دكوة حميدتي وشطة البرهان

قال ليهم عايز أكبر صحن عندكم، وجهزو الطماطم والبصل والبهارات ما خلو ملح وخل وشمار وكزبرة وليمون، وكيس دكوة جديييدة، وأصر حميدتي يعجن سلطة الدكوة بي نفسو، وهاك يا عجن بيدينو الاتنين مرة بالشمال ومرة باليمين، والجماعة منتظرين يخلص عشان ياكلو خلاص.

قاليهم جهزتو العيش؟ قالوه جاهز يا الأمير انت بس ظبط الدكوة تمام.

وخلاص عايزين يبدو ياكلو كده قام واحد قليهم دقيقة دقيقة نسيتو الشطة، ومشى يفتش لي شطة حمرا ولا خضرا المهم يجيب الشطة يحصل الجماعة قبل ياكلو.

قوم يا البرهان تعال طاير من وين ما عارف وشايل كيس شطة حمرا نااااعمة وحاااارة، واكشحها في عيون القاعدين ديل كلهم، وما لحقو ياكلو سلطة الدكوة دي.

أها الحصل شنو بعداك؟ المرة قالت صحت من الحلم وكتبت المنشور ده في واحدة من المجموعات الإلكترونية في تطبيقات التراسل، بحسب رصد محررة “النيلين”، وقالت عايزة تفسير.

وكان أغرب تفسير جاها واحدة كتبت ليها شفت سلطة الدكوة الكان بعمل فيها حميدتي دي ياها السُلطة والحكومة وامارة آل دقلو الكان عايز يقومها في السودان، واما الكان بجهزو ليهو في البهارات ويقطعو في الطماطم ديل ناس الحرية والتغيير، والود المشى يجيب الشطة داك خالد سلك ذااااتو، أما البرهان الظهر ليك في الحلم وشايل الشطة، شفتي الشطة الكشحها في عيونهم دي ناس الجيش والأمن والمشتركة والبراؤون والمستنفرين وكل القوات الوطنية الساطت ليهم سلطتهم دي وحرقت ليهم عيونهم وبوظت ليهم أي حاجة.

وانهالت التفسيرات على صاحبة الحلم والتعليقات الساخرة، بعد أكثر من عام ونصف على معركة الكرامة التي تخوضها القوات المسلحة السودانية والقوات المساندة لإنهاء تمرد الدعم السريع المستمر منذ 15 أبريل 2023، وقد قاربت ساعة النصر.

رصد وتحرير – “النيلين”