وأشارت نهي، إلى أن جدة أبنائها أخبرتها بأنها ستطردها من الشقة المقيمة فيها بعد أن تتم ابنتها الصغرى السن القانونية، قائلة: جدة الأولاد قالت لي في وشي إني لما بنتي تتم 15 سنة هنخرج من الشقة لأنها بقت من الميراث، وبنتي هتم 15 سنة في شهر 9 الجاي، ومش عارفة هروح فين، ولكن على يقين إن ربنا مش هيسيبني.
وأكدت أنها تعاني منذ فترة طويلة، موضحة: النور بيقطع علينا وواخدين كارت الكهرباء والمياه من فترة كانت مقطوعة علينا شهر، وأنا بتكلم لأني شفت منهم شماتة، وخايفة يجرالي حاجة من الضغوط النفسية اللي أنا فيها، عيالي هيعلموا إيه؟، أنا من شهر يناير اللي فات كنت منزلة بوست فيه رسالة للأستاذ حلمي، وده كان وقت تعبه وخدت نفس الرسالة دي وبعتها له على الواتساب، وهي دي الرسالة اللي سماح القرشي قالتلي إنها مورتهاش للأستاذ حلمي.
وأكملت: أنا شغالة في القضية دي كرأي عام من 5 سنين، والسنتين اللي فاتوا كذا مرة أنزل حاجات عن القضية حتى رجوعي لـ أبو البنات كان الصيف اللي قبل اللي فات، واللي جد أن السنة دي اللي هيتاخد فيها الشقة والبنت هتم 15 سنة، ومن زمان مكنش فيه وفاق بين حلمي بكر وبين البنات لأن طريقته كانت صعبة.
وأضافت مستنكرة أفعال حماتها شقيقة حلمي بكر: إيه يخلي جدة متودش عيالها؟ اللي تقدر تكره مرات ابنها تقدر تعمل كل ده، وأنا ماعنديش سبب لكرهها ليا وللبنات، ولكن عندي تفاصيل مش هينفع أحكيها.
وأردفت: أنا كلمت أخته ومردتش عليا، ورحت لعمته وخليتها تتصل بأخته وقولت لها أنتي عندك بنتين قفلت في وشي ومردتش عليا، وروحت لجوز أخته وخبطت ومحدش فتح ليا، وكنت بروح كل شهر لوالدته أمضي وأبصم علشان أخد ألف جنيه، لولا أن الواحد عارف أن في رب شايفه كان اتجنن.
واستكملت: الست دي عندها إمكانية تطلع مني حاجات مش عايزاها تطلع، أنا روحت لها ومعايا الوصولات والأوراق وعيطت وانفجرت في الكلام بصتلي وقالتلي ياه أنتي أتأخرتي أوي، هي كان نفسها طول عمرها أغلط وأعلي صوتي، لأنها كانت بتزعل أن بيتقال عليا ذوق وشيك، هي كانت عايزاني وحشة.
القاهرة 24