المركزية بتاعت الخرطوم أضرت بالسودان كله

والله البسمع الكلام عن شندي يظنها دبي
ياخي شندي دي تعبانه تعب شديد و مبالغ فيه و ما فيها أي آثار تقدم وتمدن تذكر
أما قرى شندي و ضواحيها و الله حاجة في غاية البساطة و البدائية
قل مثل ذلك في الدامر
و بربر ياخي دي عبارة عن صحاري والله
و عطبرة دي نوعا ما كده تحس فيها شوية شوية تمدن بعد الدهب
أما قرى الشمالية دي فالحياة فيها صعبة غاية الصعوبة لانعدام اساسيات الحياة
ياخي بلدنا تبع مروي ذاتها والله من شدة صعوبتها في الحرب دي أبيتها عديل 😂 الدانة و لا الشمالية
جيت شفت سنار و القضارف و قراهم والله برضو حاجة محزنة
يعني اتخيل ولاية كاملة زي القضارف بتعاني من مشكلة في الموية و الناس لسه بتشتري الموية بالكارو
أما القرى دي بسيطة غاية البساطة وغالبية قرى الشرق دي ما فيها كهرباء
ياخي الأكبر من كده ولاية البحر الأحمر بتعاني من مشكلة موية ما عندها حد بورتسودان دي الموية بتعب الناس تعب شديد شديد و أكتر شي ضايقني فيها عدم الموية ده
أما القرى دي فحكاية تانية
الخلاصة
أن التهميش ليس خاصا بدارفور أو سحنة معينة التهميش ده كل السودان عانى منه
المركزية بتاعت الخرطوم أضرت بالسودان كله
فببقى الناس تخلي الشكوى وتخت يدها فوق بعض لنبني سودانا يليق بأهله…

مصطفى ميرغني