فطومة: حميدتي رجع مات تاني؟

كدي النسألك يا حميدتي إنت بتقدر توفق كيف بين الموت والحياة، يعني بسهولة كده بتقدر تموت وترجع تاني؟ الموضوع دا ما صعب وخطر عليك؟

هكذا كتبت إحدى الشابات تعليقاً على منشور التسجيل الصوتي الأخير لقائد الدعم السريع محمد حمدان دقلو “حميدتي”.

وواصلت الشابة التي تدعى “فطومة” في تعليقها قائلة:
طيب يا حميدتي ورينا لقيت الموت دا كيف؟ الموت الضوقتو لي شعبنا وأهلنا واللي اتضرر منو اهلك انت ذاتك الدخلتهم في حرب لا تبقي ولا تذر.

انت يا حميدتي نصيح؟ اختار حاجة واحدة بس يا حي يا ميت، ما ممكن كل مرة تتنقل لينا كده، تانيا النسألك هو الموضوع بتقدر عليهو كيف أصلا؟

احكي لينا طيب في التسجيل ولا الظهور الجاي بتعملا كيف، والفرق شنو لمن تسجل صوت ولا لمن تظهر صورة ولا لمن تركب الطيارة وبمناسبة الطيارة احكي لينا الميت بركب الطيارة كيف وبكون جوة قاعد عادي كده زيو وزي الناس ولا الفهم شنو؟

عارفة تعليقي دا بصلك كان حي ولا ميت بس لمن تظهر تاني قولي يا فطومة أها أنا حي ما مت، وكان ظهرت لابس دعامي كده ياداب بكون عرفت رسالتي وصلتك.

ووجد تعليق “فطومة” تفاعلا كبيرا من المتابعين على شبكات التواصل الاجتماعي وقامو بنقله ومشاركته على نطاق واسع، ما بين حالات من السخرية وما بين الواقع الأليم الذي يعيش فيه السودان، حيث يخوض الجيش النظامي حرباً واسعة لإنهاء تمرد قوات الدعم السريع المستمر منذ منتصف أبريل من العام 2023، حيث يجد الجيش مساندة واسعة من الشعب السوداني.

رصد وتحرير – “النيلين”