رأي يخصني —-
انا ضد فتح جبهات وخلافات بإشعال الفتنة بين الجيش وحركات الكفاح المسلح والمستنفرين وحتي الكيزان أو جهة أخري..
الآن العدو عندنا واحد إسمو مليشيات الدعم السريع والواقف معاها خلاف دا ما عندنا عدو حالي حتي لو في جهة أو شخص أو حركة مسلحة او حزب ونحنا عارفين نواياهم سيئة حالياً وبطرفنا ما يثبت ذلك بنحكم صوت العقل وبنقول دا ما وقته ….
البلد دي حالياً في هشاشة أمنية وهشاشة في النسيج المجتمعي بطريقة مخيفة أي زيادة في القصة دي أو توسيع الشرخ المجتمعي دا بعمل نتيجة تمسح حاجة إسمها السودان من الوجود اساساً …
حتي ما يحدث من بعض ساسة أهلنا في الشرق وقادة بعض الحركات المسلحة دا فيه قلة حكمة وبورينا قدر شنو نحنا ما عندنا سياسة والزول البدفعهم للفتن بخربها وبقعد في رأسهم..
ياخ نحنا ما عندنا سياسين شغلهم مطاعنات فارغة ساي …
البلد حالياً في مهب الريح وفي نفس الوقت يجي واحد يطلع فيديو او في مؤتمر يقول كلام ( لا يعتد به ) ومسخرة ومضحكة والبعض مننا بجهل بشيل الفيديو يعملوا مادة إعلامية للتداول العام وهو ما عارف الفتنة بتبدأ بكلمة واحدة ….
نشطاء التواصل الإجتماعي مع كامل إحترامي ليهم لما تمشي وراء كلمة او فيديو بتفتح نار نحنا والله في بُعد عنها ياخ البلد كلها في كف عفريت وهم يضحكوا في فارغة البلد دي كان مرقت من اليد تاني ما بتتلحق ومشعلين الفتنة دي بعملوا رايحيين منكم …
الوضع صعب الله يرضي عليكم روقوا وأسمعوا صوت العقل مرة واحدة العندو قدرة يدعم الجيش الما عندو يلم خشمو عليه
ويريح المساكين المنتظرين الجيش ينتصر ويرجعوا بيوتهم بس …
المشاكل والحريق ببدأ بكلمة والله والله والله الساكتين والعارفنو كتييير بس ما عايزين نزيد الحريق منتظرين الله يهدئ سر البلد دي …
الله يفتح بصائركم ياخ
عائشة الماجدي
-
-
-
-
-
-
-
-
