى حضرة الريسين.
* أيها الناس.
* الصلح خير.
* فقط ما يكون أساسو باركوها.
* يكون أساسو القناعات بين الأطراف.
* المهم.
* وليد البشرى الهلالابى مبسوط.
* قال لى أنحنا أخير منكم ماضى وحاضر ومستقبل.
* قلت ليهو ماضينا فيهو مانديلا ماضيكم فيهو شنو؟؟؟
* خليهو ماضيكم.
* حاضركم ومستقبلكم فيهم شنو؟؟؟
* أبوحشيش وهلال شلعوها وهلال عصمت كلهم زى بعض.
* مافيهم زول فى لوح الشرف الأفريقى.
* لوح الشرف الأفريقى أندرويد.
* ما عندك آى فون ما بتوتسب مع الناس.
* أذا أتصلنا بيكم من لوح الشرف الأفريقى.
* الآنسر ماشين حاتقول لينا.
* عفواً هذا الرقم غير موجود فى سجلاتنا.
* المرجو التأكد من الرقم الصحيح ومعاودة الأتصال.
* والرقم صحيح طبعاً ممكن يكون الأهلى القاهرى,النجم الساحلى, الترجى,مازيمبى,المريخ,الزمالك,البنزرت التونسى,الأشانتى كوتوكو.
* لكن أبداً ما ممكن الرقم الصحيح يكون بيت المال أو الهلال أو تريعة البجا أو دغيم حلفا مع أحترامنا لكل الفرق الصغيرة.
* وقلت ليهو نعيماً.
* باركت ليهو الحلاقة.
* الناس بتمشى الحلاق قبل الكورة.
* والشينة منكورة.
* ويبقى مانديلا هو الأعجاز والأنجازالوحيد للفرق السودانية.
* حتى أشعار آخر.
* والأشعارالآخر هو عندما نستشعر نحن المسئولية.
* فمن غيرنا أعطى لهذا الشعب معنى ان يعيش وينتصر ويذهب للمطار للبطولات يستقبل.
* ومن غيرنا فى لوح الشرف الأفريقى لى أسم الوطن مسجل.
* ومن غيرنا لا يتكجول ولا ياكل الكبدة بالنهار فى نص الضهرية.
* ومن غيرنا لايركب الآكسنت القديمة العربية.
* أها.
* نجى لى شمارات والى الخرتوم.
* أكان شفت يا والينا.
* رسالة جات لينا.
* من الرقم0910387030 الراجل قلبو علينا.
* بقول فى الرسالة يا والينا.
* أنكم أمرتم بالأستغناء عن قسم النساء والتوليد بمستشفى الخرطوم يا والى الخرطوم ووالينا.
* وبقول ليك أنت قايل أى زول عندو حق مستوصف يلدوا فيهو أولادو يا
والينا؟
* قال ليك بعد مرات حق الأمجاد البودى المستشفى ما بتوفر لدينا.
* لكن ساكتين يا والينا.
* فنحن شعب عزيز وعزيز أنت يا وطنى برغم قساوة الأحن محترم لدينا.
* ده كلام الزول يا والينا.
* لكن كلامى هى ذاتها الولادة شنو لينا.
* جنينا!!!!!
سلك كهربا
* ننساك كيف ونحن شعب يصبر حتى يعلم الصبر كيفن يصبر؟
والللللللللى لقاء
سللللللللللللللك
في السلك – بابكر سلك
