بمناسبة بيان قحت في القاهرة

بمناسبة بيان قحت في القاهرة
في قرية من قرانا قرروا يحولوا المسيد لمسجد، طيب منو الامام؟
عندهم مهمد سالي كان شغال في مصر وحفظ شوية قرآن في الازهر، وبيتكلم عربي بلكنة مصرية، وعامل ليهم سيبويه بالفاظ مصرية: انت واخد بالك؟ بقي شوف يا فلان، وازاي الكلام ده.
– مهمد سالي يبقي الامام لانه بيعرف يقرأ.
– يا جماعة انا تربال ومشغول بزراعتي ما قدرش التزم.
المهم الحوا واصروا، وقبل مرغما ان يكون إماما ويؤم المصلين لصلاة الجمعة، باقي الفروض كل زول يصلي بطريقته.
كل يوم الجمعة يجي شايل ليهو خطب من زمن:
أعز الإسلام والمسلمين, وأذل الشرك والمشركين, وانصر عساكر الموحدين وأدِم الظفَر والتمكين لعبدك السلطان عبدالحميد ابن السلطان عبدالمجيد.
يلا مافي زول ذاتو فاهم هو بيقول، وهكذا استمروا في التقرب الي الله بنصر السلطان عبدالحميد الما عارفنو ولا سمع بيهو.
يوم الآذان اذن لصلاة الجمعة، وكل المصلين دخلوا المسجد في انتظار مهمد سالي، والانتظار طال، اتاريهو ماسك موية وقاعد يسقي وناسي انه اليوم جمعة.
– يا ولد قوم شوف مهمد ده مالو ما جا.
عمك وقفك الوابور ومشي جاري علي المسجد، طبعا ما شايل كتاب عبدالحميد معاهو.
صعد المنبر وعاين للحضور وقال ليهم: في حد جديد راح يصلي معانا النهارده؟
كانت الاجابة بالنفي
فقال منتصرا: الخطبة زي القريتهالكم الجمعة الفاتت، اقم الصلاة.
ناس قحت المفروض بدل يكلفوا نفسهم ببيان جديد في القاهرة كانوا يقتدوا بمحمد صالح ويقول: البيان الختامي زي الاصدرناه في اديس، من بداية الحرب نفس البيانات التي لا طعم لها ولا لون ولا رائحة، وان كانوا في الفترة الاخيرة يشجبون انتهاكات الدعم السريع بصورة خجولة: مثلا يقولوا نشجب الجرائم التي ترتكب في دارفور من قوات الدعم السريع، و ايضا نرفض…. الجيش السوداني، اصرارهم علي عدم قطع حبل الود واغضاب الدعم السريع واضح لكل ذي بصيرة وراسنا ما فيهو قنابير😀
🔹طبعا ده دور منوط بالاحزاب والكيانات السياسية، ومن حقكم السعي لطرح رؤيتكم لحل المشاكل والمساهمة في ايقاف الحرب، بس ما عندكم وسائل، بل ما قادرين انكم تفترعوا وسائل لعجزكم السياسي.
🔹الشعب السوداني يُقتل ويُسحل ويدفن حيا، وليس لديكم غير بيانات ندين الدعم ولازم في ذات الفقرة تدينوا فيها الجيش( نظام ما عاوزين تزعلوا بوبي)
🔹وين كوادركم للعمل وسط الجماهير؟ ام قد خرجتم بقضكم وقضيضكم؟
🔹هل تواصلتم مع الدول التي تقيمون فيها لتسهيل امور النازحين واللاجئين؟ هل زرتم معسكرات اللاجئين( والا دي مهمة الامارات؟)
🔹عارفين انه في مشكلة إقامات في اغلب الدول؟ الاماراتيين مثلا موقفين الاقامات( مافيكم زول يقول لبن زايد، نحن بننفذ كلامك بالحرف، بس ياخ اكرمنا بفتح الاقامات للسودانيين وتوفير فرص عمل ليهم، انت دورك كبير في الحاصل ونحن شهود صامتين) والا الدراهم تصغر العمائم؟
🔹 في واحد اتجرأ وحاول يحل مشكلة التأشيرة لمصر؟ سألتوا المصريين عن الحريات الاربعة؟ هل تحدثتم معهم عن الحالات الانسانية والمرضي؟ انتو ذاتكم كيف كل يوم داخلين ومارقين من مصر زي لعيبة الكورة، بيدوكم تأشيرات كيف؟ والا اصبحتم من المؤلفة قلوبهم؟ هل تعلمون ان الذين قدموا للتأشيرة شهر يوليو في قنصلية وادي حلفا، يا دوب استلموا جوازاتهم للتأشيرة؟
🔹الادوية ممنوعة دخولها عبر المعابر واهم معابر مصر، ليه ما تطالبوا الحكومة المصرية بالسماح بدخول الادوية والاغذية؟ مش كان الاولي القاعات الفخيمة البتأجروها دي تساهموا بيها في شراء الادوية وإرسالها للداخل؟
🔹ما ملاحظين انه الاغاثات الداخلة لغزة اكتر من السودان؟ خلوكم من مناطق الحرب وصعوبة وصول المساعدات الانسانية، الناس في وادي حلفا محتاجين اغاثة وفي القلابات وكل المعابر دعك من المدن التي تعج باللاجئين والنازحين وتصل فيها اسعار الايجارات لارقام فلكية، وانتم لا حول لكم ولا قوة.
🔹بتسمعوا بام جرس؟ والا عيال زايد ما كلموكم؟
🔴 الخلاصة فاقد الشئ لا يعطيه، فما فشلتم فيه بعد تسنمكم ظهر الثورة العظيمة وضربتم بشعاراتها عرض الحائط، وتناغمتم مع القتلة لن تنجحوا في اصلاحه والحرب قد قضت علي الاخضر واليابس بين جنرالين كنتم تحجون اليهم وتتقربون لهم بالبعد عن شعارات الشارع: العسكر للثكنات والجنجويد ينحل.
☎️ طه عثمان طول مافي زول اتصل بيهو

حكيم شمية